50 manatlıq səməni, 8 manatlıq ananas

Kasıb, varlı fərq etmir, bayram qeyd etmək üçün hamı bazarlara üz tutur. Əsrlərdən üzü bəri gələn Novruz bayramına xas xüsusi rəmzlər var. Novruzu səmənisiz, şəkərburasız, paxlavasız, qozsuz, fındıqsız təsəvvür etmək mümkün deyil. Hər il olduğu kimi bu il də, bayramqabağı bazarlarda qiymətlər od tutub yanır.

Bazarlarda qiymətləri öyrənmək üçün Ölkə.Az saytının reportyor qrupu "Təzə bazar"da olub.

Novruzda hər evin vazkeçilməz bayram atributu təbii ki, səmənidir. Səmənilərin isə qiyməti müxtəlidir. Səmənilərin qiymətini soruşuruq. Satıcı deyir ki, qiymətlər müxtəlifdir - 50 qəpikdən, 50 manata qədər. 1 ovuc buğdadan hazırlanan səməni və 50 manat. Alıcısı varmı sualına is satıcı "əlbəttə var"- cavabını verir. Beləcə, səməni satanlar "buğda vurub manat qazanırlar". "Bazar olsun"- deyib quru meyvə satılan yerlərə gedirik.

Burada isə qiymətlər "cib qamaşdırır". Əriyin kilosu 10, qoz-fındıq ləpəsinin kilosu 16-18, alça və gavalı qurusunun kilosu 6-8, kişmişin kilosu 6, şabalıdın kilosu 9, qabıqlı qozun kilosu 6, qabıqlı fındığın kilosu 6 manatadır.

Ötən ilki qiymətlərlə bu ilki qiymətlərin fərqin soruşuruq. Satıcı deyir, ötən ilə baxanda bu il 50 qəpik fərq var. Qiymətlər bu il bahalaşıb.

Meyvələrin satıldığı yerə gedirik. Burada almanın kilosu 2.50, portağalın kilosu 4-5, qreyfrutun kilosu 3, 1 ədəd ananas 8, kivinin kilosu 2.60, heyvanın kilosu 3 manata satılır.

Satıcılar müştərilərin alıcılıq qabiliyyətinin zəif olmasından gileylənirlər. Satıcılarla söhbətimizdə deyirlər: "Demək olar ki, alıcı yoxdur. Bazara barmaqla sayılası qədər adam girir. Camaatı da qınamaq olmur. Pul olsa camaat təbii ki, gəlib alış-veriş edər".

Qiymətlərin niyə belə baha olması ilə bağlı sualımıza isə satıcının cavabı belə oldu:

"Hər bayram qiymətlər qalxır. Mal gətirənlər bayram fürsətindən istifadə edib malı baha qiymətə gətirirlər. Bilirlər ki, camaat bayrama görə alacaq. Hamı evində uşaqları ilə gözəl bayram qeyd etmək istəyir. Çoxları elə bilir ki, biz qiymətləri süni şəkildə qaldırırq, ancaq elə deyil".

Təzə bazarda sümüksüz mal ətinin qiyməti isə 10.5 manatdır.

Bazarda mal çox, qiymətlər baha, alıcılar isə yox dərəcəsindədir. Camaatın cibində siçanlar oynayır, satıcılar isə tum çırtlayır.