Adam bıçaqladığına görə iki il sonra toyda həbs edilən söz ustadının — HƏYAT HEKAYƏSİ

Adam bıçaqladığına görə iki il sonra toyda həbs edilən söz ustadının
11:40
29.11.2017
16456
Mədəniyyət
A
Meyxana aləminə bələd olan elə şəxs tapılmaz ki onun adını bilməsin, yazdıqlarından bixəbər olsun. Əslində, təkcə meyxana aləminə bələd olanlar deyil, hər birimiz bu sənətkarın yazdıqlarını əzbər bilirik. Sadəcə, həmin sətirləri, misraları onun yazdığından xəbərsizik.

"Çağırsa ellər, gedərəm davaya", "Gözləmişəm, gəlməmisən, mən də nişanlanmışam", "Bakılı balasıyam" və sair bu kimi onlarla meyxanaların, mahnıların söz müəllifi Molla Məhəmməddən danışacağıq. 

Əsl adı Məhəmmədqulu olan sənətkar 1950-ci ildə meyxananın beşiyi hesab edilən Maştağa kəndində anadan olub. Uşaqlığı "Sovetski"də və öz kəndlərində keçən gənc 13-14 yaşında ikən yaddaşı, hazırcavablığı, yaxşı mənada hər işə qarışmasıyla seçilir. Elə bu kimi davranışlarıyla da ustadı Hacı Kazım tərəfindən Molla ləqəbini qazanır. Deyilənlərə görə, Hacı Kazım yarızarafat ona tez-tez "mollalıq eləmə" deyirmiş və bu da tədricən meyxanaçının ləqəbinə çevrilir. 

14-15 yaşlarında Molla Məhəmməd artıq özündən çox böyük ustadlarla meyxana deyər, hətta onlardan geri qalmazmış. Əfsanəvi sənətkar Nəsibə Zeynalovanın oğlu Cahangir Novruzovla uşaqlıq dostu olan meyxanaçının "Bizim Cəbiş müəllim" filminə dəvət alması da məşhur aktrisamızın adıyla bağlıdır. Belə ki, gənc Məhəmməd "Çağırsa ellər gedərəm davaya"nı yazıbmış və tez-tez özü üçün deyirmiş. Təbii ki, dostu Cahangir də həmin meyxananı bilirdi və anasının həmin ərəfədə müharibəyə həsr edilmiş filmə çəkildiyindən xəbərdar idi. Meyxana Nəsibə Zeynalovaya göstərilir və o filmin rejissoru Həsən Seyidbəyliylə məsləhətləşir. Qərara alınır ki, meyxana filmə salınsın. Səsyazma olur və bundan sonra Molla Məhəmməd filmə çəkilməkdən imtina edir. Oğlu Xəqaninin dediyinə görə, atası necə deyərlər, o dövrdə dost-tanışları arasında olan hörmətini itirməmək üçün filmə çəkilməkdən imtina edir. Yəni, "sən də artist oldun" kəlməsini eşitməmək istəyi Mollanın çəkilişlərdən imtinasına səbəb olur. Ancaq rejissor məhz Molla Məhəmmədin səsini filmə salır. 

Meyxanaçı Ağamirzə deyir ki, Molla Məhəmmədin onlarla məşhur meyxanaları, mahnı mətnləri olsa da, çoxları bundan xəbərsizdir. 

""Gözləmişəm, gəlməmisən, mən də nişanlanmışam"ı da o yazıb. Rəhmətliyin çox gözəl əlyazmaları var. Deyirdi ki, "Bakılı balasıyam"ı da mən demişəm. Nizami Rəmzi oxuyurdu ki, "Dağlar oğluyam", mən də oxuyurdum ki, "Bakılı balasıyam". Onunla çox məclislərdə olmuşuq. Həddindən artıq iti təbi var idi. Səsi də çox gözəl idi. Onda olan səs bəlkə də yüz meyxanaçıdan birində olub. İndi bəzi lent yazılarını ordan-burdan tapırıq".

Neyçün yaratdın məni pərvərdigara?!
Öldür qurtarım, qaldım avara.

Bu məşhur meyxana da məhz Molla Məhəmmədə məxsusdur .

Bəzi meyxanaçılar kimi Molla Məhəmmədin də yolu məhbəsdən düşüb. Belə ki, 1982-ci ildə Novxanıda bir məclisdə tanımadığı şəxs ona yaxınlaşır və xoşagəlməz sözlər işlədir. Mübahisə yaranır və Molla onu toy çadırının arxasına apararaq iki bıçaq zərbəsi vurur. Çadıra qayıdan meyxanaçı məclis sahiblərinə deyir: "Çadırın arxasında bir nəfəri bıçaqla vurmuşam. Tez xəstəxanaya çatdırın, yazıqdır, ölməsin".

Bu isə meyxanaçının oğlu Xəqaninin dediklərindəndir. Məclis sahibi bir maşınla yaralını xəstəxanaya çatdırır. Başqa bir avtomobillə isə Molla Məhəmmədi aradan çıxarırlar ki, hüquq-mühafizə orqanları onu saxlamasınlar. Təxminən iki il meyxanaçı müxtəlif məclislərdə gizli şəkildə iştirak edir. Ancaq 1984-cü ildə Ağasəlim Çildağla meyxana dediyi məclisdə milis əməkdaşları onu yaxalayırlar. Məhkəmənin qərarıyla ona yeddi il həbs cəzası verilir. Oğlu deyir ki, əslində, vurduğu şəxs şikayətçi olmasaydı, atası daha az cəza ala bilərdi. Amma şikayət olduğu üçün ona yeddi il həbs cəzası kəsilir və beş illik həbsxana həyatından sonra Molla Məhəmməd azadlığa buraxılır.

Oğlu bu barədə danışmaq istəməsə də, öyrəndiyimizə görə həbsxanada olduğu dönəmdə heç bir sənət yoldaşı nə onunla, nə də ailəsiylə demək olar ki, maraqlanmır. Məhz bundan sonra meyxanaçı həmkarlarından incik düşür. Bir daha qeyd edirəm ki, oğlu Xəqani bu barədə qəti şəkildə danışmağa etirzını bildirmişdi. 

Deyilənlərə inansaq, hər zaman iti təbi, şirin avazı və fenomenal yaddaşıyla fərqlənən sənətkarın əsəbləri korlanır. Ancaq həmkarı və tərəf müqabili olmuş Ağamirzə deyilənləri təkzib edir:

"Mən onda bir şey görməmişdim. Həbsdən çıxandan sonra da əvvəlki kimiydi. Şirin, balaca adam idi. Ağasəlimlə dəhşət bir meyxana deyiblər. "Yadıma düşmür harda görmüşəm səni" qafiyəsi Molla Məhəmmədin qafiyəsidir. Ağasəlimlə super meyxana deyiblər. Allah hər ikisinə rəhmət eləsin. Bugünkü meyxanaçılardan Maştağalı Balaəlinin meyxanası, həm də zahiri görünüşü ona oxşayır. Onun səsində rəhmətlik Elçin də var idi". 

Mərhum meyxanaçı Elçindən söz düşmüşkən, bu iki söz ustadının dostluğu barədə mütləq danışmaq lazımdır. Elçin Molla Məhəmməddən təxminən iyirmi yaş balaca olsa da, dostluq edirdilər. Hətta Elçin Mollanı öz ustadı bilirdi. Məşədi Baba ilə Elçin arasındakı məlum davadan sonra Elçinin həyatını itirməsi Mollaya çox pis təsir edir. Hətta baş verən hadisəyə meyxana da ithaf edir:

Məşədi Baba, sən bizi saldın dara,
Vurdun Elçinimə sağalmaz yara.

Molla Məhəmməd təmtəraqdan, dəbdəbədən tamamilə uzaq biriymiş. Hətta oğlunun dediyinə görə yetərincə pul qazanan atasının heç vaxt şəxsi avtomobili də olmayıb:

"Deyirdi ki, kəndin bütün maşınları mənim maşınımdır. Kimə hara desəm aparır. Amma təsbeh həvəskarı idi. Evdə bəzi təsbehləri qalır. Və bir də xeyli əlyazmaları var. Əgər çap olunsa 2-3 kitab edər". 

Molla təkcə meyxanaçılarla deyil, dövrünün məşhur xanəndələriylə də dostluq edirmiş. Ən yaxın dostu isə mərhum Səxavət Məmmədov imiş:

"Atamın dostları çox idi. Əksəriyyəti də sənətkarlar idi. Tez-tez evimizə gəlirdilər. Amma biz atamızın üzünü çox görmürdük. Məclisdən gec qayıdırdı, səhər də durub məclisə gedirdi". 

Qəribədir ki, dostları nə qədər çox olsa da, ömrünün son günlərini yataq xəstəsi kimi keçirən sənətkarı elə öz doğulduğu kənddən olan meyxanaçılar yada salır. Və o 2010-cu ilin 23 fevral tarixində uzun sürən xəstəlikdən sonra vəfat edir. Allah rəhmət eləsin!

\

Hazırladı: İntiqam VALEHOĞLU
Ölkə.Az

ŞƏRH YAZ
0

Antalya Kəpəzdə Azərbaycan şəhidləri abidəsi açılır

Antalya Kəpəzdə Azərbaycan şəhidləri abidəsi açılır
21:43
22.07.2018
775
Mədəniyyət
A
Antalya Kəpəzdə Azərbaycan şəhidləri abidəsi açılır.

"Ölkə.Az"ın məlumatına görə, Kəpəz bələdiyyə başqanı millət vəkili Qənirə Paşayevanın təklifini nəzərə aldıqlarını və yaxın zamanlarda Azərbaycan küçəsi və parkının da açılacağını deyib.

"Azərbaycan Cümhuriyyəti 100, Azərbaycan şəhidlərini anma" tədbirləriində iştirak etmək üçün Antalyaya səfərə gedən millət vəkili, Avrasiya Beynəlxalq Araşdırmalar İnstitutu İB-nin sədri Qənirə Paşayeva Kəpəz bələdiyyə başçısı Hakan Tütüncü ilə görüşüb. Görüşdə bələdiyyə başqanı millət vəkili Q.Paşayevanın, Antalya Qəzeteçilər Cəmiyyəti başqanı Mevlüt Yeni və Antalya Türk Ocakları başqanı Abdullah Uysalın Kəpəzdə Antalyalı Azərbaycan şəhidlərinin adını daşıyan bir abidənin açılması ilə bağlı təklifini yerinə yetirdiklərini və bir neçə gün sonra birlikdə bu abidəni açacağıq deyib.

Millət vəkili Q.Paşayeva Kəpəz bələdiyyə başqanına bu duyarlılığına görə təşəkkürünü bildirib və bu addımın bütün türk dünyası bölgələri üçün gözəl bir örnək olduğunu deyib. Millət vəkili Q.Paşayevanın Kəpəzdə Azərbaycan küçəsinin və parkının açılması, orada Azərbaycanla bərabər Türkiyə və türk dünyası üçün də böyük xidmətləri olmuş aydınların büstünün qoyulması, xatirə lövhələrinin olması və gənc nəsillərimizə onların daha geniş tanıdılması təkliflərinə gəlincə Kəpəz bələdiyyə başqanı onun qısa zamanda reallaşağını bildirib. Azərbaycanı çox sevdiyini deyən Kəpəz bələdiyyə başqanı Hakan Tütüncü ilə Azərbaycan-Türkiyə münasibətlərinin daha da inkişafı istiqamətində, özəlliklə gənc nəsillərimizə ortaq tarix, mədəniyyətimizin öyrədilməsinin vacibliyi ilə bağlı da geniş müzakirələr olub. Q.Paşayeva görüş zamanı Azərbaycanla Türkiyənin bəzi şəhərlərinin və bələdiyyələrinin qardaş şəhərlər və bələdiyyələr olduğunu bildirərək, Kəpəzi də Azərbaycan bölgələrindən biri ilə qardaş olaraq görmək istəyirik deyib.

Kəpəz bələdiyyə başqanı Hakan Tütüncü bələdiyyəyə rəhbərliyi dövründə Azərbaycanla bütün istiqamətlərdə əməkdaşlığın inkişafına xüsusi önəm və diqqət edəcəyini, həmçinin qardaş bələdiyyələr məsələsi ilə də bağlı addımlar atılacağını bildirib. Q.Paşayeva bələdiyyə başqanını Azərbaycana dəvət və görməkdən məmnun olarıq deyib. Görüşdə Q.Paşayeva qardaş Türkiyədə terrorla mübarizədə şəhid olmuş insanlara Allahdan rəhmət, yaxınlarına səbr diləyir, terroru və arxasında duranları lənətləyirik deyib. Azərbaycanın erməni terrorundan çox əziyyət çəkdiyini xüsusi vurğulayan millət vəkili Qənirə Paşayeva terrorla mübarizədə Azərbaycanın hər zaman qardaş Türkiyənin yanında olduğunu deyib və Ermənistanın işğalçılıq siyasəti barədə geniş məlumatlar verib.

"Ancaq mən inanıram ki, biz Azərbaycan və Türkiyə olaraq əl-ələ verib torpaqlarımızı Ermənistanın işğalından azad edəcək və bu cür görüşləri o gözəl torpaqımızda da keçirəcəyik" –, deyə millət vəkili bildirib. İki qardaş ölkə Azərbaycan ilə Türkiyə arasında əlaqələrin daha da inkişaf etməsindən məmnunluğunu ifadə edən millət vəkili Qənirə Paşayeva Azərbaycan bölgələri ilə Kəpəz arasında da bu əlaqələrin getdikcə daha genişlənməsinin vacibliyini qeyd edib. Görüşün sonunda bələdiyyə başqanı millət vəkili Q. Paşayevaya Türk Milli Futbol Klubunun ilk formasını, millət vəkili isə ona Azərbaycan tarixi və mədəniyyətinə aid materiallar hədiyyə edib.

Millət vəkili Q.Paşayeva eyni zamanda Antalyada bir sıra təşkilatların rəhbərləri ilə də görüşüb.

Ölkə.Az

ŞƏRH YAZ
0

Sərxan Sərxan: "Sənətdə heç vaxt pul, şöhrət dalınca qaçmamışam"

Sərxan Sərxan:
13:27
20.07.2018
3237
Mədəniyyət
A
"40 ildir sənətdə, səhnədəyəm. Düz 30 il öncə Əməkdar artist fəxri adına layiq görüldüm. Bu il isə mayın 27-də ölkə prezidenti tərəfindən Xalq artisti fəxri adını aldım. İnanın ki, nə o vaxt, nə də indi xəbərim olmuşdu.Hətta dostlarımdan biri zəng vurub təbrik edəndə bildirdim, niyə tələsirsən, ad günümə hələ 20 gün qalır, qayıdıb dedi ki, ad gününü yox, Xalq artisti adını təbrik edirəm."

"Ölkə.Az" Oxu.Az-a istinaən  xəbər verir ki, bunu tanınmış sənətkar, Xalq artisti Sərxan Sərxan deyib.

O qeyd edib ki, sənətdə heç vaxt pul, şöhrət dalınca qaçmayıb. Xalq artistinin sözlərinə görə, sənətə pulun gözü ilə baxmaq düzgün deyil, sənətə sənət naminə gəlmək lazımdır və yalnız o zaman uğur qazana bilərsən.

Tanınmış sənətçi həm adının, həm soyadının Sərxan olmasına da aydınlıq gətirib.

Bildirib ki, gənc vaxtlarından Bakıdan Moskvaya üz tutmalı olub və o vaxt onu təqdim edərkən aparıcı soyadını söyləməkdə xeyli çətinlik çəkməli olub:

“Mənim gözəl soyadım var - Qurbanbəyov. Sərxan da babamın adıdır. Gördüm ki, soyadımı çəkməyə çətinlik çəkir, rus aparıcıya dedim ki, Sərxan Sərxan de (gülür). Elə ötən əsrin 80-ci illərindən də Sərxan Sərxan oldum və belə təqdim edildim.

Eyni zamanda, Sərxan adı o vaxt yeni və az qoyulan adlardan olduğu üçün mənim pərəstişkarım olan azərbaycanlıların - içərisində Rusiyada, ovaxtkı SSRİ-də yaşayan soydaşlarımız da var - bir çoxu övladlarına Sərxan adı verməyə başladılar. İndi həmin sərxanların bir çoxu ailə-uşaq sahibi olublar”.

S.Sərxan mərhum dövlət başçısı Heydər Əliyevlə bağlı maraqlı xatirəsini danışıb:

“Böyük dövlət adamı olan Heydər Əliyev hər zaman sənətə, sənət adamlarına xüsusi diqqət yetirib. Daim dövlət konsertlərindən sonra səhnənin arxasına gələrək sənət adamları ilə görüşüb, söhbətləşib. Bir gün yenə dövlət konsertlərindən biri idi, Heydər Əliyev konsertdən sonra sənət adamları ilə görüşürdü.

Hamı ilə Azərbaycan dilində danışırdı, mənə çatanda isə rus dilində danışdı. Dedim ki, Heydər Əliyevic, mənimlə də azərbaycanca danışın. O da gülə-gülə və özünəməxsus amiranəliklə dedi ki, o zaman sən də azərbaycanca oxu (gülür).

Bu söz məni əməlli-başlı tutdu. Elə həmin gün bir nəfər televiziyada çalışan dostum mənə bir xeyli şeir təqdim etdi. Əksəriyyəti də Tofiq Bayramın şeirləri idi, özü də hamısı gözəl idi.

Onlardan birini, tez bir zamanda hitə çevrilən “Ay gecikən məhəbbətim” şerini seçdim və ona musiqi bəstələdim, elə həmin gün, bir anın içində... Bu mahnım Azərbaycanla yanaşı, Moskvada, keçmiş SSRİ-də də çox məşhur oldu”.

ŞƏRH YAZ
0
BAĞLA