İkinci ağıllı kənd nə vaxt salınacaq? - AÇIQLAMA

Azərbaycanda ikinci “Ağıllı kənd” Füzuli rayonu Dövlətyarlı kəndində salınacaq. Kəndin təməli ötən il oktyabrın 17-də Prezident İlham Əliyev tərəfindən qoyulub.Dövlətyarlı kəndində üç, dörd və beşotaqlı olmaqla, ümumilikdə ilkin mərhələdə 450 evin inşası nəzərdə tutulub. Kənddə məktəb və uşaq bağçası tikiləcək, kəndin mərkəzində meydan salınacaq, bazar inşa ediləcək. 

"Ölkə.Az" xəbər verir ki, bunu Milli Məclisin deputatı Vüqar bayramov deyib. O bildirib ki, kəndin yerləşmə coğrafiyası və təbii üstünlükləri nəzərə alınmaqla bir neçə sektor üzrə müəssisələrin yaradılması nəzərdə tutulub:

"Burada kartofçuluq dəyər zənciri üzrə müəssisələrin yaradılması planlaşdırılır. Bu müəssisələrdə 40 daimi, 300-dək mövsümi iş yeri yaradılacaq. Eyni zamanda Köndələnçay su anbarı əsasında ağıllı akvakultura sistemlərinin tətbiqi hesabına balıqçılıq təsərrüfatının qurulması da nəzərdə tutulub. İstehsal olunacaq balıq məhsullarının ixrac ediləcəyi gözlənilir. Kənddə quşçuluq təsərrüfatı da yaradılacaq, ilkin mərhələdə 85 daimi iş yeri olacaq". 

Millət vəkili bildirib ki, kəndin iqlimi və relyef üstünlükləri nəzərə alınaraq turizm infrastrukturunun formalaşdırılması və otel infrastrukturunun yaradılması nəzərdə tutulub:

"Bütün bunlar ilə yanaşı, kəndin ətrafında “Ağıllı kənd” təsərrüfatı sahəsi olacaq. Beləliklə, sakinlərinin kənd təsərrüfatı ilə məşğul olması üçün də imkan yaradılacaq.

Enerji təminatı isə yaşıl və alternativ mənbələr hesabına ödəniləcək. Kənddə xarici investisiya əsasında alternativ enerji həlləri məqsədilə günəş paneli tarlası salınacaq. İnvestisiya layihəsinin gücü 50 meqavat olacaq. Burada da 20 daimi iş yeri yaradılacaq".

"Kəndin salınması ilə bağlı artıq hazırlıq işləri aparılır. Kəndin layihəsi təsdiq olunub. Qısa zamanda inşaat işləri intensivləşəcək", - deyə V. Bayramov əlavə edib.