Braziliyada prezidentliyə namizədi qadınlara pulsuz telefon vəd etdi

Ölkə.az xəbər verir ki, bu barədə Braziliya senatoru və prezidentliyə namizəd Flavio Bolsonaru "X" sosial şəbəkəsində yayımladığı videomüraciətdə bildirib.

Onun sözlərinə görə, mobil rabitə operatorları ilə danışıqlar aparılıb və onlar milyonlarla qadının rabitə xidmətləri ilə təmin olunmasına dəstək verməkdə maraqlıdırlar.

Bolsonaru bildirib ki, seçkiqabağı proqram çərçivəsində mobil telefon almaq imkanı olmayan şəxslərə smartfonların verilməsi də müzakirə olunur.

"Poder360" portalının məlumatına görə, siyasətçi bu təşəbbüsün hansı mənbələr hesabına maliyyələşdiriləcəyini və özəl şirkətlərin layihədə hansı payla iştirak edəcəyini hələ açıqlamayıb.

Onun seçki qərargahı qeyd edib ki, proqram qadınların məsafədən təhsil almasına, iş tapmasına, biznes qurmasına və məişət zorakılığı halları barədə məlumat verməsinə kömək etməyi hədəfləyir.

Braziliya KİV-lərinin hesablamalarına görə, dövlət yalnız sosial yardım proqramlarında iştirak edən 28,7 milyon qadın üçün hər biri 700 real (təxminən 125 ABŞ dolları) dəyərində sadə smartfon alsa, bu təşəbbüs büdcəyə 20 milyard realdan (3,5 milyard ABŞ dollarından) çox xərcə başa gələcək. Bu məbləğə mobil internet paketlərinin ödənişi daxil deyil.(teleqraf)