ABŞ-ın ardından İsrail də YUNESKO-dan ayrılır
“Ölkə.Az” xəbər verir ki, bu barədə İsrailin baş naziri Binyamin Netanyahu bildirib. O, bununla bağlı İsrailin Xarici İşlər Nazirliyinə göstəriş verdiyini deyib. Bu barədə məlumatı hökumət rəhbərinin dəftərxanası yayıb.
Qeyd edək ki, bundan əvvəl ABŞ da YUNESKO-dan çıxmaqla başlı açıqlama vermişdi. Açıqlamaya əsasən rəsmi Vaşinqton 31 dekabr tarixindən BMT-nin bazasında yaradılan YUNESKO-dan ayrılmaq qərarına gəlib.
YUNESKO-nun rəhbərliyi isə ABŞ-ın qurumdan ayrılmaq üçün müraciət etdiyini bildirib. Qurum ABŞ-ın bu qərarını “BMT ailəsi” üçün bir itki adlandırıb. ABŞ xarici işlər nazirliyindən verilən açıqlamada deyilir: “Bu qərar çox çətinliklə qəbul edilib. Amma bu qərar ABŞ-ın YUNESKO-dakı narahatçılığını və təşkilatın ciddi islahatlara ehtiyac duyduğunu göstərir. YUNESKO İsrailə qarşı mövqeyini davam etdirir”.
YUNESKO 2011-ci ildə Fələstini üzv olaraq qəbul etmişdi. Qurumun bu qərarından sonra ABŞ maddi dəstəyini dayandırmaq qərarına gəlmişdi.
Ziya Səccad
Ölkə.Az
