\"Vurmasan kişi deyilsən\" - Bakıda baş verən qətlin təfərrüatı
Paytaxtın Nizami rayonunda tanışını qətlə yetirməkdə təqsirli bilinən Kamil Qurbanovun cinayət işi üzrə təfərrüatlar məlum olub.
"Ölkə.Az" xəbər verir ki, Nizami rayon prokurorluğundan daxil olan xəbərə görə, ötən il yanvarın 9-da saat 17 radələrində 1979-cu il təvəllüdlü Səfərov İmran Mustafa oğlunun paytaxtın Nizami rayonu, Qara Qarayev prospektində yerləşən 124 saylı binanın qarşısında qəsdən öldürülməsi barədə rayon prokurorluğuna məlumat daxil olub.
Cinayət prosessual qanunvericiliyinin tələblərinə əsasən, prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, o cümlədən digər təxirəsalınmaz hərəkətlər yerinə yetirilib.
Aparılmış araşdırmalarla zərərçəkmişin tanışı 1985-ci il təvəllüdlü Qurbanov Kamil Duranxan oğlunun şəxsi münasibətlər zəminində aralarında yaranmış mübahisə zamanı üzərində gəzdirdiyi bıçaqla İmran Səfərova xəsarətlər yetirərək onu qəsdən öldürməsinə əsaslı şübhələr müəyyən edilib.
Faktla bağlı Nizami rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.
Cinayəti törətməkdə şübhəli bilinən Kamil Qurbanov könüllü polisə gələrək təslim olub.
İş üzrə dindirilmiş Kamil Qurbanov bilridib ki, 2012-ci ildən narkotik maddələr qəbul edir. İmran Səfərovla təxminən 5 il əvvəl tanış olub. İmran yaşadığı evin yaxınlığında qəssab işləyib. Sonuncu spirtli içkilərə meyilli olub və içkili vəziyyətdə ətrafdakılarla aqressiv davranıb.
2020-ci ilin yay aylarından arada bir qardaşına məxsus maşınla taksi fəaliyyəti ilə məşğul olub.
Xatırlamadığı tarixdə İmrax sərxoş vəziyyətdə onu "Naxçıvanski" adına Hərbi Liseyə aparmasını xahiş edib. Tanışı üzərində 10 manat pulu olduğunu, 5 manatı isə sonra verəcəyini deyib. Kamil İmranı istədiyi ünvana aparıb gətirib. Sonradan tanışından pulunu istəsə də o, hər dəfə bir bəhanə gətirərək pulunu qaytarmayıb.
Qurbanov ifadəsinin davamında bildirib ki, 2021-ci il yanvarın 9-u saat 14:00 radələrində Qara Qarayev prospekti 124 ünvanında yerləşən anbara gələndə Ələddinlə İmranın oturub spirtli içki qəbul etdiklərini görüb.
Dəvətlərini qabul edib masa arxasında əyləşib. Lakin 2-3 saatdan sonra avtomobili ilə müəyyən işlərinin dalınca getməli olduğundan araq içməyib.
Qonşuluqda yaşayan adını bilmədiyi yaşlı kişi də tikiliyə gəlib. Bir qədər onunla nərd oynayandan sonra həmin şəxs sağollaşıb gedib.
Sərxoş halda olan İmran onlarla araq içmədiyinə görə ona iradını bildirib. Ünvanına nalayiq ifadələr işlədib keçmiş arvadının hesabına yaşadığını deyib.
İçkili olduğuna görə səbr edib onun sözlərinə əhəmiyyət verməyib.
İmran masanın üzrənidəki qabı qaldırıb onu vurmaq istəyəndə Ələddin bunun qarşısını alıb. Sakitləşməyən Səfərov mətbəx bıçağını götürüb onu vurmaq istəyib.
Həmin vaxt Kamil də üzərində olan bıçağı çıxarıb İmranı qorxutmaq istəyib. Bu zaman tanışı "vurmasan kişi deyilsən" deyərək onu təhqir edib. Sözündən bərk əsəbləşib üzərinə gedib.
Qapının yanında sağ əlinə saxladığı bıçaqla İmranın döş qəfəsinə zərbələr endirib. Ələddin və digər şəxs cəld araya girib onları ayırıblar.
Tikilidən çıxıb yaşadığı evə gedib. Yolda bıçağı kolluğa atıb.
Paltarlarını dəyişəndən sonra evdəkilərlə sağollaşıb və polisə gələrək könüllü təslim olub.
Məhkəmə iclasında Kamil Qurbanov ittiham üzrə özünü qismən təqsirli bilərək əməlindən peşman olduğunu bildirib.
Zərərçəkmiş şəxsin hüquqi varisi təqsirləndirilən şəxsə ən ağır cəza verilməsini xahiş edib.
Məhkəmə nəticəyə gəlib ki, Kamil Qurbanovun CM-nin 12.2.2-ci ( xuliqanlıq niyyəti ilə qəsdən adam öldürmə) və 120.2.9-cu ( köməksiz vəziyyətdə olan adamı qəsdən öldürmə) maddələri ilə nəzərdə tutulmuş cinayət əməlini törətməkdə təqsirli olması tam sübuta yetirilib.
Sonda Məhkəmənin hökmü ilə Kamil Qurbanov 17 il 6 ay müddətinə azadlıqdan məhrum olunub.
