Təklif etdim ki, maşını tərk eləsin, elanlardan sonra... - Məşhurlaşan sürücü
Bu gün sosial şəbəkələrdə yaşlı taksi sürücülərindən birinin fotosu yayılıb. Fotoda sürücünün sərnişinlər üçün avtomobilinə yapışdırdığı elanların çox olması diqqət çəkib.
“Ölkə.az”ın əməkdaşı həmin avtomobilin sürücüsü Aydın Əzimovla söhbətləşib. Əslən bakılı olduğunu deyən 62 yaşlı sürücü qayda-qanuna əməl etməyin tərəfdarı olduğunu söyləyib.
- Sosial şəbəkələrdə fotonuz yayılıb. Yəqin ki, məlumatınız var. Bilmək olarmı, nə üçün o qədər elan yapışdırmısız?
- Təəssüflər ki, sərnişinlər taksi sifariş verməzdən əvvəl təlimatlarla tanış olmurlar, ona görə də çoxsaylı pulsuz xidmətlər tələb edirlər. Həmin xəbərdarlıqlarda çalışdığım taksi şirkətlərinin təlimatları və qanunvericilik əks olunub. Tutaq ki, maskasız gediş qadağandır, 12 yaşa qədər uşaqlar arxa oturacaqda getməlidir, kəmər bağlanmalıdır, marşrutdan yayınmaq mümkün deyil və s. Həmin xəbərdarlıq elanlarını yapışdırandan sonra sərnişinlərlə söz-söhbət demək olar ki, sıfıra enib. Heç problem yaranmır. Bundan əvvəl isə müəyyən söz-söhbətlər olurdu. Xəbərdarlıqları yapışırdıqdan sonra mən rahat işləyirəm, sənişinlər də rahat yol gedir.
- Uzun illərdir sürücülük edirsiniz?
- Xeyr. Mən uzun illər bankda işləmişəm. 40 il bundan əvvəl Politexnikdə (indiki Azərbaycan Texniki Universiteti - ölkə.az) topoqrafiya və geodeziya ixtisasını bitirmişəm. Sovet vaxtı 16 nömrəli hərbi hissədə çalışmışam, SSRİ dağıladan sonra bank işçisi kimi fəaliyyətimə davam etmişəm. Hazırda pensiyaçıyam. Evdə darıxıram deyə, gündə 2-3 saat, bəzən kefimdən aslı olaraq 4-5 saat işləyirəm. Ehtiyaca görə işləmirəm.
- Qayda-qanun sevən adama oxşayırsınız..
- Tamamilə doğrudur. Qadağan olunan yerdə sərnişin gözləmirəm, çalışıram sərnişini o yerdə düşürməyim, yol hərəkəti qaydalarını pozmayım, sərnişin xahiş etsə də, sürət həddini keçməyim və s.
Fikrimcə, yol hərəkəti qaydalarını pozanda bir insan digərinin hüququnu və haqqını tapdalayır.
- Bəs sizin bu addımınıza sərnişinlər necə reaksiya verir?
- Yerli sərnişinlər, xarici vətəndaşlar deyirlər ki, mənim xidmətim xarici xidmət səviyyəsindədir. Belə reaksiyalar mənim üçün çox önəmlidir. Demək olar ki, taksi şirkətinin ən yaxşı sürücülərindən biriyəm. 15-16 xalla ilk yerlərdəyəm. 99 faiz sərnişinlər bu addımımı dəstəkləyir.
- Nə vaxtsa sərnişinlərlə aranızda problem olub?
- Həmin xəbərdarlıqları yapışdırandan sonra bir dəfə problem olub. Onda da vətəndaşa təklif etmişəm ki, maşını tərk eləsin. Qaydalara riayət etmək istəmirsə, bu, onun şəxsi işidir. Amma mən ona görə qaydanı pozan deyiləm.
Tutaq ki, hansısa sərnişin avtomobilə əyləşdikdən sonra deyir ki, “mən tələsirəm, maşını tez sür”. Necə tez sürüm? Bu şəhədə 60-dan yuxarı maşın sürmək olmaz. Xoşuna gəlmirsə, buyur, başqa avtomobil seç.
- Digər sürücülərə nə tövsiyə edirsiniz?
- Tam qaydalara riayət edərək işləyirəm. Ayda 60 manat vergi ödəyirəm. Fərqlənmə nişanım var. Sosial ödənişlər edirəm. Bank hesabım var. Yəqin ki, mənim avtomobilimə əyləşən sərnişin nağd, yoxsa kartla ödəniş etmək barədə düşünmür. Bir çoxlarının əksinə, mən kart ödənişlərini dəstəkləyirəm. Hər bir sürücü bu formada işləməyə çalışsa, sərnişinlərin gedişi rahat olar. Yəqin ki, bu ölkə, az da olsa düzələr (gülür - B.Y).
- (Bir azdan yenə əlaqə saxlayırıq, Aydın bəyin sərnişin götürdüyünü öyrənirik) Bu nömrədə votsapınız varsa, bizə öz fotonuzu yollaya bilərsinizmi?
- İnciməyin, amma sükan arxasında olanda SMS-lərə cavab yazmıram. Ancaq axşam evə gedəndə baxa bilərəm. Sağ olun.
Billurə Yunus
