42 min uşaq I sinfə getmək üçün sənəd verib

42 min uşaq I sinfə getmək üçün sənəd verib
19:17
21.08.2017
16
Ölkə
A
Paytaxtın ümumi təhsil məktəblərində 2017-2018-ci dərs ili üçün I sinfə şagird qəbulu davam edir.

Bakı Şəhər Təhsil İdarəsindən (BŞTİ) "Ölkə.Az"a verilən məlumata görə, Avqustun 21-nə olan məlumata əsasən, elektron sistem vasitəsilə BŞTİ-nin tabeliyindəki ümumi təhsil məktəblərinin I sinfinə qəbul üçün yerləşdirilən sorğular əsasında 42 274 (saat 12:30) uşağın sənədi məktəbə təqdim edilib. 

BŞTİ-nin nəzdindəki ümumi təhsil məktəblərinə I sinfə şagird qəbulu valideynin (qanuni nümayəndənin) elektron ərizəsinin mektebeqebul.edu.az saytında qeydiyyatı yolu ilə həyata keçirilir. 15 mart-15 sentyabr 2017-ci il tarixlərini əhatə edən elektron ərizələrin qeydiyyatı prosesində valideynlər məktəbi, təlim dilini və müəllimi seçməlidirlər.

Valideynlər övladlarının sənədlərini sentyabrın 18-dək məktəbə təqdim etməlidirlər. Məktəb tərəfindən sənədlər hər həftənin V-VI günləri (bayram günləri istisna olmaqla) saat 11:00-dan 16:00-dək qəbul edilir. Sənədlər qəbul olunduqdan sonra valideynə (qanuni nümayəndəyə) bu barədə qəbz verilir.

Hər hansı səbəbdən özü elektron qeydiyyatdan keçə bilməyən şəxs Bakı şəhərinin hər inzibati rayonunda I sinfə elektron sistem vasitəsilə ərizələrin qeydiyyatı məsələlərində vətəndaşlara kömək məqsədilə 50 məktəbdə yaradılmış Alternativ Qeydiyyat Mərkəzlərinə müraciət edə bilər. I sinfə şagird qəbulu prosesində qeydiyyat və sənəd qəbulu prosesində araşdırmaya ehtiyac olan məsələlərin həlli üçün Bakı şəhəri üzrə 6 ümumi təhsil müəssisəsində Apelyasiya Komissiyası fəaliyyət göstərir.

Qeyd edək ki, BŞTİ-nin tabeliyindəki ümumi təhsil məktəblərinə 6 yaşı cari ilin sentyabrın 16-dan dekabrın 31-dək tamam olacaq xüsusi istedada malik uşaqların I sinfə qəbulu üzrə müsabiqə iyunun 20-dən iyulun 10-dək aparılıb. Müsabiqədə iştirak edən 1769 uşaqdan 1471-i uğur qazanıb.

BŞTİ-nin nəzdindəki 287 nömrəli “Zəkalar” liseyi və 160 nömrəli Klassik Gimnaziyaya I sinfə qəbul üzrə müsabiqə isə iyunun 6-dan 30-dək keçirilib. Müsabiqədə iştirak edən 483 uşaqdan 402-si lisey və gimnaziyaların I sinfinə qəbul olub.

ŞƏRH YAZ
0

Bakıda yarımçıq tikililərin aqibəti necə olacaq? — VİDEO

Bakıda yarımçıq tikililərin aqibəti necə olacaq?
23:36
22.11.2017
577
Ölkə
A
Paytaxtın bir çox ərazisində elə hündürmərtəbəli binalar var ki, uzun müddətdir tikintisinə başlanılsa da, işlər hələdə yekunlaşdırılmayıb. Bu isə həmin binadan ev almaq üçün ödəniş edən vətəndaşları aldatmaqla yanaşı şəhərin görünüşünə də xələl gətirir. Mütəxəssislər qanunvericilikdə boşluq səbəbindən bu prosesə nəzarətin mümkün olmadığını bildirir.

Ölkə.Az bildirir ki, belə hündürmərtəbəli binaları paytaxtın müxtəlif ərazilərində görmək mümkündür. Bu isə sözügedən binalardan mənzil almaq üçün ödəniş edənləri çətin vəziyyətdə qoymaqla yanaşı şəhərin görünüşünü də korlayır. Əmlak məsələləri üzrə ekspert Nüsrət İbrahimovun sözlərinə buna səbəb qanunvericilikdə boşluğun olmasıdır.

Nüsrət İbrahimov bildirir ki, əslində hər bir tikinti başlanarkən onun ''layihə smeta'' dəyəri hazırlanmalı və orada tikintidə istifadə ediləcək materiallar, texnika, işçi qüvvəsi, başlama və bitmə vaxtı dəqiq göstərilməlidir. Məcburiyyət olmdağından əksər şirkətlər bu sənədi hazırlatdırmır. Amma bir sıra ölkələrdə bu məsələ ilə bağlı uğurlu təcrübə mövcuddur.

Məsələ ilə bağlı Dövlət Şəhərsalma və Arxitektura komitəsindən verilən açıqlamaya görə, hazırda qüvvədə olan qanunvericiliyə əsasən icazə verildiyi halda tikinti 3 il ərzində başlamırsa onu ləğv etmək mümkündür. Yarımçıq qalmış tikililərin sahibkarları ilə isə yalnız müvafiq icra hakimiyyətlərinin əməkdaşları tərəfindən şifahi formada danışıq aparılır. /xezerxeber.az

 

ŞƏRH YAZ
0

Bakı sakinləri üçün həyəcan təbili — EHTİYATLI OLUN!

Bakı sakinləri üçün həyəcan təbili
21:09
22.11.2017
4829
Ölkə
A
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Bakıda və Abşeron yarımadasında müşahidə olunan toz-dumanı ilə bağlı hər üç saatdan bir müşahidələr aparır.

Bu barədə “Ölkə.Az”a nazirliyin mətbuat xidmətindən məlumat verilib. Bildirilib ki, havanın keyfiyyətini ölçən avtomatik və stasionar monitorinq stansiyalarından alınan məlumata görə, Bakı və Abşeron yarımadasında tozun miqdarının sanitar normadan yuxarı olduğu qeydə alınıb.

Məsələ ilə əlaqədar mütəxəssislər həyəcan təbili çalırlar. Tibb elmləri doktoru, professor, Respublikanın əməkdar həkimi, Əməkdar elm xadimi, ATU-nun Terapiya kafedrasının professoru, Baş allerqoloq Cəbrayıl Məmmədov “Ölkə.Az”a açıqlamasında bildirib ki, tozlu hava bütün insanlara təsir edə bilər. Onun sözlərinə görə, belə hava əsasən bronxial astma xəstəliyi olan insanlara mənfi təsir göstərir.

“Əsasən bronxial astma xəstəliyi olan insanlara mənfi təsir göstərə bilər. Belə insanlar həmişə özləri ilə dərmanlarını gəzdirirlər. Onlar dərmansız qala bilmirlər. Belə havalarda həmin xəstələrin tutmaları artır. Onlar özlərini narahat hiss edən kimi dərmanlarından istifadə etməlidirlər. Hər bir astmalı xəstə profilaktik olaraq bilir ki, nə etməlidir”, - deyə Cəbrayıl Məmmədov bildirib.

Məsələ ilə əlaqədar Respublika Gigiyena və Epidemiologiya Mərkəzinin şöbə müdiri Ziyəddin Kazımov “Ölkə.Az”a bildirib ki, belə hallarda insanlar mütləq özlərini qorumalıdırlar. Onun sözlərinə görə, normadan artıq çirklənmədə uzun zaman açıq havada qalmaq olmaz.

“Havanın belə çirklənməsi uzun müddətli xarakter daşıyarsa, insanlarda yuxarı tənəffüs yolları xəstəlikləri yarada bilər. Xroniki xəstəliklərə səbəb ola bilər. Eyni zamanda gözün selikli qişasında konyuktivit (gözün selikli qişasının iltihabı xəstəliyi) yarada bilər. Bu zaman xüsusi müdafiə vasitələrindən, maskalardan istifadə edilməlidir. Tozlu havada küçədə çox qalmaq olmaz”, - deyə Ziyəddin Kazımov vurğulayıb.

Xatırladaq ki, Bakıda və Abşeron yarımadasında müşahidə olunan toz-dumanı Ərəbistan yarımadasından cənub-qərb küləyi vasitəsilə atmosfer axınları ilə ölkə ərazisinə daxil olub.

Ziya Səccad
Ölkə.Az

ŞƏRH YAZ
0
BAĞLA