ABAD jurnalistlər üçün media-tur təşkil edib — FOTOLAR

ABAD jurnalistlər üçün media-tur təşkil edib
15:45
25.09.2017
364
Ölkə
A
22-23 sentyabr tarixlərində ABAD-ın təşkilatçılığı ilə Balakən rayonuna media-tur təşkil edilib.

"Ölkə.Az"-ın əməkdaşının da iştirak etdiyi media-tur ABAD-ın Balakəndəki mərkəziylə tanışlıqdan başlayıb. ABAD direktorunun müşaviri Elvin Şirinov jurnalistlərə qurumun məqsədi, görülən işlər barədə ətraflı məlumat verib:

"ABAD-ın əsası (Ailə biznesinə asan dəstək)  Prezident İlham Əliyevin 23 sentyabr 2016-cı ildə imzaladığı müvafiq fərmanla qoyulub və artıq publik hüquqi şəxsin yaradılmasından 1 il ötür. Qurum ASAN Xidmətin tabeçiliyində yaradılıb. Məqsəd Azərbaycanda ailə təsərrüfatlarına, kiçik və orta sahibkarlıq subyektlərinə dəstək göstərmək, vətəndaşların ölkənin sosial-iqtisadi inkişafında fəal iştirakını təmin etmək, həmçinin özünəməşğulluq istiqamətində həyata keçirilən proqramlara dəstək olmaqdır. İlk olaraq fəaliyyətimizə pilot layihə olaraq Masallı rayonunda başlamış, növbəti mərhələdə isə 21 oktyabr 2016-cı ildə ABAD və Dövlət Neft Şirkəti arasında imzalanan əməkdaşlıq memorandumuna əsasən SOCAR-ın sosial yönümlü siyasəti çərçivəsində Balakən ikinci mərkəz kimi seçildi. Hazırda Balakəndə 12 ailə ABAD-a qoşulub və onlara monoblok konteyner şəklində zəruri istehsal avandanlıqları təqdim olunub".

Müşavir ABAD-ın qarşıdakı məqsədləri barədə danışarkən qeyd edib ki, bu gün Azərbaycanda kiçik və orta sahibkarlığın bazarda özünə yer tutması üçün vacib şərtlərdən biri böyük şirkətlərlə rəqabət apara bilməsidir:

"Düzdür, hər bir ailə ABAD-ın təklif etdiyi xidmətləri mərhələli şəkildə icra edib rəqabətqabiliyyətli ailə təsərrüfatına çevrilə bilər. Lakin onun təkbaşına, ayrı-ayrılıqda həyata keçirəcəyi xidmətlərə sərf edəcəyi məbləğ sonda məhsulun elə bir qiymətlə bazara çıxarılmasına səbəb olacaq ki, öz alıcısını tapa bilməyəcək və nəticədə təsərrüfat dağılacaq. Bunun üçün də ABAD həmin ailələrə biznes məktəbi keçir, onlara biznes-konstaltinq, marketinq, maliyyə, hüquqi yardım, satışın təşkili barədə yardım göstərir, eyni zamanda lazımi avadanlıqlarla da təmin edir".

E.Şirinovun sözlərinə görə, hazırda cem, mürəbbə, ət və süd, həmçinin sənətkarlıq məhsullarının istehsalı üzrə fəaliyyət göstərən publik hüquqi şəxsin Bakı şəhərində İçəri Şəhərdə, Heydər Əliyev adına Beynəlxalq Hava Limanında və Dəmiryol vağzalında sərgi-satış mərkəzi mövcuddur. Şirinov həmçinin qeyd edib ki, ölkəmizdə keçirilən voleybol üzrə Avropa çempionatı ilə əlaqədar turistlərin sıx ziyarət etdiyi Milli Gimnastika Arenasının ərazisində kiçik bir ABAD butikinin də açılıb. O, ABAD-çılar tərəfindən hazırlanan məhsulların yarışların keçirildiyi ərəfədə turistlərə təqdim olunacağını söyləyib.

ABAD rəsmisi gələcək planlar barədə isə bunları deyib:

"Bu gün Avstraliyanın Darbua ailəsinin məhsulu Azərbaycana gəlib çıxırsa və hər bir azərbaycanlı da onu alırsa, nə üçün bizim Samir Əliyevin “Bal kimi” məhsulu xarici bazara çıxmasın? Məhsulların bazara çıxması üçün onun bredləşdirilməsi vacibdir. Biz bu sahədə də ailələrə dəstək göstəririk. Hazırlanan məhsullar müxtəlif laboratoriyalarda testdən keçirildikdən sonra sertifikatlaşdırılır. Bu gün ABAD-çı ailələrin hazırladıqları məhsullar heç də xarici brendlərdən geri qalmır, hətta bəzən onları üstələyir”.

Təqdimatdan sonra media nümayəndələri bir neçə ABAD-çının qonağı olub, mürəbbə, kolbasa istehsalı ilə tanış ediliblər. 

Həmçinin bildirilib ki, ABAD tərəfindən dəstəklənən ailə təsərrüfatlarının məhsulları "Bravo" supermarketlər şəbəkəsində satışa çıxarılır. “Bal kimi”, “Balməkan”, “Dənə-dənə” , “Yay səbəti” , “Bağımızın bəhrəsi”, “Budaqdan”, , “Meyvə bağı” mürəbbə brendlərini "Gənclik Mall” ticarət mərkəzində yerləşən “Bravo” supermarketindən və Xaqani 26/32 ünvanında (keçmiş “Tahir 97” mağazası) fəaliyyət göstərən “Bravo ekspress”dən əldə etmək mümkündür.
 

Ölkə.Az

ŞƏRH YAZ
0

“Azəriqaz”dan bu rayonun əhalisinə müraciət — Qazla sabah ehtiyatlı davranın

“Azəriqaz”dan bu rayonun əhalisinə müraciət
21:14
Bu gün
827
Ölkə
A
Bakının Nizami rayonunun təbii qaz təchizatında məhdudiyyət olacaq.

“Azəriqaz” İstehsalat Birliyindən "Ölkə.Az"a verilən məlumata görə, payız-qış mövsümünə hazırlıqla bağlı tədbirlər planına əsasən, yararsız qaz xətlərinin yeni borularla əvəz edilməsi, həmçinin Nizami rayonu, Qara Qarayev 102 ünvanında diametri 325 millimetrlik qaz xəttinin korroziyaya uğramış hissəsinin yeni çəkilmiş polietilen 315 millimetrlik qaz xəttinin mənbəyə birləşdirilməsi ilə əlaqədar sentyabrın 26-da saat 09:00-dan təmir işləri tamamlananadək Nizami rayonu, Qara Qarayev E.Süleymanov, B.Nuriyev, Naxçıvanski, Rüstəmov, A.Manafov və Nəvai küçələrinin bir hissəsində təbii qazın verilişində məhdudiyyət olacaq.

Zəruri təmir işləri aparıldığı zaman Binəqədi və Biləcəri qəsəbələrində, eləcə də Abşeron rayonunun Ceyranbatan və Saray qəsəbələrinin bir hissəsinin qaz təchizatına fasilə yaranması mümkündür.

Görülən təmir işləri gün ərzində yekunlaşdırılaraq təbii qazın verilişində yaranacaq fasilə aradan qaldırılacaq.

“Azəriqaz” İstehsalat Birliyi bütün istehlakçılardan təbii qazdan istifadə zamanı xüsusilə diqqətli olmalarını və texniki təhlükəsizlik qaydalarına riayət edilməsini xahiş edir.

Ölkə.Az

ŞƏRH YAZ
0

Ramil Usubov İranda

Ramil Usubov İranda
20:44
Bu gün
1090
Ölkə
A
İranın daxili işlər naziri Əbdülrza Rəhmani Fəzlinin dəvəti ilə Azərbaycan daxili işlər naziri, general-polkovnik Ramil Usubovun başçılıq etdiyi nümayəndə heyəti sentyabrın 24-25-də bu ölkədə rəsmi səfərdə olub.

Daxili İşlər Nazirliyindən "Ölkə.Az"a verilən məlumata görə, səfərin ilk günü Ə.R.Fəzli general-polkovnik Ramil Usubov və onu müşayiət edən şəxsləri qəbul edib.

Qonaqları səmimi salamlayan, dəvətini qəbul etdiyinə görə təşəkkürü bildirən İranın daxili işlər naziri son dövrlər qarşılıqlı səfərlərin intensivləşməsinin ölkələrimiz arasında əməkdaşlıq əlaqələrinin inkişafından xəbər verdiyini, hər iki ölkə prezidentlərinin xalqlarımızın mənafeyini nəzərə alaraq qarşılıqlı münasibətlərin yaxınlaşmasına nail olduqlarını vurğulayıb.

Ölkələrimiz arasında qarşılıqlı hörmətə və dostluğa əsaslanan münasibətlərin qurulmasında Azərbaycan xalqının ümummilli lideri Heydər Əliyevin misilsiz xidmətlərini, hələ Naxçıvan Muxtar Respublikası Ali Məclisinin sədri vəzifəsində çalışarkən İrana səfərini xatırladan Ə.R. Fəzli məhz onun Azərbaycana ikinci dəfə rəhbərlik etdiyi dövrdə dövlətlərimiz arasındakı qarşılıqlı münasibətlərin inkişaf mərhələsinə qədəm qoydugunu məmnunluqla diqqətə çatdırıb, bu gün Heydər Əliyevin siyasi kursunu uğurla davam etdirən Prezident İlham Əliyevin Azərbaycanın bütün istiqamətlərdə əldə etdiyi böyük uğurların onları da sevindirdiyini qeyd edib, respublikamızın təhlükəsizlik və tərəqqisinin özlərinin təhlükəsizliyi və inkişafı kimi qəbul etdiklərini nəzərə çatdırıb.

Daha sonra iranlı nazir ölkəsində mövcud kriminogen durum, cinayətkarlıqla, o cümlədən narkotik maddələrin qaçaqmalçılığına qarşı hüquq mühafizə orqanlarının apardıqları mübarizədən danışaraq yalnız ötən il 800 ton narkotik maddənin müsadirə edildiyini, əlverişli coğrafi məkanda yerləşməsi səbəbindən İranın qaçaqmalçılar tərəfindən tranzit kimi istifadə edildiyini, bu mübarizədə 3 mindən çox polis və sərhədçisinin şəhid olduğunu bildirib.

Səmimi qəbula, qonaqpərvərliyə, ətraflı məlumata və xoş sözlərə görə minnətdarlığını bildirən nazir R.Usubov Azərbaycan Prezidenti İlham Əliyevin İran ilə əlaqələrin inkişafına xüsusi önəm verdiyini, dövlət başçılarının siyasi iradəsinin nəticəsi olaraq bu gün Azərbaycan-İran əlaqələrinin yüksələn xətlə inkişaf etdiyini, iki ölkənin münasibətlərinin səmimi dostluq və strateji tərəfdaşlıq xarakteri daşımasının xalqlarımızın və dövlətlərimizin mənafelərinə uyğun olduğunu diqqətə çatdırıb.

Daha sonra o, bu gün regionda cərəyan edən proseslərin qarşılıqlı şəkildə transmilli mütəşəkkil cinayətkarlığa qarşı mübarizənin gücləndirilməsi zərurətini meydana çıxardığını, belə cinayətlərin, xüsusən narkotik qaçaqmalçılığına, insan və qanunsuz silah alverinə, beynəlxalq terrorçuluğa qarşı səmərəli mübarizə aparmaq üçün əməkdaşlıq əlaqələrinin genişləndirilməsinin, informasiya mübadiləsinin artırılmasının əhəmiyyətini vurğulayıb.

Daha sonra nazir R.Usubov ölkəmizdə cinayətkarlıqla mübarizə sahəsində həyata keçirilən qətiyyətli tədbirlər, müstəqilliyin ilk illərində üzləşdiyimiz problemlər, Ermənistanın ölkəmizə hərbi təcavüzü və onun doğurduğu fəlakətli nəticələr, ulu öndər Heydər Əliyevin ali hakimiyyətə qayıdışından sonra həyata keçirilən islahatlar, məhz onun rəhbərliyi ilə ölkəmizdə ictimai-siyasi sabitliyin, əmin-amanlığın bərpası istiqamətində hüquq-mühafizə, o cümlədən daxili işlər orqanlarının gördükləri qətiyyətli tədbirlər barədə məlumat verərək bu gün də həmin siyasətin milli mənafeyimizə uyğun olaraq uğurla davam etdirildiyini bildirib.

General-polkovnik R.Usubov bugünlərdə İranın Əhvaz şəhərində törədilmiş terror aktı nəticəsində çoxsaylı insan tələfatına görə həlak olanların ailələrinə başsağlığı verib, bu hadisənin Azərbaycanda da böyük kədər və hüznlə qarşılandığını diqqətə çatdırıb.

İki gün davam edən səfər çərçivəsində nazir, general-polkovnik R.Usubov İran İslam Şurası Məclisinin sədri Əli Laricani, Milli Təhlükəsizlik üzrə Ali Şuranın katibi Əli Şəmxani, Sərhəd Mühafizə Xidmətinin komandanı, general Qasem Rezayi və digər rəsmi şəxslər ilə görüşlər keçirib. Daxili işlər naziri mütəşəkkil cinayətkarlıqla səmərəli mübarizə aparmaq üçün qarşılıqlı əməkdaşlıq əlaqələrinin qurulmasının zərurini vurğulayıb, bu istiqamətdə polis orqanları arasında təcrübə və informasiya mübadiləsinin aparılmasının əhəmiyyətindən söz açıb.

İranın narkotik maddələrin qaçaqmalçılığına qarşı apardığı qətiyyətlə mübarizədə kifayət qədər təcrübə topladığını qeyd edən nazir R.Usubov Azərbaycan Polisinin bu təcrübədən faydalana biləcəyini qeyd edib, vətəndaşlarımızın gediş-gəlişlərinin artması, eləcə də turizmin inkişafı ilə əlaqədar hər iki ölkədə əmin-amanlığın, ictimai təhlükəsizliyin yüksək səviyyədə təmin olunmasında birgə səylərin bundan sonra da davam etdirilməsinin vacibliyini nəzərə çatdırıb.

Görüşlərdə qarşılıqlı maraq doğuran digər məsələlər ətrafında da geniş fikir mübadiləsi aparılıb.

Azərbaycanın İrandakı səfiri Bünyad Hüseynov da görüşlərdə iştirak edib.

Ölkə.Az

ŞƏRH YAZ
0
BAĞLA