Afətin mahnısı və beş ailənin çörəksiz qalması

 

İki gündür hansı sosial şəbəkəni, saytı açırsan, qarşına ya Aysel Əlizadə söhbəti çıxır, ya da Şəkidə beş nəfər tibb işçisinin Afət Fərmanqızının mahnısına çəkdiyi "klip" üzündən işdən qovulması xəbəri. Aysel məsələsində xəmirin hələ çox su aparacağını nəzərə alıb, ikinci məsələ üzərində daha çox dayanmağı lazım bilirəm. 

Deməli, Şəki Mərkəzi Rayon Xəstəxanasının beş əməkdaşı Afət Fərmanqızının "Sığmazam" qəzəlinə oxuduğu mahnıya 10-12 saniyəlik "klip" çəkiblər. Bir anlıq özümüzü bakılı kimi hiss etsək, buna dilxoşluq etmək də deyə bilərik. Məsələyə əvvəlcə Səhiyyə Nazirliyi münasibət bildirib. Deyiblər ki, bu hadisə Şəki Mərkəzi Rayon Xəstəxanasında baş həkimlə işçilər arasında yaşanan məsələdir. Əgər işçilər hüquqlarının pozulduğunu düşünürsə, aidiyyəti üzrə məhkəməyə müraciət edə bilərlər.

Hadisəyə bax e. Bu ölkədə həkim xəstənin sağ ayağının əvəzinə sol ayağını kəsir Səhiyyə Nazirliyindən bir Allah bəndəsi tapıb danışdırmaq mümkün olmur. Amma indi bu məsələ hadisə olur. Əslində, nazirlikdən o açıqlamanı verən kimdirsə haqlıdır. Çünki belə bir şeyə görə beş ailəni çörəksiz qoymaq özlüyündə böyük hadisədir. Özü də Şəki kimi işin çətin tapıldığı bir yerdə. İndi orasını deyə bilmərəm ki, xəstəxananın baş həkimi Elçin Əmirov həmin beş yerə hansı dost-tanışının, qohum-əqrəbasını təyin edəcək. 

Elçin Əmirov deyir ki, həmin beş nəfər ayın 5-i videonu cərrahi blokda çəkiblər. Rəhmətliyin nəvəsi, hansı cərrahi blokdan danışırsan? Şəkidə birinin əlinə çöp batanda gətirib Bakıda əməliyyat etdirirlər. Doğrudan o xəstəxananın əməliyyat bloku da varmış? Elçin doxdur (Şəkililərin öz ləhcəsində yazıram) bu hərəkəti tibb işçilərinə yaraşdırmayıbmış və ardınca əlavə edibmiş ki, işdən çıxarılanlar həkim yox, tibb bacısı və xadimələrdir. Yəni, söhbətin qısa məzmunu belədir ki, çox da şişirtməyin, onsuz da həkim deyillər ki. Amma baş doxdur unudur ki, indiki məqamda elə məhz o beş nəfərin işə daha çox ehtiyacı var. Çünki hansı xəstəxanaya gedirsən, müayinə başlamamış səni "sağırlar". Həmin o "sağıcılar" da yəqin razılaşarsınız ki, tibb bacısı, yaxud xadimə olmur. Onlara həmin "sağından" ən yaxşı halda 2-3 manat ya düşə, ya düşməyə. 

Elçin doxdurun bir sözü elə xoşuma gəldi ki. İşçilərə deyib ki, iş saatlarında bu kimi davranışlara yol vermək olmaz. Baş həkim belə olar e. Elə bircə kəlmə deyən kimi qadınlar da ərizələrini yazıb işdən çıxıblar. Özü də beşi birdən. Ümumiyyətlə, bu işdə nəsə bir mistika görürəm. Səhiyyə Nazirliyi demiş, hadisə ayın 5-i olub, hadisəni beş nəfər törədib və iş saatı olduğundan saat 5-də törədilmək ehtimalı da yüksəkdir. 

Elçin doxdurun prinsipiallığını da çox bəyəndim. Deyib ki, həmin şəxslərin işə bərpası mümkün deyil. Pahhh! Vallah, çox böyük vəzifə sahibi demirəm, nazirlikdəki məsləhətçilərdən biri, yaxud elə Şəkinin icra hakimiyyətindən şöbə müdiri, müavin zəng vursa, qorxudan ərizə yazıb özünüzü də işdən çıxardacaqsız. Yəni, açıqlamalarda ağdamlıların sözü olmasın, yekə getməyə tələsməyin. Başa düşürəm, beş vakant yer baş həkim üçün balaca hadisə deyil. O beş yerin...nəysə... nuş olsun! 

Yəqin ki, o baş doxdur məndən bir neçə bayram böyük olar. Məsləhət kimi çıxmasın, məsələ çox şişməmiş (?) qadınları işlərinə bərpa edin. Onsuz da bu ölkədə ən hörmətsiz sahələrdən biri səhiyyədir. Niyəsini yuxarıda sadaladım. Çünki özünüz hörmətsiz etmisiniz. Sağ göstərib  sol kəsməklə, ana və uşaq ölümlərinin hər gün artan sayıyla, baytar qədər savadı olmayan baş həkimlərlə... Baş həkimi olduğunuz xəstəxana dərindən araşdırılsa, orada tibbdən başqa hər işlə məşğulsunuz bəlkə də. Şəki Mərkəzi Rayon Xəstəxanasının adını google-da yazıb axtarış verəndə adamın qarşısına ancaq ölüm faktları çıxır. Onları da bu beş qadın öldürüb? Bilirəm ki, kollektivə imza da toplatmısınız, bu beş qadın barədə izahatlar, ərizələr də yazıb hazır qoymusunuz. Amma sizi inandırıram və əmin edirəm ki, o cür çörəyi yemək məsləhət deyil. Balalara o çörəyi yedirtmək ümumiyyətlə tövsiyyə olunmur. 

Ölkə.Az