ABŞ-dan "Ən-Nuri" cümə məscidində törədilən terrorla bağlı açıqlama
"Ölkə.Az" xəbər verir ki, bu barədə ABŞ Dövlət Departamentinin yeni mətbuat katibi Hizer Noyert açıqlamasında deyib. Onun sözlərinə görə, bu əməl bütün dünyaya vurulan zərbədir.
“Bu cinayət təkcə Mosul xalqı və İraqa qarşı törədilməyib. Bu bütün dünya xalqlarına qarşı törədilən cinayətdir. Dünya daha bir mühüm mədəniyyət nümunələrindən birini itirdi. Bu və digər belə mədəniyyət irslərini İŞİD terrorçuları dağıdır”, - deyə Hizer Noyert bildirib.
Qeyd edək ki, iyunun 21-də İraqın Mosul şəhərində terror aktı törədilib. Terror "Ən-Nuri" cümə məscidində törədilib. İŞİD terrorçuları İraqın Mosul şəhərində yerləşən "Ən-Nuri" cümə məscidini partladıblar.
"Ən-Nuri" cümə məscidi Mosulda İŞİD terrorçularının nəzarətindədir. İraq ordusu ilə məscid arasındakı məsafə 200 metrdən də azdır. Hazırda həmin məsciddə təxminən 500 terrorçu nəzarət edir.
Xatırladaq ki, 2016-cı ilin oktyabr ayından Mosulda İraq ordusu və ABŞ hərbçilərinin birgə təşkil etdiyi koalisiya qüvvələri əməliyyatlara başlayıb. Əməliyyatlar nəticəsində İraqda bir çox ərazi İŞİD terrorçularından təmizlənib. Bu ilin mart ayından başlayaraq Mosul şəhəri mühasirəyə alınıb. İraqın Mosul şəhərində İŞİD terrorçularına qarşı əməliyyatlar davam edir.
Ziya Səccad
Ölkə.Az
