Çingiz Abdullayev statusunu sildi: "Axmaq-axmaq sual verməyin" - FOTO

Xalq yazıçısı, detektiv əsərlərin müəllifi Çingiz Abdullayevin təyyarədə başına gəlmiş hadisə ilə bağlı paylaşımı müzakirələrə səbəb olub.

Ölkə.Az xəbər verir ki, xalq yazıçısı paylaşımında İstanbul hava limanında nəvəsi yaşında uşağın ağlayaraq nənəsindən su istədiyini bildirib. Ç.Abdullayev nənənin çarəsizcə ətrafa baxdığı zaman onlara bir şüşə su verdiyini deyib. Xalq yazıçısı həmçinin həyatında heç vaxt özünü bu qədər rahat hiss etmədiyini yazıb.

Ç.Abdullayevin bu paylaşımı insanlar tərəfindən birmənalı qarşılanmayıb. Sosial şəbəkə istifadəçiləri ehtiyacı olan insana bir butulka su verməyi böyük yaxşılıq hesab edərək yazıçının bunu paylaşmasını “gülünc” adlandırıblar.

“Sabahdan Çingiz müəllimin bütün əsərlərini alıb, oxuyacam. Belə ürəyi yumşaq yazıçının əsərlərini oxumamaq nankorluqdur”, “Bu böyük hadisə haqqında filmlər çəkilməlidir”, “Adam bir ömür heç kimə kömək etməyib. Bir su verməyi qəhramanlıq sayır” vəs . tipli şərhlər yazılıb.

Haqqında yazılan tənqidlərdən sonra Ç.Abdullayevlə əlaqə saxlayıb onun mövqeyini öyrənməyə çalışdıq. Xalq yazıçısı “Ölkə.Az"-a açıqlamasında artıq paylaşımı sildiyini deyib: “Mən verməmişəm, bunu pozmuşam. Bağışlayın, mən istəmirəm”.

Ç.Abdullayev hələ ona hansısa sual verməməyimizə baxmayaraq aqressiv şəkildə cavab verərək dəstəyi asdı:

“Səhər saat 10-da zəng vurursunuz. Axmaq-axmaq suallar verməyin, ciddi jurnalist olun. Sağ olun”.

Billurə Yunus