Mətn ölçüsü:
  • 100%

20-ci əsrin ən çox sevilən qatili

1969-cu ilin iyul ayının sonlarında 8 müəmmalı qətl hadisəsi baş verdi. Cinayət vəhşicəsinə törədilmişdi. Amma qatil cinayətdən sonra qurbanlarının qanı ilə iz də buraxmışdı. Qurbanlar arasında məşhur oskarlı rejissor Roman Polanskinin 8 aylıq hamilə arvadı Şeron Teyt-Polanski və onun dostları da var idi. Bu cinayətləri kim törətmişdi? Məqsəd nə idi? Cinayətkar həbs edildimi?

Ölkə.Az bu gün 20-ci əsrin ən qəddar qatili Çarlz Menson haqqında yazını təqdim edir.

Bir müddət sonra polis əməkdaşları Çarlz Mensonun başçılıq etdiyi və “ailə” adlandırılan banda ilə sıx əlaqəsi olan bir neçə nəfəri həbs etdi. Həbs edilənlər ölüm hökmünə məhkum edilsə də, sonradan bu cəza ömürlük həbslə əvəz edildi. Baş verən hadisə mətbuat tərəfindən şişirdildi və Menson dünyanın məşhur fiquruna çevrildi. 

Nuel Emmons Çarlzla bu hadisələrdən bir müddət əvvəl tanış olmuşdu. Nuel avtomobil oğurladığı üçün həbsxanada yatmışdı. Amma onların ilk tanışlığı qısamüddətli idi. İkinci dəfə onların yolu 1960-cı ildə, Emmons yenidən həbsxanaya düşəndə kəsişir. Bu hadisədən sonra Emmons foto jurnalistika ilə məşğul olmağa başlayır. O, bir neçə Amerika və Avropa jurnalı ilə əməkdaşlıq etməyə başlayır. 1979-cu ildə Emmons ömürlük həbsdə olan Mensonla görüşür və ondan müsahibə alır. Nuel və Çarlzın mütəmadi söhbətləri kitab halında çap edilir.

Çarlz Menson-qatil yoxsa peyğəmbər?

“Müdrik insan heç vaxt obıvatel qarşısında öz müdrikliyini göstərmir. Çünki insanlarda yaxşı nəyinsə olmadığını başa düşür. Sən onlara xeyirxahlıq göstərirsən, onlar isə bunu zəiflik kimi qəbul edir. Sən onlara mədəniyyət göstərib şərəfli davranırsan, onlar isə səni aldada biləcəyi avara hesab edirlər. Geriyə baxma, geyin, pulunu götür, küçəyə çıx, avtobusu gözlə və bir də geri qayıtma”-Çarlz Menson belə deyirdi.

Menson 1971-ci ilin 30 aprel tarixində ən ağır cəzaya, ölüm cəzasına məhkum edilir. Amma sonradan ölüm hökmü ciddi rejimli həbsxanada təkadamlıq kamerada ömürlük həbs cəzası ilə əvəz edilir. Ən qəribə və dəhşətli fakt odur ki, Menson həyatı boyu heç kəsi qətlə yetirməyib. Bu zaman belə bir sual ortaya çıxır. Niyə Amerika öz vətəndaşını belə qəddar cəzaya məhkum etdi? Niyə onu ABŞ tarixinin ən təhlükəli qatili hesab edirlər?

Həyatı

Çarlz Menson həyatının ilk həftəsi həqiqətən də “heç kim” idi. Onun 16 yaşlı anası Ketlin Meddoks yeni doğulmuş övladına ad da verməmişdi. Ohayo ştatının Sinsinnati ictimai xəstəxanasında 1934-cü ilin 12 noyabr tarixində dünyaya gəlib. Həkimlər onu “adsız Meddoks” adlandırırdılar. Çarlz adını isə anası ona doğuşdan 7 gün sonra qoyur. Menson familiyasını isə ona atalığı, Ketlinin ailə qurduğu kişi verir. Qısacası, onun anası nə normal qadın, nə də normal ana idi. Ketlin rahatlıqla körpəsini qısa müddət ərzində tanış olduğu dostlarının yanına ataraq bir neçə günlük yoxa çıxa bilərdi.

Hətta bir dəfə Ketlin oğlunu bir stəkan pivəyə satmağa da cəhd göstərib. Çarlz beş yaşı olanda anormal qohumlarının ixtiyarına verilir. Çünki Ketlin 1939-cu ildə silahlı qarət cinayəti törətdiyi üçün 5 il müddətinə azadlıqdan məhrum edilir. Hadisə Mensonun vəziyyətini daha da pisləşdirdi. Çarlini həddən artıq zərif sayan doğma dayısı ilk dərs günündə oğlanı qız paltarında məktəbə göndərir.

Çarlz 8 yaşına çatanda anası həbsdən azad edilir. 1942-ci ildə onun həyatı yeni cəhənnəm dairəsinə qədəm qoyur. Onun həyatı çirkli motel otaqları, daim sərxoş olan anası və müntəzəm olaraq onun yanına gələn yad kişilərdən ibarət idi. 1947-ci ildə Ketrin oğlundan qurtulmaq qərarına gəlir və onu dövlətin himayəsinə verir.

Onun yeni evi azyaşlı oğlanlar üçün islah müəssisəsi-Gibo tərbiyə evi idi. Burada Çarli artıq Çarlz Mensona çevrilir. Artıq Gibo tərbiyə evində müəllimlər Çarlzın psixi pozğunluğu olduğunun şahidi olurlar. Tez-tez əsəbi, təhsilə qarşı laqeyd hərəkətlər nümayiş etdirir. Oğlan anasının yanına qayıtmağa cəhd göstərir, tez-tez müəssisədən qaçırdı. Qaçanda isə Ketlinə çatmaq üçün pul oğurlayır və istənilən nəqliyyat vasitəsini qaçırırdı. Amma anası hər dəfə onu geri qaytarırdı. 17 yaşında doğma xalası onu öz himayəsi altına götürmək istəsə də, məhkəmə prosesinə və komissiyanın iclasına bir ay qalmış Çarlz məhkumlardan birinin boğazına ülgüc dirəyərək onu zorlayır. Bu hadisədən sonra Mensonu rəsmi olaraq təhlükəli kateqoriyasına aid etdilər və növbəti islah müəssisəsinə yolladılar.

Yeniyetmə açıq-aşkar aqressiya və liderlik qabiliyyəti nümayiş etdirir, digər məhkumları təhqir edir və zorlayırdı. 18 yaşı tamam olanda azadlığa çıxır. Amma bu azadlıq qısamüddətli idi.

Növbəti 13 il ərzində Çarli bir neçə dəfə həbs edilir. Məhkumluq səbəbi isə kiçik qanun pozuntuları, avtomobil oğurluğu, sutenyorluq və ştatı fahişə biznesi məqsədi ilə qanunsuz keçmələr olurdu. Həsbxanada olmadığı müddətdə Menson iki dəfə ailə qurur. Hər nikahdan onun bir övladı var. Bir dəfə Çarlz poçt qutusundan 37.50 dollarlıq çek oğurladığı üçün 7 il azadlıqdan məhrum edilir.

Həbsdə olduğu müddətdə Menson sayentologiya ilə maraqlanır, məhkumlardan birindən gitarada çalmağı öyrənir və mahnı yazır. 1967-ci ildə azadlığa çıxdığı vaxt həbsxana işçisi sözün əsl mənasında onu itələyib çölə çıxarır. Bu dövrdə Mensonun həyatının böyük hissəsi xüsusi müəssisələrdə keçmişdi və o, azadlıqda nə edəcəyini bilmirdi.

Dünyada 1960-cı illərin sonu, “çiçək övladları” erası idi. Menson da ümumi abu-havaya qoşularaq San-Fransiskoya, hippi qruplarından birinin yanına yollanır.

Burada o, Meri Brannerlə tanış olur. Meri özünü quru adlandıran Mensonun “sehrli gücü” ilə ilk tanış olan insandır. Çarli özünü MEN SON, yəni “tanrının oğlu” adlandırırdı. Meri isə ona inanırdı. İlk uğurundan qanadlanan Çarlz və onun yeni rəfiqəsi avara həyat tərzi sürməyə başlayırlar. Onlar özləri kimi cəmiyyət tərəfindən tərk edilmiş gənclərlə tanış olaraq yeni kiçik “ailə”lərinin cərgələrini doldurmağa başlayırlar.

“Ailə” tezliklə gənc kişi və qadınlardan ibarət çoxsaylı kommunaya çevrilir. Qohumları və cəmiyyət tərəfindən tərk edilmiş, bezmiş və evdən qaçmış gənclər Çarlz Mensonun, onun bacı və qardaşlarının isti qollarında özlərinə təskinlik tapırdılar. “Ailə”nin bütün üzvləri vaxtilə Hollivudun vestern filmlərinin çəkiliş meydançası kimi istifadə edilən “Spen” rançosunda yaşayırdı. Gənc və azad hippilər rançoda qayğısız həyat tərzi sürür, mahnı oxuyur, sekslə məşğul olur, narkotik maddələrdən istifadə edir, təbiət ananı tərənnüm edirdilər.

Kommunada qadınlar özlərini “Çarlinin qızları” adlandırır, “ümumi” uşaqlar dünyaya gətirir, çox vaxt da doğduqları uşağın bioloji atasının kim olduğunu bilmirdilər. Qızlardan biri deyirdi: “Biz ona aid olduğumuzu düşünür və özümüzü Çarlinin qızları adlandırırdıq. Amma Çarli praktiki olaraq hər gün deyirdi ki, biz hamımız insanıq və ancaq özümüzə məxsusuq. Amma mən yenə də ona məxsus olduğumu düşünürdüm. Çarli hər birimizlə cinsi əlaqəyə girirdi. Mən onun sevgi naminə sekslə məşğul olduğunu anlayana qədər onu qısqanırdım. Bu yolla o, bütünlüklə özünü bizə həsr edirdi. Biz, Çarlinin qızları bir-birimizlə də sekslə məşğul olurduq. Onun üçün edə bilməyəcəyim heç nə yox idi. Mən əksimi xoşlayıram, danışdığım əksim, surətim isə Çarlz Mensondur”.

Menson xarizması hesabına kommunanın sıralarını yeni üzvlərlə doldururdu. O, üzvlərə yeni ad, qan və öz sevgisini bəxş edirdi. Bir dəfə rançoya baykerlər dəstəsi hücum çəkdi və kommunanı dəhşətli qisasla hədələdilər. Çarli təkbaşına “Ailə”nin müdafiəsinə durdu və qaniçən baykerlərə qardaş və bacıların həyatı qarşılığında öz həyatını qurban verməyi təklif etdi. Baykerlər bu sözdən sonra heç nə demədən rançonu tərk etdilər. Bu hərəkətlərlə Menson nüfuzunu möhkəmləndirirdi. Buna cavab olaraq kommunanın üzvləri sevimli Çarliyə görə hər şeyə razı idilər. Qardaş və bacılar qidalanmaq üçün müxtəlif üsullarla pul qazanırdılar. Bəziləri zibil qablarında eşələnir, bəziləri oğurluqla, bəziləri isə fahişəliklə məşğul olurdu. Hər bir üzv “ailə”nin rifahı üçün, “ailə” də onun rifahı üçün çalışmalı idi.

Çarlz “ailə”ni Kaliforniya ştatı, ABŞ milli parkının yaxınlığındakı Ölüm Vadisi tərəfdə yeni düşərgəyə köçürmək barədə düşünürdü. Kommuna liderinin iddiasına görə, burada onlar apokalipsislə qarşılaşacaqdılar. Menson tez-tez irqlər arası müharibədən danışırdı. Onun fikrinə görə, qaradərililər mövcud rejimə qarşı üsyana qalxacaqdılar və bütün ağ irqi məhv edəcəkdilər. Amma qaradərililər yeni dünyanı müstəqil surətdə idarə etmə iqtidarında olmadıqları üçün Çarlz Mensondan kömək istəyərək, onu özlərinin Ağası elan edəcəkdilər.

Gənclərin bu axmaq fikri necə ciddi qəbul etdikləri naməlumdur. Amma növbəti hadisələr göstərdi ki, Mensonun bacı və qardaşlarının şüuru üzərində hakimiyyəti sərhədsiz idi. “Helter Skelter”, yəni irqlər arası müharibə başlamadı və Çarlz nüfuzunu itirməmək üçün müharibənin başlamasını sürətləndirmək qərarına gəlir. 8 avqust axşamı o, qrupun dörd üzvünü yanına çağırır. “Teks” adlı gənc və daim rançoda yaşayan üç qız onun yanına gəldilər. Çarlz sakit və əmin səslə dedi: ““Helter Skelter”-in vaxtı yetişib”.

Cinayətlər

1969-cu ilin 9 avqust tarixində Syelo Drayvdakı 10050 nömrəli evə adəti üzrə gündəlik işləri ilə məşğul olmağa xidmətçi qadın daxil oldu. O, həqiqətən dəhşətli mənzərənin şahidi olur. Evin qabağındakı gölməçədə iki qanlı cəsəd var idi. Bu, bir neçə gün bu evdə qonaq qalan kişi və qadının meyidi idi. Qarajın yanına park edilmiş avtomobildə də gənc bir adamın meyidi var idi. Evin içində də iki nəfərin meyidi tapıldı. Gənc kişi və ev sahibəsinin meyidi qonaq otağında qanlı gölməçədə tapılmışdı.

Giriş qapısına qanla qısa olaraq “Pig” yazılmışdı (ingiliscədən tərcümədə donuz deməkdir). Hadisə yerinə gələn polis əməkdaşları qurbanların şəxsiyyətini müəyyənləşdirdi. Bu, məşhur Hollivud rejissoru Roman Polanskinin həyat yoldaşı Şeron Teyt idi. Şeron hamiləliyinin 9-cu ayında idi. Qurbanlardan digəri məşhur bərbər Cey Sebring idi. Qəhvə maqnatının qızı Ebiqeyl Folqer, torpaq sahibi Voytsex Frikovski Roman Polanskinin dostu idi. Beşinci, təsadüfi qurban 18 yaşlı Stiven Perent axşam vaxtı dostu Uilyam Qarretsonun yanına gəlmişdi. Uilyam Slyelo Drayvdakı evin xidmətçisi idi.

Heç nədən xəbəri olmayan Uil keşikçilər üçün nəzərdə tutulmuş evdə həbs edildi və əsas şübhəli şəxs sayılırdı. Amma növbəti gün baş verən hadisə Uilyamın üzərindən şübhələri dağıtdı. Çünki qanlı cinayətlər davam edirdi. Bu dəfə kiçik dükanlar şəbəkəsinin sahibi, imkanlı cütlük La-Byanka Leno və Rozmari növbəti qurbana çevrildilər. Qatilin imzası eyni idi: boğulma, çoxsaylı bıçaq zərbələri və divarlara “RİSE, DEATH TO PİGS” (donuzlara ölüm) və soyuducunun üstünə “HEALTER SKELTER” yazılmışdı. “WAR” sözü isə Lenonun qarnının üstünə cızılmışdı.

Polis uzun müddət motiv və versiyalar üzərində baş sındırdı. Amma 8 və 9 avqust tarixləri arasında baş vermiş cinayət qurbanları arasında heç bir məntiqi əlaqə yox idi.

Bu dəfə də təsadüfi hadisə cinayətin üstünü açmağa kömək etdi. Bir həbsxanada məhkum Virciniya Qrehem həbsxana müdiri ilə şəxsi görüş tələb edir. Virciniya iddia edirdi ki, onun kamera yoldaşı qız Şeron Treydi qətlə yetirdiyini etiraf edib. Bundan başqa qız bəzi ikrahedici etiraflar edir. Məsələn, qətldən sonra qurbanın əlindəki qanı yaladığını bildirir. Təbii ki, müstəntiqlər bu imkandan istifadə edərək yeni şübhəli qatil ilə söhbət etməyə can atdılar. Bu qatil qadın 21 yaşı yenicə tamam olmuş, “Sedi” ləqəbli Syuzan Denis Atkins idi. Syuzan Denis hippi qrupu tərəfindən kənd təsərrüfatı texnikasının yandırılması işində şahid kimi iştirak edirdi. Qız özü bu qrupa daxil idi. Qrup özünü “Ailə” adlandırırdı və “Mensonun ailəsi” kimi məşhur idi.

“Sedi”-nin ifadələri sayəsində polis əməkdaşları hadisələrin təfərrüatı ilə tanış oldular və cinayətin iştirakçılarını müəyyən etdilər. “Treyd-La-Byanka”adlı məhkəmə işi start götürdü.

Məhkəmə yumşaq dillə desək, qalmaqalla başladı. Menson birinci dindirilməyə başının yarısı qırxılmış formada gəldi. “Ailə”nin bütün üzvləri isə alınlarında etiraz əlaməti olaraq xaç çəkmişdilər. Dinləmələrə üç gün qalmış Çarlinin vəkili yoxa çıxdı. 6 ay sonra vəkilin parça-parça edilmiş meyidi tapıldı. Əvvəlcə müttəhim kürsüsündə Mensonla yanaşı Çarlz Uotson, Patrisiya Krenuinkel, Syuzan Denis Atkins, Lesli Van Huten və Linda Kasabian oturmuşdu.

Linda polislə fəal əməkdaşlığa başladı və məhkəmədə ittihamın əsas şahidi kimi ifadə verdi. Dinlənilmə prosesində “Treyd- La-Byanka” işinə üstü açılmamış Hari Hinman və Donaldın “Şorti” kommunasının üzvü Şinin qətl hadisələri də əlavə edildi. Müttəhimlər kürsüsünü isə Meri Branner, Brüs Devis və Stiv Qroqan doldurdu.

Prokuror Vinsent Bulyozi üçün Mensonu ittiham etmək çox çətin idi. Çünki qətl vaxtı lider bacı və qardaşların yanında olmayıb. “Ailə” üzvləri isə liderləri üçün özlərini qurban verməyə hazır idilər. Amma bütün bunlar Çarli və digər müttəhimləri dəhşətli ölüm cəzasından xilas etmədi. Ölüm hökmü 1972-ci ildə ömürlük həbs cəzası ilə əvəz edildi.

Bütün müttəhimlər bu günə qədər də cəzasını çəkir. Hər bir məhkum ən azı 20 dəfə şərti-azadlıq barədə müraciət etsə də, bu müraciətlər cavabsız qalıb. 2009-cu ilin 9 sentyabr tarixində Syuzan Denis Atkins 30-cu dəfə rədd cavabı aldıqdan sonra beyin xərçəngindən həbsxana xəstəxanasında dünyasını dəyişir. Həbsdə olduğu müddətdə Syuzan xristianlığı qəbul edir və iki dəfə ərə gedir. Eyni zamanda “Child of Satan, Child of God” (İblisin övladı, Tanrının övladı) adlı avto bioqrafik kitab yazır.

Meri Branner 1977-ci ildə azadlığa çıxır. O, azadlığa çıxan kimi adını dəyişir, Mensondan olan oğlunu da götürərək naməlum istiqamətdə yollanır. Həbsdə olan “Teks” evlənir, uşaq sahibi olur, Tanrıya inanır və hətta rahib olur.

Çarlz Menson Kaliforniya ştatının Korkoran şəhərindəki həbsxanada cəzasını çəkir. Bu müddət ərzində o, populyarlığını itirməyib. İşləri də pis getmir. Çarlz jurnalistlərə və məşhur mətbuat orqanlarına müsahibə verir, minlərlə fanatı ona məktub yazır. Hər həftə sonu isə gənc bir qız onu ziyarət edir. Menson hələ də fəlsəfi-ekoloji axın sayılan“ATWA»-nın (Hava, ağac, su, heyvanlar) lideridir. Onun internet səhifəsi və dünyada çoxsaylı fan-klubları var.

Dünyanın ən məşhur rock ifaçılarından biri Merilin Menson öz təxəllüsünü məhz Çarlz Mensondan ilhamlanaraq seçib.

Çarlzın mahnılarını bir çox rok-qrupları ifa edir...

 

Hikmət
Ölkə.Az