256 il yaşayan adam
“Ölkə.Az” bu gün planetin ən uzunömürlü insanı barədə məlumat verəcək.
Li Çinq Yuen Şərq əlbəyaxa döyüş ustasıdır və uzun ömür araşdırmaçısı kimi məşhurdur. Bu şəxs nağıl və ya əfsanə yox, real insandır. Nüfuzlu “Time” jurnalının üz qapağına da çəkilib. Planetin ən uzunömürlü insanı uzunömürlülüyün sirrini köpək, göyərçin və tısbağa üçlüyündə olduğunu bildirmişdi. Li Çinqin həyatı ilə tanış olaq.
Bəs 256 il yaşayan Li Çinq-Yueni kim kəşf edib? 1930-cu ildə dərc edilən “New York Times” qəzetində gedən bir məqalədə bu barədə məlumat verilir. Məqaləyə əsasən, “Chengdu” universitetinin professoru Vu Çunq Çin İmperatoru Li Çinqi 1827-ci ildə 150-ci ad günü münasibətilə təbrik edir. Bu barədə imperiyanın hökumət qeydiyyat kitabçalarında məlumat var. Sonradan professor başqa sənədlər tapır və bu sənədlərdə Linin 1877-ci ildə 200 yaşını qeyd etdiyi bildirilir. 1928-ci ildə “New York Times” müxbiri Linin qonşusu qoca kişilərlə görüşür. Qocalar bildirir ki, Li onların çoxunun babasının dostu olub.
Li Çing-Yuen 1736-cı ildə anadan olduğunu bildirsə də, sənədlərdə onun doğum tarixi 1677-ci il kimi göstərilib. Bitkilər üzrə mütəxəssis, döyüş ustası Li 1933-cü ildə dünyasını dəyişib. Yuxarıdakı doğum tarixlərini nəzərə alsaq, onun ya 197, ya da 256 yaşı olub. Hər iki halda da Li dünyanın ən uzunömürlü insanıdır.
Məlumata əsasən Li Çinq-Yuen 1677-ci ildə Çyi Jianq Hsie əyalətinin Siçuan kəndində anadan olub. Həyatı boyu dağların ətəklərindən bitki toplayıb və uzunömürlülüyün sirrlərini araşdırıb.
Li Çinq 10 yaşından bitkilərlə maraqlanmağa başlayır. Yaşadığı kəndin yaxınlığındakı dağların arasındakı otları və bitkiləri toplayır, onları tədqiq edir və ömrü uzatmağın yollarını öyrənib.
40 il boyunca “reishi” göbələyi, üzüm, yabanı ginseng, he şou vu, Gotu kola və düyü şərabı kimi bitkilərlə qidalanır.
1749-cu ildə 71 yaşlı Li döyüş sənətləri müəllimi kimi Çin ordusuna qatılır. Bəzi məlumatlara görə Li 23 dəfə evlənib və 200 övladı olub.
Linin tələbələrindən birinin verdiyi məlumata görə, Li Çinq bir dəfə 500 yaşlı bir çinli ilə rastlaşıb. Li Çinq bu adamdan Çiqonq bədən hərəkətləri və qidalanma sirrləri əldə edib.
Li Çinq 256 yaşında Çinin Szeçuan əyalətində 1933-cü ilin 6 may tarixində vəfat edib. Şahid ifadələrinə görə ölüm yatağında onun son sözləri bu olub: “Bu dünyada etməli olduğum hər şeyi etdim”.
Hikmət
Ölkə.Az
