Bu ölkədə Ukraynaya görə tank böhranı: Satdıqlarını geri almaq istəyirlər
İllər əvvəl Belçika ordusunun inventarından çıxarılaraq müdafiə sənayesi şirkətinə satılan Almaniya istehsalı “Leopard 1” tankları bir müddətdir ki, Belçikada gündəmini zəbt edib. Hökumət satdığı tankları Ukraynaya göndərmək üçün şirkətdən “məqbul qiymətə” geri almaq istəsə də, lakin hələlik buna nail ola bilməyib.
“Ölkə.Az” xəbər verir ki, təxminən 10 il əvvəl Belçika ordusu ağır tanklardan istifadə etməmək qərarına gələrək, “Leopard 1” tanklarını ordunun invertarından çıxararaq “OIP Land Systems” müdafiə sənayesi şirkətinə verib.
Rusiyanın Ukraynaya hərbi müdaxiləsindən sonra Qərb dövlətləri bu ölkəyə hərbi texnika, o cümlədən tanklar göndərməyə başlayıb. Belçika hökuməti də Ukraynaya hərbi yardım etmək istəsə də, heç bir tankı olmayıb. Vəziyyətdən çıxış yolu kimi “OIP Land Systems”ə satılan tankları geri almaq qərarına gəlib.
Belçikanın müdafiə naziri Ludivine Dedonder “Bel-RTL” radiosuna açıqlamasında bildirib ki, şirkət bir neçə il əvvəl tankların hər birini təxminən 10-15 min avroya alıb və indi onları hədsiz baha qiymətə satmaq istəyir.
Belçikalı nazir deyib ki, şirkət vaxtı ilə 10-15 min avroya aldığı köhnə tankları indi bizə 500 min avroya satmaq istəyir.
“OIP Land Systems” şirkətinin (CEO) baş direktoru Freddi Versluis hökumətin dediklərinə reaksiya verərək bildirib ki, tankların saxlanıldığı anqarların qiyməti ildə 2,5 milyon avro təşkil edir.
“Tankların modernləşdirilməsi üçün investisiya tələb olunur, ona görə də bütün bunlar yüksək xərclər yaradır. Buna baxmayaraq hazırda məsələ ilə bağlı hökumətlə müəyyən danışıqlar aparırıq”.
Versluis bildirib ki, şirkətinin anbarlarında bəziləri ağır tanklar olan 400-ə yaxın zirehli maşın illərdir saxlanılır.
Bunlar arasında Belçika və Avstriya silahlı qüvvələrinin invertarından çıxarılan “Leopard 1”, “Gepard” və SK-105 tipli tanklar, Amerika istehsalı olan 150 M113 zirehli transportyorları daha çox yer tutur.
O əlavə edib ki, bu zirehli maşınların yarısını yenidən təmir edildikdən sonra Ukraynada döyüşlərdə istifadə edilə bilər.
Mürtəza
Ölkə.Az
