ABŞ-dan Əsəd rejiminə sərt

"Ölkə.Az" xəbər verir ki, Ağ Evin ittihamlarına görə, Bəşər Əsəd rejimi yenə də xalqa qarşı kimyəvi silahlardan istifadə etməyə hazırlaşır. Verilən bəyanata görə, Suriya ordusu bu dəfə də günahsız insanların ölümünə səbəb ola bilər.

“Biz bir daha xəbərdarlıq edirik ki, Suriya ordusu öz xalqına qarşı beynəlxalq qanunlarla qadağan edilən kimyəvi silahlardan istifadə edəcək. Bununla da, günahsız insanlar, əsasən də uşaqlar məhv ola bilər. Aprelin 4-də İdlib əyalətində baş vermiş faciəvi hücum təkrarlana bilər”, - deyə bəyanatda bildirilib.

Ağ Ev xəbərdarlıq edib ki, əgər bir də xalqa qarşı kimyəvi silah tətbiq edilərsə, bu Əsədə baha başa gələcək:

“Bu dəfə Amerika Əsəd rejiminin əməlllərinə daha sərt cavab verəcək. Əgər əhaliyə qarşı kimyəvi hücum təkrarlanarsa, Suriya ordusu bunun əvəzini daha ağır ödəyəcək”.

Xatırladaq ki, bu ilin aprel ayının 4-də Bəşər Əsəd rejiminə aid hərbi təyyarələr İdlib şəhərinə zərbələr endirib. Zərbələrin endirilməsindən sonra kimyəvi zəhərlənmə nəticəsində 80 nəfərdən çox insan ölüb və 200 nəfər yaralanıb. Bundan sonra aprel ayının 7-də ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Homs qubernatoru zərbə nəticəsində 5 hərbçi və 2 mülki şəxsin öldüyünü bildirib. Tramp, raket zərbəsinin kimyəvi silahdan istifadənin təkrarlanmasının qarşısını almaq məqsədilə endirildiyini deyib.

Ziya Səccad
Ölkə.Az