“ABŞ lazım olarsa İŞİD-ə köməklik edəcək”
Bunun ardınca, ABŞ Silahlı Qüvvələrinin komandiri ordu generalı Cozef Votel Suriyada İŞİD-ə qarşı mübarizə məsələsi ilə bağlı açıqlama verib. General mübarizəni sürətləndirmək üçün daha çox hərbçiyə ehtiyac duyulduğunu bildirib.
Məsələ ilə əlaqədar siyasətçilər düşünürlər ki, nə olursa olsun, Amerika Suriyaya olan marağını unutmayacaq. Politoloq Arzu Nağıyev Ölkə.Az-a açıqlamasında bildirib ki, Amerika rəhbərliyi nə bəyanat verirsə versin, onların siyasəti bir istiqamətdə davam edəcək.
“ABŞ-ın Suriyaya qarşı xarici siyasəti dəyişməyəcək. Verilən bəyanatlar da müvəqqəti xarakter daşıyır. Amerikanın Suriyada məxsusi maraqları var. Nəyin bahasına olursa olsun, Amerika bu proseslərdə iştirak edəcək”, - deyə A.Nağıyev bildirib.
Siyasətçi deyir ki, Suriya məsələsində ABŞ İranla mübarizə aparır. Bu mübarizədə ABŞ qalib gələrsə, növbəti devriləcək rejim İran olacaq:
“İranın istəyi Suriyada Bəşər Əsəd rejiminin qalmasıdır. Amerika isə bütün cəhdlərlə Əsəd rejimini devirmək istəyir. Bundan sonra isə növbə İranındır. Bu səbəbdən də, ABŞ xarici siyasətini dəyişməyəcək. Nə Obamanın vaxtında bu siyasət dəyişdi, nə də Trampın dövründə dəyişəcək. ABŞ Bəşər Əsəd rejiminin sonuna çatacaq. Bu istiqamətdə lazım olarsa, İŞİD-ə köməklik ediləcək, lazım olarsa, terrorçular məhv olunacaq”.
Ziya Səccad
Ölkə.Az
