ABŞ Şimali Koreyaya hərbi müdaxilə edərsə, Çin və Rusiyanın mövqeyi necə olacaq?

Bu isə Şimali Koreyanı narahat edir. Şimali Koreya ətrafında keçirilən təlimləri hərbi manevr kimi dəyərləndirən Şimali Koreya rəhbərliyi əgər Cənubi Koreya və ABŞ bu addımdan əl çəkməsə, nüvə silahından istifadə edəcəyini bildirib.

Ümumiyyətlə, son zamanlar uzaq şərqdə vəziyyət getdikcə gərginləşir. Şimali Koreyanın yeni nüvə silahını sınaqdan keçirəcəyini bəyan etməsi ABŞ başda olmaqla Cənubi Koreyanı, Yaponiyanı və Çini ciddi narahat edir.

Bəzi ekspertlər uzaq şərqdə gedən proseslərin sonda III Dünya Müharibəsi ilə nəticələnə biləcəyini iddia edir.

Uzaq şərqdə baş verən proseslərlə bağlı politoloq İlqar Vəlizadə fikirlərini Ölkə.Az-la bölüşüb:

"Koreya yarımadasında gedən proseslər şiddətli dövrə qədəm qoyub. Nüvə silahı ilə bağlı çəkişmələr uzun müddətdir ki, davam edir. İlk dəfə Şimali Koreyada nüvə silahının olması ilə bağlı məlumatlar 90-cı illərin ikinci yarısında yayılmışdı. Kim Çen İrin zamanında artıq nüvə silahlarının sınaqdan çıxarılmasına başlanıldı. Daha sonra məsələ səngidi. Sonradan nüvə silahı ilə bağlı proseslər qapalı şəkildə aparılırdı. Ara-sıra nüvə sınaqları həyata keçirilirdi. Buna səbəb isə Şimali Koreyada problemlərin çoxluğu idi, ən əsası isə maliyyə problemləri var idi. Yaxın zamanlarda Şimali Koreyanın maliyyə problemləri tam olmasa da aradan qalxdı. Yenidən nüvə sınaqlarının şiddətli fazasını görürük. Bu isə qonşu ölkələri narahat edir. Cənubi Koreya, Yaponiya Şimali Koreyanın nüvə sınaqlarına görə çox narahatdır. Çin də bu sınaqlara görə öz narahatçılığını gizlətmir".

ABŞ və Cənubi Koreyanın keçirdiyi təlimlərlə bağlı danışan politoloq bildirdi ki, bu təlimlər razılaşdırılıb:

"Hazırda keçirilən təlimlərlə bağlı razılaşma ötən il əldə olunub. Ötən il ABŞ-la Cənubi Koreya rəsmiləri arasında razılıq əldə olundu ki, Cənubi Koreyaya ABŞ-ın əlavə qoşunları yeridilsin, orada olan baza modernləşdirilsin, radar sistemi qoyulsun. Bununla bağlı Şimali Koreyada narahatçılıq var idi. Şimali Koreya bunu onlara qarşı atılan addım kimi qiymətləndirirdi. Hal-hazırda ABŞ-la Cənubi Koreya arasında ötən il əldə edilmiş proqram həyata keçirilir.

Baş verənlərə görə Şimali Koreya da öz narahatçılığını dilə gətirir".

Baş verən proseslərin III Dünya Müharibəsi ilə nəticələnə biləcəyi ilə bağlı səslənən fikirlərə münasibət bildirən İlqar Vəlizadə əlavə etdi ki, bu real görsənmir:

"Yəqin ki, Şimali Koreya rəsmiləri də başa düşürlər ki, onların arxasında nə Rusiya, nə də Çin dayanmayacaq. Çin Şimali Koreyanın nüvə sınağı ilə bağlı fikirlərinə öz narahatçılığını bildirdi, Rusiya isə kifayət qədər aralı qalır.

Belə bir vəziyyətdə III Dünya Müharibəsi ehtimalları azalır. Lokal müharibə istisna olunmur. Lokal müharibə isə Şimali Koreyanın heç bir yaxın qonşusu üçün maraqlı deyil".

Səxavət Məmməd
Ölkə.Az