“100% turu keçəcəyik deyə bir şey yoxdu”
Ölkə.Az apasport.az-a istinadən xəbər verir ki, "Qarabağ"ın icraçı direktoru Əmrah Çəlikəl "Samtredia" ilə Çempionlar Liqasının II tur cavab oyunundan sonra sualları cavablandırıb.
- Tiflisdən hansı hisslərlə ayrılırıq?
- Çox yaxşı qalibiyyət aldıq. Sevincliyik. Rəqibimiz də sabah bilinəcək.
- Fərqi varmı, "Şerif", ya "Kukesi"?
- Oynamamaq kimi bir şansımız olmadığı üçün rəqibin də bir fərqi yoxdu. Düzdü, hamı "Şerif"i gözləyir, ancaq sabah dəqiq bilinəcək.
- "Qarabağ"a münasib rəqib düşməsi fikri ilə razısınız?
- Xeyr. Bu, Çempionlar Liqasıdı. Burda zəif komanda yoxdu. Əgər bir komanda ölkəsində çempion olubsa, deməli müəyyən gücə sahibdi. Ona görə də heç bir rəqibin kiçildilməsinin heç kimə xeyri olmayacağını düşünürəm. Bu barədə sizdən də dəstək gözləyirəm. Zəif rəqib düşüb, zəif oyunçudu kimi yazılar motivasiya itkisindən başqa bir işimizə yaramayacaq.
- Gəlin razılaşaq ki, ötən illə müqayisədə kifayət qədər zəif rəqiblə qarşılaşacaqsınız...
- Bu, ancaq bizi sevindirə bilər. Ancaq 100% turu keçəcəyik deyə bir şey yoxdu.
- Nikaraqualı futbolçunun adı hallanır "Qarabağ"la...
- Hazırda danışıq apardığımız yeni futbolçu yoxdur.
- Yeni transferlər matça start heyətində başladılar. Necə təsir bağışladı onların çıxışı?
- Bu barədə Qurban müəllimin fikri əsasdı.
- Yeni futbolçu ilə danışmadığınızı dediniz, bəs köhnələrdən bir irəliləyiş varmı?
- Onlar davam edir. Nəticələnməmiş nəsə demək düzgün olmaz.
- Rəşad Sadıqovun yeri çoxmu görünür meydanda?
- Mənim bir futbol azarkeşi kimi həmişə gözüm axtarır meydanda.
