Rusiya açıq şəkildə hədələdi: Neft və qazı bağlayacağıq

Avropa ölkələri Rusiya Federasiyasını SWIFT beynəlxalq banklararası ödəniş sistemindən ayırsalar, Rusiyadan neft, qaz və faydalı qazıntılar ala bilməyəcəklər.

“Ölkə.Az” tass-a istinadən xəbər verir ki, bunu Rusiya Federasiya Dövlət Dumasının sədr müavini Nikolay Juravlev bildirib.

“Biz xarici valyuta almayacağıq, amma Avropa ölkələri neft və qaz ala bilməyəcək”, - Juravlev  ABŞ-ın Rusiyaya qarşı sanksiyaların tətbiqi ilə bağlı məsələyə mövqeyini açıqlayarkən deyib.

O bildirib ki, SWIFT bir ödəniş sistemidir, xidmətdir: “Ona görə də onlar Rusiyanı SWIFT-dən kənarda qoysalar, biz valyuta ala bilməyəcəyik, lakin alıcılar, ilk növbədə Avropa ölkələri mallarımız, neftimiz, qazımız, metallarımız və digər vacib məhsullarımız ilə təmin edilə bilməyəcəklər. Onlara belə bir şey lazımdırmı? Mən belə düşünmürəm”.

Juravlev qeyd edib ki, SWIFT rahat və sürətli olsa da, pul köçürməyin yeganə yolu deyil.

Bildirib ki, Böyük Britaniya və ABŞ-ın birgə qərarı Rusiyanı SWIFT sistemindən çıxarmaq üçün kifayət etməyib və bunun üçün bu sistemdə iştirak edən bütün ölkələrin birgə qərarı tələb olunur.

Mürtəza
Ölkə.Az