Bakıda şəhid adına olan parkın ortasında bina tikilir? - Rəsmi açıqlanma
Binəqədi rayonu, M.Ə.Rəsulzadə qəsəbəsində şəhid Ramiz Aboyevin adını daşıyan mədəniyyət və istirahət parkı ilə bağlı narazılıqlar yaranıb.
“Ölkə.Az”ın məlumatına görə, həmin ərazidə yaşayan sakinlər sözügedən parkda atraksionların yığışdırıldığını deyib. Atraksionların öncə təmirlə bağlı aparıldığı deyilsə də, uzun müddət keçməsinə baxmayaraq yenidən quraşdırılmayıb.
Sakinlər burada tikinti işlərinin aparılması üçün hazırlıqlar getdiyini, burada bina tikiləcəyi ilə bağlı söz-söhbətlər olduğunu deyir.
Məsələ ilə bağlı “Ölkə.Az”ın sorğusuna cavab olaraq Binəqədi Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Leyla Quliyeva bildirdi ki, orada heç bir bina tikintisindən söhbət gedə bilməz.
“İstismar müddəti bitmiş atraksionlar yığışdırılıb və parkda hazırda mərhələli şəkildə təmir-bərpa işləri davam edir. Təmir-bərpa işləri yekunlaşdıqdan sonra parkın müasir atraksionlarla təmin edilməsi nəzərdə tutulub”, - deyə icra hakimiyyətinin nümayəndəsi bildirib.
Könül
Ölkə.Az
