Putindən nəsil artımı ilə bağlı şok təklif

Rusiyada Vladimir Putin hakimiyyəti bu ölkədə doğum səviyyəsinin aşağı düşməsi ilə mübarizə üçün gözlənilməz təklif irəli sürüb.

Ölkə.Az “neva today”ə istinadla xəbər verir ki, bu barədə iddia İngiltərə mətbuatında yayılıb.

Britaniya mediası əmindir ki, Rusiya Prezidenti Vladimir Putin ruslara işdə fasilələr zamanı nəsil artırmağı əmr edib. Bu yazı “Metro” qəzetinin saytında dərc olunub.

İngiltərə mətbuatı xəbəri Primorsk diyarının səhiyyə naziri Yevgeni Şestopalovun sözlərinə istinadla yazıb.

Məlumata görə, nazir müsahibələrinin birində deyib ki, ağır iş yükü uşaq sahibi olmaqdan imtina etmək üçün səbəb deyil.

Səhiyyə Nazirliyinin rəsmisi bu planı “zəif bəhanələri aradan qaldırmağın bir yolu” kimi müdafiə edir.

Mübahisəli fikir bir çox Rusiya vətəndaşının işdən sonra cinsi əlaqəyə girmək üçün kifayət qədər vaxtının və ya enerjisinin olmadığını bildirməsindən sonra gündəmə gəlib.

Xatırladaq ki, V.Putin Rusiyanın gələcəyinin əhalinin artımından asılı olduğunu vurğulayır. O, bu mövzunu “ümummilli əhəmiyyət kəsb edən məsələ” kimi qiymətləndirir.

Moskvada 18-40 yaşlı qadınlara pulsuz doğum yoxlanışı təklif olunur. Bəzi bölgələrdə uşaq dünyaya gətirən tələbələrə pul mükafatları verilir. Məsələn, Çelyabinsk vilayətində 24 yaşdan kiçik analara ilk uşaqları üçün təxminən 8500 funt sterlinq ödənilir.
Rusiya siyasətçiləri qadınları erkən yaşda ana olmağa təşviq edirlər. Bəzi səlahiyyətlilər qadınlara ilk övladını 21 yaşından əvvəl dünyaya gətirməyi və sonra çoxuşaqlı ailə qurmağı tövsiyə edir.

Bununla belə, Rusiyada hazırkı doğum səviyyəsi qadına 1,5 uşaq təşkil edir ki, bu da sabit əhali üçün zəruri hesab edilən 2,1 göstəricidən xeyli aşağıdır. Proqnozlara görə, 144 milyonluq ölkənin əhalisi 2050-ci ilə qədər 130 milyondan aşağı düşə bilər.

Qeyd edilir ki, buna görə də, işəgötürənlərə işçilərini uşaq dünyaya gətirməyə təşviq etmək tapşırılıb.

Tənqidçilər doğum səviyyəsinin aşağı düşməsini Putinin Ukraynaya müdaxiləsi ilə əlaqələndirirlər. Müharibədə çoxlu sayda rus əsgərinin həlak olması ailələri dağıdıb və gənc cütlükləri ailə həyatı qurmaqdan çəkindirib.

Sözügedən təklif Rusiyanın əhali böhranının həlli istiqamətində atdığı radikal addımlardan biri kimi qiymətləndirilir. Bununla belə, planın effektivliyi və sosial qəbulu ilə bağlı suallar qalmaqdadır.

Billurə Yunus