8 ayda bahalaşan və ucuzlaşan məhsulların — SİYAHISI

8 ayda bahalaşan və ucuzlaşan məhsulların
22:01
11.10.2017
314
İqtisadiyyat
A
2017-ci ilin yanvar-sentyabr aylarında istehlak məhsullarının və xidmətlərin qiymətləri 2016-cı ilin müvafiq dövrünə nisbətən 13,9 faiz, o cümlədən ərzaq məhsullarının qiymətləri 17,9 faiz, qeyri-ərzaq mallarının qiymətləri 12,5 faiz, əhaliyə göstərilən ödənişli xidmətlərin qiymətləri 9,6 faiz bahalaşıb.

Ölkə.Az bildirir ki, bu barədə Trend Dövlət Statistika Komitəsinə istinadən xəbər verir.

Məlumata görə, cari ildə ilk dəfə olaraq istehlak qiymətləri indeksi 0,1 faiz bənd aşağı düşüb. Bununla yanaşı, cari ilin sentyabr ayında avqust ayına nisbətən istehlak məhsullarının və xidmətlərin qiymətləri 0,7 faiz, o cümlədən ərzaq məhsullarının qiymətləri 1,4 faiz, qeyri-ərzaq mallarının qiymətləri 0,4 faiz, əhaliyə göstərilən ödənişli xidmətlərin qiymətləri isə 0,1 faiz bahalaşıb.

Ay ərzində mal, qoyun və toyuq ətinin, yumurtanın, kolbasa məmulatlarının, süd məhsullarının, kərə, zeytun və marqarin yağlarının, limonun, portağalın, gavalının, kələmin, göyərtinin, xiyarın, pomidorun, bibərin, badımcanın, göy lobyanın, sarımsağın qiymətlərində bahalaşma, düyünün, unun, manna və qarabaşaq yarmasının, makaron məmulatlarının, bananın, almanın, armudun, qozun, fındığın, soğanın, kartofun, şəkər və şəkər tozunun qiymətlərində isə ucuzlaşma müşahidə olunub. Digər ərzaq məhsullarının qiymətlərində ciddi dəyişikliklər baş verməyib.

Senytabr ayında avqust ayı ilə müqayisədə qeyri-ərzaq mallarından parçaların, geyim və ayaqqabıların, inşaat materiallarının, mebel və ev əşyalarının, xalça və digər döşəmə örtüklərinin, kiçik elektrik cihazlarının, kitabların və dəftərxana ləvazimatlarının, zərgərlik məmulatlarının qiymətlərində bahalaşma, soyuducuların, kondisionerlərin, minik avtomobillərinin, mobil telefon və fotoaparatların qiymətlərində isə ucuzlaşma müşahidə olunub. Digər qeyri-ərzaq mallarının qiymətlərində ciddi dəyişikliklər baş verməyib.

Sentyabr ayında əvvəlki ayla müqayisədə əhaliyə göstərilən ödənişli xidmətlərdən paltarların təmizlənməsi, təmiri və kirayəsi xidmətinin, mənzillərin icarə haqqının, məişət cihazlarının təmiri xidmətinin, stomatoloji xidmətlərin, mebel və digər əşyaların daşınması xidmətinin, ödənişli ali təhsil haqqının qiymətlərində bahalaşma, dəmiryol və hava nəqliyyatı ilə beynəlxalq sərnişindaşıma xidmətlərinin qiymətlərində isə ucuzlaşma müşahidə olunub. Digər ödənişli xidmətlərin qiymətlərində ciddi dəyişikliklər baş verməyib.

ŞƏRH YAZ
0

Azərbaycanla Gürcüstan arasında ticarət dövriyyəsi — YARIBAYARI ARTIB

Azərbaycanla Gürcüstan arasında ticarət dövriyyəsi
23:53
23.06.2018
187
İqtisadiyyat
A
2018-ci ilin yanvar-may ayları ərzində Gürcüstan ilə Azərbaycan arasında ticarət dövriyyəsi 430,5 milyon dollar olub.

"Ölkə.Az" "Report"a istinadən xəbər verir ki, bu göstərici 2017-ci ilin eyni dövrü ilə müqayisədə 50,7 faiz çoxdur.

Azərbaycan bu göstərici ilə Gürcüstanın əsas xarici tərəfdaşları sırasında 3-cü yerdədir.

Gürcüstanın əsas xarici ticarət tərəfdaşları sırasında 1-ci yerdə Türkiyə qərarlaşıb. 2018-ci ilin yanvar-may aylarında Gürcüstan ilə Türkiyə arasında ticarət dövriyyəsi 714,8 milyon dollar təşkil edib. Bu da ötən ilin müvafiq dövrü ilə müqayisədə 21 faiz çoxdur.

Gürcüstanın əsas xarici ticarət tərəfdaşları sırasında ikinci yerdə 548,2 milyon dollarla Rusiya mövqe tutub. Bu iki ölkə arasında ticarət dövriyyəsi 2017-ci ilin ilk 5 ayı ilə müqayisədə 24,5 faiz artıb.

Cari ilin ilk 5 ayında Gürcüstanın xarici ticarət dövriyyəsi 4,896 milyard dolları keçib. Bu da ötən ilin yanvar-may ayları ilə müqayisədə 24,5 faiz çoxdur.

Ölkənin xarici ticarət dövriyyəsində ən böyük artım may ayında qeydə alınıb. Bu ilin may ayında Gürcüstanda ixracat 2017-ci ilin may ayı ilə müqayisədə 50,2 faiz artaraq 323,3 milyon dollar təşkil edib.

Ölkə.Az

ŞƏRH YAZ
0

Neft hasilatının artırılması qərarını Azərbaycan da dəstəkləyib

Neft hasilatının artırılması qərarını Azərbaycan da dəstəkləyib
20:30
23.06.2018
221
İqtisadiyyat
A
Vyanada Neft İxrac Edən Ölkələr Təşkilatına (OPEC) üzv və qeyri-üzv dövlətlərin nazirlərinin dördüncü görüşündə hasilat kvotasının 100 faizlik icrası, yəni neft hasilatının sutkada 1 milyon barrel artırılması ilə bağlı razılıq əldə olunub.

Energetika nazirliyinin mətbuat xidmətindən "Ölkə.Az"a verilən məlumata görə, OPEC və qeyri-OPEC ölkələrinin bu yeni razılaşmasını Azərbaycan da dəstəkləyib.

Tədbirdə iştirak edən energetika naziri Pərviz Şahbazovun verdiyi məlumata görə, iclasda dünya neft bazarının son vəziyyəti təhlil edilib. Dünya iqtisadiyyatının inkişaf templəri, proqnozlar, neftə tələbatı əks etdirən təqdimatlar edilib. OPEC Nazirlər Şurasının 174-cü iclasının qərarını zəruri edən amillər nəzərdən keçirilib, OPEC-lə yanaşı, kartelə üzv olmayan ölkələr tərəfindən də öhdəliklərin 100 faizdən çox icrasının bazarda tələb-təklif tarazlığı üçün risklər yaratdığı qeyd edilib. Bazarda neft ehtiyatlarının azalması vəziyyətində artan tələbatın ödənilməsi üçün OPEC+ nazirlər səviyyəsindəki Monitorinq Komitəsinin Vyana razılaşması çərçivəsində neft hasilatının artırılması təklifinin qeyri-OPEC ölkələri tərəfindən qəbulunun vacibliyi bildirilib.

Görüşün yekununda OPEC ölkələri və təşkilata daxil olmayan ölkələr, o cümlədən Azərbaycan tərəfindən “Əməkdaşlıq Bəyannaməsi”nə imza atılıb.

Yeni qərarı şərh edən energetika naziri Pərviz Şahbazov neft bazarının yeni vəziyyətə uyğun tənzimlənməsi üçün OPEC+ formatında həmrəyliyin, hasilatın artırılması tədbirlərinin də davamlı əməkdaşlıq çərçivəsində həyata keçirilməsinin vacibliyini qeyd edib: “Neft bazarının neft hasil və ixrac edən ölkələrin maraqlarına uyğun inkişafı prosesinə Azərbaycan bundan sonra da dəstək verməyə hazırdır. İndiyə kimi OPEC+ çərçivəsində neft hasilatının azaldılması ilə bağlı öhdəliyini artıqlaması ilə yerinə yetirən Azərbaycan müvafiq tədbirlərlə ölkədə hasilat həcmlərini kvotaya uyğunlaşdırmaqla ümumi prosesə öz töhfəsini verəcəkdir.”

Qeyd edək ki, OPEC+ tədbiri çərçivəsində, dünyada ilk dəfə neftin sənaye üsulu ilə məhz Azərbaycanda çıxarıldığını təsdiqləyən Bibiheybət mədəni ərazisindəki quyunun təsvir olunduğu tablo OPEC-ə təqdim olunub. OPEC-in baş katibi Məhəmməd Barkindo Azərbaycanı neftin vətəni və dünya neft sənayesinə davamlı töhfələri olan ölkə kimi dəyərləndirib. Quyu barədə məlumat verən energetika naziri Pərviz Şahbazov isə bildirib ki, 1846-cı ildə Bibiheybət yatağında şəkildəki bu quyunun qazılması ilə dünyada sənaye üsullu neft hasilatının əsası qoyulub. Arxiv sənədləri əsasında ilk quyunun yeri dəqiqləşdirilərək bərpa edilib. Nazir Azərbaycanın 200 ilə yaxın tarixə malik neft sənayesinin inkişaf mərhələlərindən, həyata keçirilən layihələrdən danışıb, neft ölkəsi kimi uzunmüddətli inkişafı təmin edəcək yeni tədbirlərdən bəhs edib.

OPEC+ formatında müvafiq tədbirlərindən birinin Bakıda keçirilməsi ilə bağlı Azərbaycan Prezidentinin təklifi bir daha diqqətə çatdırılaraq, Neft İxrac Edən Ölkələr Təşkilatına (OPEC) üzv və kartelə daxil olmayan ölkələrin təmsilçiləri Bakıya dəvət edilib.

Ölkə.Az

ŞƏRH YAZ
0
BAĞLA