Yayda bu mənzillər bahalaşacaq - SƏBƏBİ AÇIQLANDI

Yay tətili başlasa da, tələbələr kirayə mənzillərdən çıxmağa tələsmirlər. Əvvəlki illərdə tədris ili başa çatan kimi doğma şəhərlərinə və ya rayonlarına qayıdan tələbələr indi kirayədə qaldıqları evləri saxlamağa üstünlük verirlər.

Bəs, niyə tələbələr yay tətilində kirayə mənzilləri təhvil vermir?

Mövzu ilə bağlı Ölkə.az-a danışan Azərbaycan Qiymətləndiricilər Cəmiyyətinin sədri Vüqar Orucun sözlərinə görə, bu bazarda baş verən qiymət artımı ilə bağlıdır.

O deyib ki, tələbələr kirayə mənzilləri təhvil versələr, avqustun sonu, sentyabrın əvvəllərində eyni şəraitə və eyni qiymətə yenisini tapa bilməyəcəklər. Çünki qiymətlər durmadan artır:

“Bu, birinci səbəbdir. İkincisi, yay dövründə mövcud iqtisadi şəraitlə əlaqədar olaraq bir çox tələbə şəhərdə müvəqqəti işlərə düzəlirlər, iş tapıb çalışırlar. Digər tərəfdən, adətən bir mənzildə bir neçə tələbə yaşayır. Onlar kirayə haqqını bölüşdürərək üç ay müddətində də mənzili özlərində saxlayırlar. Bu isə həm bazarda qıtlığın yaranmasına, həm də qiymətlərin artmasına səbəb olur”.

Ekspert vurğulayıb ki, məsələnin psixoloji tərəfləri də var. Onun sözlərinə görə, tələbələr çox vaxt alışdıqları, nəqliyyat əlçatanlığı və infrastruktur baxımından özlərinə uyğun olan kirayə evlərindən könüllü şəkildə imtina etmək istəmirlər:

“Çünki adətən yay dövründə mənzil sahibləri də tələbələrin çıxacağına ümid edərək mülklərini daha yüksək qiymətlərlə yenidən bazara çıxarmaq istəyirlər. Amma tələbə uzun müddət həmin mənzildə qalırsa, uzunmüddətli kirayəçi hüququndan istifadə edərək müqaviləsini eyni şərtlərlə uzada bilir. Hətta bu, mümkün deyilsə, rayonlara getsələr belə, şəhərdəki evlərini boş saxlayaraq avqust-sentyabr aylarında yenidən mənzil axtarışına çıxmamaq variantına üstünlük verirlər”.

V.Orucun fikrincə, yay aylarında işlə yanaşı təcrübə proqramları, müxtəlif kurslar, magistraturaya hazırlıq prosesləri də olur:

“Yəni tələbələrin şəhərdə qalması üçün kifayət qədər əhəmiyyətli səbəblər mövcuddur. Evlərin təhvil verilməməsinin əsas səbəblərindən biri də budur. Öz kvalifikasiya səviyyələrini artırmaq üçün akademik hazırlıqlar və kurslar tələbələr üçün vacibdir. Bu müddətdə onlar təhsildən kənar qalmamaq və digər imkanlardan yararlanmaq üçün şəhərdə qalmağı üstün tuturlar”.

V.Oruc onu da qeyd edib ki, digər tərəfdən, bu hal rayonlarda infrastrukturun şəhərlərlə müqayisədə eyni səviyyədə inkişaf etməməsi ilə də bağlıdır:

“Şəhər həyatına alışan tələbələr üç ay müddətində bundan məhrum olmamaq üçün Bakıda qalırlar. Əyləncə imkanları, ictimai obyektlərin çoxluğu, alışdıqları mühit, dost çevrəsi və ümumilikdə formalaşmış həyat tərzi bu prosesdə mühüm rol oynayır.

Burada ən böyük problemlərdən biri də odur ki, ölkəmizdə, xüsusilə Bakı şəhərində tələbə yataqxanaları demək olar ki, yox səviyyəsindədir. Digər tərəfdən, kirayə mənzil çatışmazlığı tələbələri əllərində olan mənzilləri qoruyub saxlamağa vadar edir. Nəticədə isə bütün bunlar kirayə qiymətlərinin artmasına təsir göstərir”.

Həmidə İbrahimova