Xəbərsiz “Milyonçu” - Dünya bu gəncdən danışır - FOTO

Sosial media dünyası son günlər efiopiyalı bir ayaqqabı ustasının ağlasığmaz uğurunu və nümayiş etdirdiyi qeyri-adi davranışı müzakirə edir.

Ölkə.Az xəbər verir ki, Efiopiyada yaşayan Kalu Putik (Kalu Putik) adlı gənc, ayaqqabı təmiri və fərqli geyimlərlə bağlı videolar paylaşaraq qısa müddətdə "Instagram"da 6 milyon izləyici toplayıb. Onun bu qeyri-adi vizual uğurunu görən dünya şöhrətli brendlər reklam əməkdaşlığı üçün dərhal hərəkətə keçiblər. Lakin gənc fenomen ona gələn milyonluq təkliflərin heç birinə cavab verməyib.

Vəziyyət elə bir həddə çatıb ki, "Meta" şirkəti – birbaşa "Instagram"ın rəsmi profili vasitəsilə gənc ustanın videosunun altına şərh yazaraq, onunla əməkdaşlıq etmək istədiklərini bildirib və "Xahiş edirik, "DM" (direkt) bölməsini yoxlayın" qeydini yazıb. "Instagram"ın bu şərhinə 3 milyondan çox bəyənmə gəlsə də, sirli gənc nə rəsmi hesaba, nə də digər şirkətlərə heç bir reaksiya verməyib.

Heç kimi izləməyən, videolarına heç bir açıqlama (şərh) yazmayan və gələn mesajlara məhəl qoymayan bu efiopiyalı gənc, öz sirli tərzi ilə milyonlarla insanın maraq dairəsində qalmağa davam edir.