Baş nazirə Albaniya xatırlatması: “Biz Türk bayrağı qaldıra bilərik?”

"Mitsotakisi Albaniyada Yunan bayraqları ilə qarşılayırlar. Bəs biz burada Türk bayrağı qaldıra bilərik?”

Ölkə.Az “Star” qəzetinə istinadla xəbər verir ki, bunu Xanthi şəhər qubernatorunun keçmiş müavini Musa Vidinli deyib.

“29 Yanvar və onun əksləri” adlı anma tədbirində çıxış edən Vidinli Yunanıstanın Baş naziri Kiryakos Mitsotakisin 2022-ci ilin dekabrında Albaniyaya səfərini xatırladıb:

“Mitsotakisi Albaniyada Yunan bayraqları ilə qarşılayırlar. Bütün milli kanallar bunu işıqlandırır. Mitsotakis öz vətəndaşlarımızla dərdləşdik deyir. Bəs, biz burada Türk bayrağı qaldıra bilərik? Türkiyə xarici işlər naziri bizim haqqımızda nəsə deyəndə Yunan dövləti dərhal bunun əleyhinə bəyanat verir”, - deyə o bildirib.

Musa Vidinli Qərbi Trakya türklərinə qarşı davamlı təzyiqlərin olduğunu deyib. Həmçinin o, Yunanıstanda azlıqların qonaq olmadığını vurğulayıb.

Qeyd edək ki, Qərbi Trakya tarixi Trakya bölgəsinin yunan hissəsidir . Yunanıstanın ən şimal hissəsi olduğu üçün onu Şimali Yunanıstan da adlandırırlar. Yunanıstanda türkcənin ən sıx danışıldığı bölgədir. Burada 100 mindən çox müsəlman türk yaşayır.

Günay