Tramp və komandası
Ölkə.Az xəbər verir ki, Trampın komandasında 1 qaradərili, 1 pravoslav inanclı və 4 nəfər də xanım var.
ABŞ-ın 45-ci prezidentinin soyadı tərcümədə kart oyununda istifadə edilən "kozır" mənasını verir. Donaldın komandasında əsas vəzifələri milyarderlər, nəhəng biznes rəhbərləri, təcrübəli hərbçilər icra edəcək.
Ölkə.Az bu gün oxucularını Trampın dörd illik hakimiyyətinin kimlərlə başlayacağı ilə tanış edəcək.
Dövlət katibi Reks Tillerson
64 yaşı var. Texas universitetinin məzunudur. Siyasətə biznes dünyasından qoşulub. 2017-ci ilin 1 yanvar tarixinə qədər "ExxonMobil" şirkətinin baş direktoru olub. Strateji və beynəlxalq araşdırmalar mərkəzi şurasının üzvüdür. Rusiya federasiyası ilə dostluq və əməkdaşlığın möhkəmlənməsi, inkişafı üçün gördüyü işlərə görə Xalqlar dostluğu ordeninə layiq görülüb. 1990-cı illərdən Putinlə münasibəti var. Şirkətin maraqlarını Moskvada təmin etmək üçün bir müddət Rusiyada çalışıb. Bundan başqa, Tillersonun ərəb dünyasında da yaxşı dostları var.
Maliyyə naziri Stiven Mnuçin
54 yaşı var. "Goldman Sachs" investisiya şirkətinin partnyorudur. Eyni zamanda, "Avatar", "Dəli Maks" kimi filmlərin prodüseri olub. Trampın seçki kampaniyasının maliyyə tərəfinə cavabdeh olub. Yel universitetinin məzunudur. Milliyətcə yəhudidir. İsrailin baş naziri Benyamin Netanyahunun çevrəsi ilə işgüzar və dostluq münasibətləri var.
Energetika naziri Rik Perri
66 yaşı var. Üç dəfə Texas ştatının qubernatoru olub. İki dəfə Respublikaçılar tərəfindən prezidentliyə namizəd kimi göstərilib. 5 il əvvəl Energetika nazirliyinin bağlanmasını tələb edirdi. Eynicinsli nikahların və yüngül narkotik maddələrin qanuniləşdirilməsinə qarşıdır. Ölüm hökmünün bərpasını və abortun qadağan edilməsini dəstəkləyir. Qlobal iqlim dəyişikliyinə inanmır və sosial büdcənin azaldılmasını tələb edir. Yaxın Şərqdə İsrail siyasətini dəstəkləyir. Bildirib ki, İsrailin İrana hücumunun lehinədir. İki kitabın müəllifidir.
Mənzil tikintisi və şəhər inkişafı naziri Ben Karson
Con Hopkins universitetinin professoru, parlaq neyro cərrahdır. Dünyada ilk dəfə siam əkizlərini ayıran həkimdir. ABŞ prezidentliyinə namizəd olub. Maraqlı fikirləri var. Məsələn, Karson əmindir ki, Misir piramidaları fironlar üçün sərdabə yox, aclıq illərində taxıl anbarı kimi istifadə edilmək məqsədi ilə inşa edilib. Trampın komandasında yeganə qaradərilidir. 65 yaşlı Karson eynicinsli nikahlara və aborta qarşıdır.
Səhiyyə və sosial təminat naziri Tom Prays
62 yaşı var. Cərrah-ortopeddir. Barak Obamanın tətbiq etdiyi səhiyyə və tibbi sığorta reform sisteminin qatı əleyhdarıdır. Onun fikrinə görə, bu layihə faciədir. Corciya ştatından Təmsilçilər palatasının üzvüdür. Büdcə komissiyasının sədridir.
Əmək naziri Endrü Pazder
66 yaşı var. Nəhəng biznesin təmsilçisidir. "CKE Resaurants" şəbəkəsinin sabiq baş direktorudur. Trampın tərəfdarıdır və onun kampaniyasının əsas sponsorlarından biridir. Pazderin fikrinə görə, cavanlıqda liberal olmayanın qəlbi yoxdur. Ahıl yaşda konservator olmayanın isə beyni yoxdur. Gənclikdə nonkonformist olub, rok qrupunda çıxış edib hippi saç düzümünə görə 3 dəfə məktəbdən qovulub. Vyetnam müharibəsinə qarşı çıxıb. Obamanın səhiyyə reformlarının əleyhinədir. Eyni zamanda, minimal əmək haqqının artırılması fikrini də dəstəkləmir.
Daxili təhlükəsizlik naziri Con Kelli
Dəniz piyadaları generalı, ABŞ-ın cənub komandanlığının rəhbəridir. 2010-cu ildə dəniz piyadalarında xidmət edən oğlu Əfqanıstanda həlak olub. 1970-ci ildə hərbi xidmətə çağırılıb və 45 il hərbçi olub. İraq kampaniyasının planlaşdırılmasında və rəhbərliyində, Bağdadın işğalında iştirak edib. 66 yaşlı general qadınların hərbidə xidmət etməsinə qarşıdır.
Veteranlarla iş üzrə nazir Devid Şulkin
57 yaşı var. Tibb elmləri üzrə professordur. Veteranlarla iş üzrə nazirlikdə səhiyyə məsələləri üzrə nazir müavini işləyib. "Beth İsrael" tibb mərkəzinin prezidenti və baş direktoru olub.
Ağ Ev aparatının rəhbəri Ranhold Rayns Pribus
44 yaşı var. Komandanın ən gənc üzvüdür. Digər üzvlərə nisbətən biznes keçmişi yoxdur. Əsasən partiya funksioneridir. Respublikaçılar partiyasının sədri, Respublikaçılar milli konventinin hüquqi müşaviridir. Müstəqil vəkil kimi təcrübəsi var. Uşaq yaşlarından siyasətə həvəsi olub. Üçüncü sinifdə oxuyanda özünü prezidentliyə namizəd Ronald Reyqanın seçki kampaniyasının rəhbəri elan edib. "Dünyanın ən nüfuzlu 100 adamı" siyahısında adı var. Milliyətcə yarı alman, yarı yunandır və pravoslav əqidəsinə sahibdir.
Milli təhlükəsizlik üzrə müşavir Maykl Flinn
ABŞ silahlı qüvvələrinin mərkəzi kəşfiyyat komandanlığının zabitidir. ABŞ müdafiə nazirliyi kəşfiyyat idarəsinin direktorudur. Əfqanıstanda və İraqda xidmət edib. Radikal İslama qarşı sərt baxışları var. 58 yaşlı hərbi kəşfiyyatçı seçki kampaniyası dövründə Trampın təhlükəsizlik məsələlərinin məsləhətçisi olub. Deyilənə görə, Suriya məsələsində Tramp komandası və Rusiya rəhbərliyi ilə danışıqlarda mühüm rol oynayıb. "Russian Today" kanalının 10 illiyində Putinlə yanaşı oturub.
Baş strateji müşavir Stiv Bennon
Bankir, Hollivud prodüseridir. Yaxın Şərqdə xidmət edən hərbçidir. 62 yaşı var. Donald Trampın seçki kampaniyasının baş direktoru olub. Eks arvadının iddiası ilə antisemitizmdə günahlandırılıb. Arvadının iddiasına görə, Bennon övladlarının yəhudi məktəbində tədris almasına qarşı çıxıb. Bir sıra sənədli filmlərin rejissoru və ssenari müəllifidir. "Şərin simasının qarşısında" filmi Ronald Reyqanın fəaliyyətinə həsr edilib. Bundan başqa, Marqaret Tetçer, Sara Peylin və Enn Kolterdən bəhs edən filmi var.
Mərkəzi Kəşfiyyat İdarəsinin rəhbəri Mayk Pompeo
Kanzas ştatından Təmsilçilər palatasının üzvüdür. 53 yaşı var. Harvardın hüquq fakultəsini və "Vest-poynt "hərbi akademiyasının məzunudur. Bəyan edib ki, İslam dininə inananlar terrorçuların potensial həmkarıdır. Çünki bu şəxslər onların dini adına edilən terror hücumlarına qarşı çıxmırlar. İranla nüvə müqaviləsinin əleyhinədir və "Tea Party" konservativ hərəkatının üzvüdür.
Killian Konvey prezidentin əsas məsləhətçisi
Nikki Heyli ABŞ-ın BMT-də səlahiyyətli nümayəndəsi
Eleyn Lançao nəqliyyat naziri
Betsi Devos maarif naziri
Hikmət
Ölkə.Az
