ABŞ Rusiyanın ittihamlarına necə cavab verəcək?

"Ölkə.Az" xəbər verir ki, nazirlik ABŞ gəmilərində hansı raketlərin daşındığı məlum olmadığı üçün, bunun Rusiya üçün təhlükə kəsb etdiyini açıqlayıb.

2014-cü ildə Krımın ilhaqından sonra Rusiyanın Sevastopol şəhərində Qara dəniz donanması var. Nazirliyin verdiyi açıqlamada deyilir: "Rusiya və Çini nəzarət altına almağa çalışan ABŞ-ın qlobal raketdən müdafiə sistemi dünyanın təhlükəsizliyi üçün təhdiddir".

Rus rəsmiləri bildirib ki, bu sistem dünyada yeni bir silahlanma yarışına səbəb olacaq. Azərbaycanlı siyasətçilər isə düşünürlər ki, bu əslində Rusiya üçün elə də ciddi problem deyil. Politoloq Zərdüşt Əlizadə Ölkə.Az-a açıqlamasında bildirib ki,  müqaviləyə görə, Qara dənizdə xarici dövlətlərin hərbi gəmiləri müəyyən bir müddətdə və nəzərdə tutulmuş sayda ola bilər. Onun sözlərinə görə, bundan artıq müddətdə və sayda qoşunların qalması beynəlxalq qanunlara ziddir.

“Rusiya Qara dənizi özünün daxili dənizi sayır və buna etirazını bildirir. Əslində isə Amerikanın gəmiləri orada olmaqla qanunu ciddi şəkildə pozmayıblar. Rusiyanı da başa düşmək olar. Onlar öz narahatlıqlarını bildirməlidirlər. Rusiya NATO qüvvələrinin genişlənməsini istəmir. Cənubi Koreyada antiraket sisteminin qurulmasını istəmir. Bu təbii hisslərdir. Real baxımdan qüvvələrin nisbətinə təsir edən bir şey deyil” , - deyə siyasətçi bildirib.

Zərdüşt Əlizadənin fikrincə, Rusiyanın ittihamlarına ABŞ elə də ciddi reaksiya verməyəcək:

“ABŞ Rusiyanın bu iradını nəzərə almayacaq. Onlar deyəcəklər ki, elə şey yoxdur. Bizim sizə qarşı heç bir bəd niyyətimiz yoxdur”.

Ziya Səccad
Ölkə.Az