Adolf Hitler nüvə bombası hazırlayıb

"Ölkə.Az" xəbər verir ki, Oranienburq şəhəri ətrafında tapılan əşya nasistlərin nüvə bombasının komponenti olub. Həvəskar arxeoloqun fikrinə əsasən, radiaktiv metal parçası İkinci dünya müharibəsi dövründə gizli tədqiqat mərkəzinin mövcudluğunu sübut edir. Bu mərkəzdə nüvə silahı hazırlanıb.

64 yaşlı Bernd Talman metal axtaran qurğu ilə xəzinə axtaranda aparat qeyri-adi səs çıxarıb. Bernd tapdığı əşyanı evə aparıb və müvafiq qurumlara məlumat verib. Polis müəyyən edib ki, tapılan əşya şüalanma verir və qonşuluqdakı evlərin 15 sakini təxliyyə edilib. Metal əşya xüsusi konteynerə qoyularaq radiasiya təhlükəsizliyi mütəxəssisləri tərəfindən aparılıb.

Talmana qarşı qanunsuz radiaktiv maddəyə sahib olma maddəsi ilə cinayət işi qaldırılıb. Talman əşyanı harada tapdığını deməkdən imtina edib. Hakimiyyət nümayəndələrinin açıqlamasına əsasən, həvəskar arxeoloq Oranienburq rayonunda nasistlərin gizli plutonium silah mərkəzini tapmaq istəyib. Bu mərkəzdə Hitlerin planına əsasən nüvə silahı istehsal edilməli idi.

Almaniya ilk dəfə 1939-cu ildə nüvə silahı istehsal etməyə başlayıb. Amma almanlar bu işin öhdəsindən gələ bilməyib. ABŞ isə 1943-cü ildə "Manhetten layihəsi"nə start verib. Nəticədə nüvə silahı yaranıb.

Hikmət Həsənov
Ölkə.Az