Tehrandan London və Parisə xəbərdarlıq: Bura güc nümayişləri üçün səhnə deyil

Hörmüz boğazı xarici güclərin hərbi nümayişləri üçün səhnə deyil.

Ölkə.az xəbər verir ki, İran xarici işlər nazirinin müavini Kazem Qəribabadi Fransa Prezidenti Emmanuel Makron və Böyük Britaniya Baş naziri Keyr Starmerin Hörmüz boğazı ilə bağlı yaydığı birgə bəyanata reaksiya verərkən deyib.

Hörmüz boğazı ilə bağlı Britaniya və Fransaya xəbərdarlıq edən Kazem Qəribabadi bunları qeyd edib: "Hörmüz boğazı xarici güclərin hərbi nümayişləri üçün bir səhnə deyil. Boğazın təhlükəsizliyi üçün zamin və məsul güc olaraq İran bu həssas su yolunda hər hansı bir hərbi əməliyyata qarşı xəbərdarlıq edir. Boğazın təhlükəsizliyi sahil dövlətlərinin əlindədir; böhran yaradanlar öz sərgüzəştlərinin nəticələrinə görə məsuliyyət daşıyacaqlar; bu xəbərdarlıq ciddidir".

Qeyd edək ki, iyulun 3-də  birgə bəyanatda Fransa və Böyük Britaniya Hörmüz boğazından bütün ölkələrdən gələn gəmilərin təhlükəsiz keçidinin bərpasının qlobal məsələ olduğunu və Hörmüz boğazında naviqasiya azadlığını dəstəkləmək üçün daha geniş Çoxmillətli Hərbi Missiya yerləşdirməyə hazır olduqlarını bildiriblər.

Fransanın Hörmüz boğazının təhlükəsizliyinə müdaxilə edəcəyini sosial media hesabında açıqlayan Prezident Makron bunları bildirib ki, Fransa Yaxın Şərqə mina təmizləmə vasitələri göndərib: “Bunlara, xüsusən də, iki mina ovçusu daxildir. İki freqat və dəniz patrul təyyarəsi ilə yanaşı, bu vasitələr tərəfdaşlarımızla birlikdə naviqasiyanın tam bərpasına və Oman boğazında yol hərəkəti təhlükəsizliyinin təmin edilməsinə töhfə verməyə hazırdır."

O həmçinin əlavə edib ki, mina təmizləmə gəmilərimiz və müşayiətçilərimiz yerləşdirilib və tərəfdaşlarımızla birlikdə müdaxilə etməyə hazırdırlar: “Fransa tam səfərbərliyə hazırdır və öz alətlərini regiondakı dəyişən vəziyyətə və təhlükəsizlik ehtiyaclarına uyğunlaşdırmağa davam edəcək”.

 Mürtəza