Köçəryanın gizli görüntüləri ilə bağlı yeni qalmaqal

Ermənistanda keşmiş prezident Robert Köçəryanın hava limanındakı görüntülərinin mediaya sızdırılması ətrafında qalmaqal böyüyür.

Ölkə.az xəbər verir ki, Ermənistan Ədliyyə Nazirliyinin Şəxsi Məlumatların Mühafizəsi Agentliyi mediada yayılan Robert Köçəryanın "Zvartnots" hava limanındakı görüntülərinə hüquqi qiymət verməyib.

Qurum bildirib ki, əvvəlcə videonun mənbəyinin videomüşahidə sistemi olub-olmadığı, həmin görüntülərə kimin və hansı əsaslarla çıxış əldə etdiyi müəyyənləşdirilməlidir. Bunun üçün müvafiq dövlət qurumları, o cümlədən Korrupsiyanın Qarşısının Alınması Komissiyası tərəfindən daxili xidməti araşdırma başlana bilər.

Agentlik qeyd edib ki, dövlət qulluqçuları və ya yerli özünüidarəetmə orqanlarının vəzifəli şəxsləri barəsində xidməti araşdırma və ya intizam icraatı aparmaq onların səlahiyyətinə daxil deyil.

Bununla yanaşı, vəzifə səlahiyyətlərindən sui-istifadə və ya digər qanun pozuntularına dair şübhələr yaranarsa, müraciət edən şəxslərin hüquq-mühafizə orqanlarına cinayət barədə ərizə təqdim etmək hüququ var.(musavat)