Pəncərəni sındırıb içəri girdi, qadınla gördü, vurub öldürdü - Vəzifəli şəxsin oğlu...

Klinikanın közətçisini döyərək qətlə yetirməkdə təqsirli bilinən Həsən Rəhimlinin cinayət işi üzrə təfərrüatlar məlum olub.

"Ölkə.Az" xəbər verir ki, döyüldükdən sonra ölən 58 yaşlı Muraz Nəbiyev “Aristokrat” tibb mərkəzində gözətçi vəzifəsində işləyib.

M.Nəbiyevin halı pisləşəndən sonra o, həkimə aparılıb. Həkimə isə M.Nəbiyevin “infarkt keçirdiyi” deyilib. Həkim müayinəsi zamanı gözətçinin öldüyü məlum olub.

Nərimanov rayonunun polis və prokurorluq orqanlarının əməkdaşları hadisə yerinə yollanıb, müvafiq zəruri tədbirlər həyata keçirilib. Onun infarktdan deyil, həmin gün Həsən Rəhimli tərəfindən döyülməsi və aldığı xəsarətlərdən ölməsi müəyyən edilib.

1988-ci il təvəllüdlü Həsən Rəhimli polis əməkdaşları tərəfindən saxlanılıb.

İş üzrə dindirilimiş Həsən Rəhimli  bildirib ki, ayın 31-də Yeni il bayramını ailəsi ilə birlikdə qeyd etmək üçün nahardan sonra Qəbələ rayonundan Bakıya gəlib. Bayramı qarşıladıqdan sonra gecə saat 1 radələrində evdən çıxıb və yaxın münasibətləri olduğu qadınla yenidən rayona qayıtmalı olub. Mobil telefonunun enerjisi olmadığından tibb mərkəzinin yanından keçəndə sürücüyə avtomobili saxlamasını deyib. Qapını açan olmadığı üçün klinikanın şəhərlərarası nömrəsinə zəng edib. 10 dəqiqəyə yaxın gözləyib. Növbədə olan Namiq Hacıyevə nəsə olduğunu, ya da bayram günü ilə əlaqədar mərkəzdə heç kimin olmamasından istifadə edərək evə getdiyini düşünüb. 

Ümumi giriş qapısının yanındakı pəncərəni sındıraraq içəri daxil olub. Stomatoloq otağında Muraz Nəbiyevi və 50-55 yaşlarında olan bir qadını görüb. Qadına əli ilə işarə edib otaqdan çıxıb getməsini bildirib. 

Muraz üzərinə gəlib nə baş verdiyini soruşduqda yumruqla gicgah nahiyyəsinə bir dəfə möhkəm zərbə vurub. Zərbədən sonra Muraz yerə yıxılmayıb. Ona əşyalarını yığıb klinikanı tərk etməsini bildirib.

Həsən Rəhimli ifadəsinin davamında bildirib ki, pəncərədən içəri daxil olduğuna görə şüşə əllərini kəsib. Əllərini yuyub aşağı düşdükdə klinikanın çöl qapısının yenə bağlı olduğunu görüb. Küçəyə çıxıb onu gözləyən sürücü və qadına 2 dəqiqəyə gələcəyini deyib. Klinikaya qayıdanda stomatoloq otağında Murazın üzü üstə yerdə uzandığını görüb. Yaxınlaşıb onu arxası üstə çevirib. Vəziyyətinin pis olduğunu görüb köynəyinin yaxasını cırıb və ürəyini masaj edib. Murazın əlləri göyərməyə başlayıb. Onu divana uzadıb üstünü örtüb. Artıq öldüyünü başa düşüb. Mühafizə xidmətinin rəisi Mübariz Məmmədova zəng vuraraq iş yerinə gəlməsini xahiş edib. Təxminən yarım saatdan sonra qardaşı İsak atasının idarə etdiyi avtomobillə klinikaya gəlib nə baş verdiyini soruşduqda Murazı vurduğunu bildirib. 

Hadisə yerinə atası gəlib Muraza baxıb öldüyünə əmin olduqdan sonra polisə zəng edib.  

Zərərçəkmiş şəxsin hüquqi varisi Xatirə Bayramova ifadəsində göstərib ki, əri Muraz Nəbiyev 7-8 il olar ki, tibb mərkəzində gözətçi kimi çalışıb. Dekabrın 31-i saat 16:00 radələrində Mübariz Muraza zəng edərək onu işə çağırıb. Halbuki həmin gün növbədə Namiq qalmalı idi. 
Yanvarın 1-də Murazın telefonuna dəfələrlə zəng etdikdən sonra telefona polis əməkdaşı cavab verərək klinikaya gəlməyini xahiş edib və ora çatanda yoldaşının öldüyünü bilib. Sonradan ona Murazın əslində öz əcəli ilə ölməməsi, tibb mətrkəzinin direktor müavini Həsən Rəhimli tərəfindən döyülərək qətlə yetirilməsi məlum olub. 

Məhkəmə prosesi zamanı Həsən Rəhimli əməlinin CM-nin 124-cü (ehtiyatsızlıqdan adam öldürmə) maddəsinə tövsif edilməsini bildirərək ona aşağı həddə cəza təyin edilməsini istəyib. 
Zərərçəkmiş şəxsin hüquqi varisi təqsirləndirilən şəxslə barışdığını və ona qarşı şikayətinin olmadığını qeyd edib. 

Həsən Rəhimli Muraz Nəbiyevin klinikada qadınla intim əlaqədə olmasını zənn etsə də, bu, öz təsdiqini tapmayıb. 

Belə ki, ekspertizanın rəyinə əsasən Muraz Nəbiyev hadisə baş verməmişdən əvvəl cinsi əlaqədə olmayıb. 

Məhkəmə sübutlara qiymət verərək hesab edib ki, Həsən Rəhimli CM-nin 120.1 (qəsdən adam öldürmə) maddəsində nəzərdə tutulmuş cinayət əməlini törədib. Yəni Muraz Nəbiyevi qəsdən həyatdan məhrum edib. 

Sonda məhkəmənin hökmü ilə Həsən Rəhimli 10 il müddətinə azadlıqdan məhrum olunub. 
Hökmdən apelyasiya şikayəti verilib. Bakı Apellyasiya Məhkəməsinin qərarına əsasən CM-nin 120.1-ci (qəsdən adam öldürmə) maddəsi, 126.3-cü (qəsdən sağlamlığa ağır zərər vurma, ehtiyatsızlıqdan zərərçəkmişnin ölümünə səbəb olduqda) maddəsinə tövsif edilib və onun cəzası 9 ilə endirilib.

Natiq
Ölkə.Az