Rublun ucuzlaşması manata necə təsir göstərə bilər...

“Rusiya Qərb münasibətlərinin gərginləşməsi rublun məzənnəsinə də təsirsiz ötüşmür. Bir ay öncə 1 dollar almaq üçün 73,2 rubl ödəmək lazım idisə, indi bu rəqəm 77,7-dək dəyişib”.

“Ölkə.Az” xəbər verir ki, bunu Milli Məclisin deputatı, iqtisadçı Vüqar Bayramov deyib. O bildirib ki, Rusiya valyutası son 1 ayda 6%-ə yaxın dəyər itirib:

“Hələlik, Moskva birjalarında ciddi volatillik müşahidə olunmasa da, şimal qonşumuzun valyuta bazarındakı proseslər birbaşa Vaşinqtonda qəbul olunan qərarlardan asılı olacaq. Birləşmiş Ştatların Rusiyaya qarşı yeni sanksiyalar paketi tətbiq etdiyi halda bu, rublun məzənnəsindəki zəifləmləri daha da sürətləndirəcək”. 

V. Bayramovun sözlərinə görə, əgər tərəflər gərginliyi diplomatik yollar ilə həll edərsə, o halda rublun məzənnəsi mövcud intervalda dəyişəcək:

“Rusiya Azərbaycanın 2,7 milyard dollarlıq qeyri-neft ixracatında ən böyük tərəfdaşıdır. Neftdən kənar ümumi ixracatın 32%-i şimal qonşumuzun payına düşür. Rublun məzənnəsinin zəifləməsi Azərbaycanın qeyri-neft məhsullarını şimal qonşumuzun bazarlarında bahalaşdıra bilər. Rubl daha böyük dəyər itirəcəyi halda bu, əksər MDB ölkələrinin valyutalarına psixoloji təsir göstərəcək”.

“Moskva birjalarında Vaşinqtondan gələcək xəbərləri izləyirlər, Ağ Evdə isə hələlik sakitlikdir”, - deyə deputat əlavə edib.