2 il ofisiant işləmiş deputatdan etiraz: müştəriləri ən çox narazı salan məqam

Son günlər kafe və restoranlarda xidmət haqqının birbaşa hesaba daxil edilməsi əsas müzakirə obyektlərindən birinə çevrilib. Bəziləri bu barədə müştərilərə əvvəlcədən heç bir xəbərdarlığın edilməməsini doğru hesab etmir. Bəziləri isə istənilən halda ofisianta müəyyən məbləğdə servis üçün haqq ödədiklərini və bunun əlavə ödəniş olduğunu bildirir. Bir çoxları isə həmin məbləğin xidmət heyətinin deyil, restoran sahibinin cibinə getdiyindən şübhə edir. 

Restoran və marketlərlə bağlı Azərbaycanda qaydalar yoxdur.

Azad İstehlakçılar Birliyinin (AİB) sədri Eyyub Hüseynov “Ölkə.Az”a açıqlamasında bildirdi ki, bununla bağlı quruma müraciətlər kifayət qədər çoxdur: “Əgər servis haqqı məbləğini restoran sahibi kassa çekinə daxil edirsə, bu, qanunidir. Burada vacib məsələlərdən biri menyuda bu şərtin göstərilməsidir. Lakin bu, qanunvericiliklə tənzimləmir və mütləq şəkildə menyuda olması tələb olunmur. Ümumiyyətlə, restoran və marketlərlə bağlı Azərbaycanda qaydalar yoxdur. Sadəcə olaraq istehlakçıya öncədən sözügedən haqla bağlı məlumat vermək lazımdır”. 

E. Hüseynovun sözlərinə görə, bəzi hallarda restoranlar servis haqqını kassa çekinə daxil etmir. Bu da qeyri-qanunidir və vergidən yayınmalara yol açır. Bu problem həmçinin Azərbaycanda turizmin inkişafına da mənfi təsir göstərən amildir.

Milli Məclisin deputatı Razi Nurullayev isə “Ölkə.Az”a açıqlamasında dedi ki, bu gün bir çox vətəndaşımız sözügedən problemlə rastlaşır: "Restoran və kafelərin bəzilərində xidmət haqqı 15%, az hissəsində 5%, qalanlarında isə 10% müəyyən olunur. Demək olar ki, müştərilərin 70-80%-i xidmət göstərən şəxslərdən bu servis haqqının onlara çatıb-çatmadığını soruşduqda neqativ cavab alırlar. Bəzilərində isə deyilir ki, rəhbərlik bu məbləği özünün xərcləri üçün götürür. Bu zaman xidmət göstərən personalda müştəri tərəfindən əlavə servis haqqının verilməsi ilə bağlı gözlənti yaranır. 5-10% şəxs bu haqqı ödəyir. Belə halda əlavə ödənilmiş məbləğin həcmi bəzən hesabın 30%-nə çatır ki, bu da böyük rəqəmdir”. 

Məbləğin müdiriyyətin cibinə deyil, xidmət heyətinə ödənildiyi açıqlansa, heç kəs buna etiraz etməz. 

Millət vəkilinin sözlərinə görə, bu sistem bütün dünyada mövcuddur və hesaba xidmət haqqı vurula bilər: “Burada qanunsuz əməl yoxdur. Bu ona görədir ki, müştəriyə xidmət göstərən ofisiant həmin məbləği özünə götürdükdə, arxa hissədə fəaliyyət göstərən personal – aşpaz, qabyuyan və s. xidmət haqqından kənarda qalmasın. Hesaba daxil edilən servis haqqı bir çox ölkələrdə bu səbəbdən yaranıb. Bu məbləğ kassaya daxil edilərək həftənin sonunda burada çalışan bütün xidmət heyəti arasında bölünür”. 

Deputat bu halın turizmə də mənfi təsir göstərdiyini vurğulayıb: “Xaricdən gələn qonaqlar da hesabda xidmət haqqını görür və əlavə xidmət haqqı ödəmirlər. Növbəti dəfə ofisiant həmin turistə qulluq etmək istəmir ki, bu da ciddi narazılıq yaradır”. 

“Bu məsələdə beynəlxalq təcrübə öyrənilməli, yaxşı maarifləndirilmə aparılmalıdır. Antiinhisar və İstehlak Bazarlarına Nəzarət Dövlət Xidməti bununla bağlı təlimat hazırlaya və kütləvi informasiya vasitələrində yayımlaya bilərlər. Məbləğin müdiriyyətin cibinə deyil, xidmət heyətinə ödənildiyi açıqlansa, heç kəs buna etiraz etməz. Restoranların xidmət heyətinin işi əziyyətlidir, mən bunu öz təcrübəmdən bilirəm. Tələbəlik dönəmində 2 il beşulduzlu hoteldə ofisiant işləmişəm. Hazırda etirazın səbəbi bu məbləğin hara getdiyi ilə bağlı yaranan sualdır”, - deyə R. Nurullayev əlavə edib.

Könül
Ölkə.Az