Mətn ölçüsü:
  • 100%

Alimlərin ev qovğası böyüyür: AMEA-ya qarşı sərt ittihamlar

Alimlər üçün tikilən binadan ev ala bilməyən elmi işçilərlə Azərbaycan Milli Elmlər Akademiyasının rəhbərliyi arasında gərginlik davam edir. Daha öncə də xəbər verdiyimiz kimi bir qrup elmi işçi AMEA-nın Rəyasət Heyətinin müvafiq göstərişi ilə yaradılmış mənzillərin bölüşdürülməsi komissiyasının qərarından narazıdırlar və onlar bununla əlaqədar daha öncə AMEA-nın qarşısında aksiya da keçiriblər. 

Ölkə.Az bildirir ki, musavat.com-un bu barədə yazdığı məlumatdan sonra AMEA-nın İşlər İdarəsinin müdir müavini, komissiyanın katibi Sərdar Əliyev akademiyada yaranmış mənzil problemi ilə əlaqədar qafqazinfo.az saytına açıqlama verib. 

S.Əliyev bildirib ki, araşdırma zamanı məlum olub ki, yataqxanada qeydiyyatda olub yaşayan və ya adına otaq olub yaşamayan 107 ailə var: "Onlardan 71 ailə AMEA-da işləyən, 36 ailə isə AMEA-da işləməyənlərdir. AMEA-da işləyən 71 ailədən 6-sı elmlər doktoru, 45-i isə fəlsəfə doktorudur. Bunlardan əlavə AMEA-da işləyən 48 əməkdaşın ailəsinin də (onlardan 34-ü fəlsəfə doktoru, 1-i elmlər doktorudur) 20 ildən artıq müddətdir ki, yataqxanada qeydiyyatda olduğu lakin boş otaq olmadığına görə orada yaşamadıqları müəyyən edilib. Bu əməkdaşlar da mənzil almağa iddialıdırlar. Onlar hesab edirlər ki, uzun illərdir kirayələrdə yaşamaq məcburiyyətində qaldıqlarına görə yataqxanada yaşayanlardan daha çox maddi və mənəvi sarsıntılara məruz qalmışlar. Hazırda onların da sənədləri araşdırılır.

71 AMEA əməkdaşından 17-sinin mənzil almağa hüququnun olması məsələsində problemlər yarandığını təsdiq edən sənədlər və məlumatlar toplanıb. Qalan 54 ailənin isə mənzil almağa hüququ olduğu müəyyən edilib. Yeni yaradılmış komissiya tərəfindən 13 iyun 2017-ci il tarixində püşkatma yolu ilə 54 mənzilin bölgüsü aparılmış və hazırda sənədləşmə işləri davam etdirilir. Mənzil bölgüsü zamanı əməkdaşların elmi dərəcəsi, ailə vəziyyəti və ailədə imtiyaz verən digər hallar nəzərə alınıb".

Narazı elmi işçilər bu açıqlama ilə də razılaşmayıb, S.Əliyevin həqiqətə uyğun olmayan açıqlama verdiyini iddia edirlər. Bununla bağlı hüquqlarının pozulduğunu bildirən 49 nəfər elmi işçi musavat.com-a müraciət edərək, narazılıqlarını aşağıdakı formada bildiriblər: "16 iyul 2013-cü ildə AMEA-nın 147 saylı sərəncamı ilə yaranmış komissiyanın araşdırmaları zamanı yataqxanada yaşayan, AMEA-da işləyən sakinlər hər biri iş yerlərindən arayış təqdim ediblər. Çox keçmədən AMEA-da kütləvi işdən çıxarılmalar və eyni zamanda institutların bağlanması ilə əlaqədar olaraq onlarla sakin işsiz qalıb. Və bu gün evsiz qalan deyildiyi kimi AMEA-da işləməyən sakinlər AMEA-nın həmin qurbanlarıdır. Bunların içərisində 10-a yaxın fəlsəfə elmləri doktoru da var. Biz dəfələrlə rəsmi müraciət etmişik, açıqlama istəmişik. Bu günə kimi sakinlərə heç bir rəsmi açıqlama verilməyib. Bunu araşdırmaq çətin deyil. AzərPoçt vasitəsilə sübut etmək olar. Yataqxanada qanuni hüquqları olmadan yaşayan sakinlərə xəbərdarlıq edən AMEA niyə bu qədər müddətdə susmuşdu? Niyə təmizləmə işlərini 25 ildən sonra yataqxana sakinlərinin mənzil şəraitinin yaxşılaşdırılması sərəncamı ilə tikilən mənzillərin bölgüsü prosesi müddətində aparmağa qərar verib? Halbuki, bu tikintinin həyata keçirilməsi üçün icazə məhz bu sakinlərin imzası sayəsində verilib. Bu həmin sakinlərdir ki, tikinti prosesi zamanı 5 ildir yaranmış bütün çətinliklərə, maddi və mənəvi psixoloji zədələrə məruz qalıblar. Ümidlə alacağı evi gözləyən, evsiz qalan yataqxana sakinlərinin problemləri kiçildilir, ancaq Şərifzadə 12 ünvanında qeydiyyatda olub, kənarda öz evində yaşadığı halda, kirayədə qaldığı iddia edilən 48 əməkdaşın mənzil problemi qabardılmış şəkildə önə çıxarılır. Fikrimizcə bu "qayğıkeşlik" bizlərə verilməli mənzillərin bir hissəsini yataqxanadan kənarda yaşayan bu əməkdaşlara qeyri-rəsmi maddi qarşılıq hesabına verəcəklərini yaxşı bildiklərindən irəli gəlib".

Elmi işçilər həmçinin bildiriblər ki, 13.06.2017-ci ildə AMEA-nın apardığı ev bölgüsü 03.09.2014 il 416 saylı sərəncamı ilə yaradılmış komissiyanın araşdırılmış nəticələrinə görə deyil: "24.05.2017-ci il tarixdə 8/21 qərarı ilə AMEA-nın vitse-prezidenti və AMEA Azad Həmkarlar təşkilatının rəhbərliyi altında yaradılan yeni komissiyanın nəticələrinə əsasən aparılıb. Belə bir komissiyanı təşkil edən İsa Həbibbəyli daha da irəli gedərək Qafqazinfo.az saytına 22.06.2017 tarixində verdiyi müsahibədə "mənzil davası edələrin hamısı ağıllı deyil ki" ifadəsini işlətməklə onsuz da haqsızlığa uğramış sakinləri yenidən hiddətləndirib. Hesab edirik ki, komissiyalar yaratmaq bu problemlərdən fikir yayındırmaq üçün ortaya atılan bir pərdədir. AMEA-nın apardığı islahatlar nəticəsində işsiz qalan sakinlər bu gün evsiz qalmağa məhkumdurlarmı? AMEA-nın sabiq rəhbərliyi dövründə bağlanmış müqavilədə yataqxanada yaşayan sakinlərə veriləcək mənzillərin sayının və sahəsinin göstərilmədiyini qeyd edən rəhbərlik kimi səriştəsizlikdə günahlandırır? Bina sakinlərini yoxsa keçmiş rəhbərliyi? Halbuki yataqxanada yaşayan 118 sakinin iştirakı ilə 08.11.2012 keçirilmiş iclasda şirkət nümayəndəsi kimi təqdim edilən, hazırda tikintiyə rəhbərlik edən, şirkət tərəfindən "heç kimdir" adlandırılan Bəxtiyar Təhməzov da şirkət adından şirkət nümayəndəsi kimi iştirak edib. Sakinlərin razılığı ilə təklif olunan sahə () göstərilib, Bizim üçün nəzərdə tutulan xüsusi eskiz layihəsi hazırlanıb. Hazırda keçirilən bölgü həmin binada deyil. Bakı şəhəri İcra Hakimiyyətinin 03.09.2014-cü il 416 saylı sərəncamı ilə tikilən I bloklu 16 mərtəbəli binada aparılıb. AMEA-nın "günaşırı" yaratdığı komissiyalar hansı məsələnin ciddiliyini araşdırıb və hansı ehtiyacdan yaranıb? Nə üçün 16 iyul 2013-cü ildə 147 nömrəli sərəncamla yaradılan komissiyanın nəticələri əsassız sayılıb?"

Məsələ ilə bağlı elmi işçilər AMEA rəhbərliyinə qarşı sərt ittihamlar da söyləyiblər: "Belə nəticəyə gəlinir ki, AMEA 118 ailəni yataqxanada, dözülməz şəraitdə maddi, mənəvi, psixoloji zərbə altında saxlamaqla öz niyyətini həyata keçirmək məqsədini güdüb. Belə ki, şirkətdən daha çox mənzil qoparmaq niyyəti ilə yataqxana sakinlərinin həyatını tikinti zamanı texniki təhlükəsizlik tədbirləri görülməməsinə göz yumaraq, 5 il açıq təhlükəyə məruz qalmasına icazə verib. Nə qədər absurd olsa da şirkətdən istədiyi sayda mənzil qoparmağı bacaran AMEA-nın səlahiyyətli nümayəndələri bizi "ev haqqı olmayan sui-istifadəçi" adlandırır və öz əsl niyyətini məharətlə gizlətməyə çalışaraq bu gün bizi yaşadığımız mənzilləri boşaldıb təhvil verməyimizi tələb edir. 

AMEA-nın bu problemlərlə bilavasitə məşğul olan səlahiyyətli nümayəndələri hüquqları kütləvi şəkildə pozulmuş yataqxana sakinlərinin duyğu və emosiyaları ilə oynayaraq, ölkəmizdə mövcud olan və Respublika Prezidenti tərəfindən həssaslıqla qorunan insan haqlarına qarşı mənfi fikir formalaşdırmağa çalışmaları açıq-aşkar görünür".

Bayram günü olduğu üçün səslənən ittihamlarla bağlı adıçəkilən şəxslərin münasibətini öyrənmək cəhdimiz baş tutmadı.