1997-ci ildə milyonlarla koreyalı ölkəni xilas etmək üçün qızıllarını niyə dövlətə təhvil verdi?

Ölkə.az xəbər verir ki, "Space Daily" nəşrinin məlumatına görə, böhrana cavab olaraq ölkədə tarixə düşən misilsiz vətəndaş təşəbbüsü həyata keçirilib.

1998-ci il yanvarın 5-də milli yayımçı KBS-in dəstəyi ilə başlayan kampaniya çərçivəsində dörd ay ərzində 3,5 milyondan çox insan dövlətə könüllü şəkildə ümumilikdə 227 ton qızıl təhvil verib. Məqsəd ölkənin xarici borcunun azaldılmasına dəstək göstərmək idi.

Kampaniyanın ilk günündə banklara 3,3 tondan çox qızıl təhvil verilib. Qısa müddətdə aksiyaya qoşulanların sayı sürətlə artıb. Yanvarın ortalarınadək təxminən 1 milyon nəfər qızıl təhvil verib, kampaniya başa çatdıqda isə iştirakçıların sayı 3,5 milyonu ötərək ölkədəki ev təsərrüfatlarının təxminən dörddəbirinə bərabər olub.

Toplanan qızılın bugünkü qiymətlərlə dəyərinin təxminən 2,13 milyard ABŞ dolları olduğu bildirilir.

Vətəndaşlar banklara yalnız zinət əşyaları deyil, həm də nişan və nikah üzükləri, ailə yadigarları, uşaqlara bir yaş münasibətilə hədiyyə edilən ənənəvi qızıl üzüklər, hərbi təltiflər, qızıl döş xaçları və hətta olimpiya qızıl medallarını da təqdim ediblər.

Koreyanın ilk katolik kardinalı Stiven Kim Su-hvan (Stephen Kim Sou-hwan) da öz qızıl döş xaçını kampaniyaya bağışlayanlar arasında olub.

Qızılın təhvil verilməsi tamamilə ödənişsiz olmayıb. Banklar onu bazar qiymətinə yaxın məbləğə alıblar. Lakin bu məbləğ şəxsi satış zamanı əldə oluna biləcək gəlirdən aşağı olub. Bəzi iştirakçılar isə ümumiyyətlə heç bir ödəniş qəbul etməyiblər.

Toplanan vəsait BVF-nin ayırdığı maliyyə paketinin təxminən 3,7 faizinə bərabər olsa da, iqtisadçılar böhrandan çıxışda əsas rolun genişmiqyaslı iqtisadi islahatlara məxsus olduğunu bildirirlər. Bunlara iri korporasiyaların restrukturizasiyası, iqtisadiyyatın xarici investisiyalar üçün açılması və əmək bazarında aparılan islahatlar daxildir.

Bununla yanaşı, kampaniya cəmiyyətin dövlətə inamını və milli böhran şəraitində birlik nümayiş etdirmək bacarığını göstərən mühüm simvolik hadisə kimi qiymətləndirilir.

Cənubi Koreya BVF-dən aldığı krediti 2001-ci ildə, nəzərdə tutulan vaxtdan təxminən üç il əvvəl tam şəkildə qaytarıb.

Sonrakı onilliklərdə ölkə Asiyanın aparıcı iqtisadiyyatlarından birinə çevrilib. Məhz həmin dövrdən etibarən Cənubi Koreyanın texnologiya şirkətləri qlobal bazarda mövqelərini sürətlə möhkəmləndirib, daha sonra isə Koreya pop mədəniyyəti dünya miqyasında geniş populyarlıq qazanıb.(qaynarinfo)