Kürdəmirdə arvadını bıçaqlayıb öldürmək istəyən ər hakim qarşısında

Lənkəran Ağır Cinayətlər Məhkəməsində arvadını bıçaqlayaraq öldürməyə cəhddə təqsirli bilinən Rəcəb Bəkirovun cinayət işi üzrə məhkəmə hazırlıq iclası keçirilib.

"Ölkə.Az" xəbər verir ki, hakim Xamməd Nuriyevin sədrliyi ilə keçirilən prosesdə anket məlumatları dəqiqləşdirilib.

İş üzrə məhkəmə baxış iclası fevralın 7-nə təyin olunub.

Xatırladaq ki, hadisə Kürdəmir rayonunun Sığırlı kəndində qeydə alınıb.

Məlumata görə, kənd sakini, 23 yaşlı Dürbəst Nuralı qızı Bəkirova ilə əri, 33 yaşlı Rəcəb Qurban oğlu Bəkirov arasında ailə münaqişəsi zəminində mübahisə yaranıb. Mübahisə zamanı R.Bəkirov arvadına 20 bıçaq zərbəsi vuraraq hadisə yerindən qaçıb. 

Yaralı qadın ətrafdakıların köməkliyi ilə Kürdəmir Rayon Mərkəzi Xəstəxanasına çatdırılıb.

Həkimlər üzərində cərrahiyyə əməliyyatı aparılan yaralı qadının həyatını xilas edə bilib.

Rəcəb Bəkirov şübhəli şəxs qismində tutularaq istintaqa cəlb edilib.