"Amrahbank"da kredit özbaşınalığı — ŞİKAYƏT

14:57
20.10.2017
465
Ölkə
A
“Məqsədim insanları “Amrahbank”da baş alıb gedən özbaşınalıqdan xəbərdar etmək, eləcə də, müvafiq dövlət orqanlarının diqqətini cəlb etməkdir. Bu günə kimi bank əməkdaşları tərəfindən açıq-aşkar aldatma görməmişdim”.

"Ölkə.Az" xəbər verir ki, bunu Oxu.Az-a açıqlamasında 2015-ci ildə “Amrahbank”dan 36 ay müddətinə illik 22 faizlə 45 000 dollar məbləğində kredit götürən Seid Əkbərli bildirib. O qeyd edib ki, o zaman kreditin təminatı kimi atasına məxsus evi girov qoyub. Lakin 2015-ci ildə baş verən devalvasiyadan sonra ödənişləri etməkdə çətinlik çəkib: “Devalvasiyadan sonra banka olan əsas borcum 38 219 dollar, faiz borcum isə 11 543 dollara yüksəldi. Mən ilk gündən bankla razılığa gəlmək istəsəm də, nəticə vermədi. “Amrahbank” işin məhkəmə qaydasında həll olunması üçün Nərimanov rayon Məhkəməsinə müraciət etdi”. 

Seid Əkbərli ona qarşı əsl saxtakarlıqların Maliyyə Bazarlarına Nəzarət Palatasının baş icraçı direktoru İbrahim Alışovun adına "Amrahbank" idarə heyətinin sədri Emil Həsənov tərəfindən imzalanmış məktubdan sonra başladığını deyir: “Məktubda göstərilirdi ki, borcun bağlanması üzrə güzəştlərin alınması üçün kredit götürdüyüm bankın Azadlıq filialına müraciət etməliyəm. Bunun ardınca avqust ayının 16-da bankdan mənə zəng gəldi və razılığa gəlmək istədiklərini bildirdilər. Həmin gün “Amrahbank” ASC-nin Azadlıq filialının müdiri Orxan Qurbanov və bankın Müşahidə Şurası sədrinin müşaviri Ülvi İldırımzadə ilə görüşdüm. İldırımzadə mənə  50000 dolları manata nisbətlə 1,08 məzənnəsi ilə 54000 manat birbaşa ödəməyi təklif etdi. Bildirdi ki, birbaşa ödədiyim halda borc tamamilə bağlanacaq, mənzilin girovdan azad edilməsi ilə bağlı məktub veriləcək. Mənə güzəştin necə verilməsi barədə sualıma Ülvi İldırımzadə “bu, yuxarının tapşırığıdır” deyə cavab verdi. Məzənnədə güzəşt etdiklərinə görə razılaşdım və maliyyə imkanlarımı qiymətləndirmək üçün onlardan 3 həftə vaxt istədim. Mənə o da bildirildi ki, əgər tam məbləğ alınmasa, borcun qalan hissəsini 1.08 manat güzəştli məzənnə ilə hesablayıb, gələcəkdə ödəniş etmək üçün krediti yenidən rəsmiləşdirəcəklər".

Bank müştərisinin sözlərinə görə, borc-xərc taparaq avqustun 31-də deyilən məbləği ödəyib: “Onlardan borcun olmaması barədə sənədi və mənzilin girovdan azad olunması ilə bağlı məktubu istədikdə dedilər ki, idarə heyyətinin sədri burada yoxdur. Bayramdan sonra məktubları imzalatdırıb, mənə tədqim edəcəklər. Deyilən vaxtda məktubları götürmək məqsədilə banka yaxınlaşdıqda Problemli Kreditlər Departamentinin direktoru Vəli İsmayılov mənə idarə heyətinin sədrinin məktubları imzalamadığını dedi. Əlavə etdi ki, borcu mövcud məzənnə ilə bağlamalıyam”.

S.Əkbərli deyir ki, aldadılması ilə bağlı, Ülvü İldırımzadə ilə dəfələrlə görüşmək istəsə də, qarşı tərəf bundan qaçıb.

Şikayətçi bildirir ki, onun banka ödədəyi 54 000 manat isə faiz və cərimə borcundan silinib: “Onu da qeyd edim ki, mən 54 min manatı banka dollar şəklində aparsam da, onlar ödənişi manatla qəbul ediblər. Ödəniş zamanı isə yenidən dollara konvertasiya etdilər. Beləliklə, 8 faiz də uduzmuş oldum”. 

ŞƏRH YAZ
0

Azərbaycanda təhlükəli qrip var?

Azərbaycanda təhlükəli qrip var?
21:14
Bu gün
1287
Ölkə
A
Hazırda Azərbaycanda kəskin respirator virus infeksiyaları və qriplə bağlı epidemioloji vəziyyət sabitdir.

"Ölkə.Az" xəbər verir ki, bunu Trend-ə Respublika Gigiyena və Epidemiologiya Mərkəzinin Hava-damcı infeksiyaları bölməsinin həkim-epidemioloqu Nəzmiyyə Brumendfard deyib.

Onun sözlərinə görə, bu il ağır kəskin respirator virus infeksiyalarına yoluxanların sayında artım müşahidə edilməyib və infeksiyalara yoluxanların builki sayı ötənilki səviyyədədir.

N.Brumendfard əlavə edib ki, ötən il Azərbaycanda ağır kəskin respirator virus infeksiyalarına yoluxan insanların 78-də qrip aşkarlanmışdı: “Onlarda da adi qrip - “B” qripi olub. Bu qrip pandemik qrip virusu hesab olunmur. Azərbaycanda qrip virusu dövr edirsə, bu, diqqətdən yayına bilməz. Hələ ki, ölkə ərazisində kəskin respirator virus infeksiyaları və qriplə bağlı narahatlıq yoxdur, vəziyyət stabildir”.

Mərkəz rəsmisi qeyd edib ki, son illər ərzində Azərbaycanda daha təhlükəli olan “A” tipli qripə yoluxma halı aşkarlanmayıb:

“Azərbaycanda hələ ki, təhlükəli qrip növü aşkarlanmayıb. Bu il mövsüm yeni başladığından hələlik kəskin respirator virus infeksiyalarına yoluxma halı da qeydə alınmayıb”.

N.Brumendfard payız-qış mövsümündə bəzi xəstələrin qoruyucu steril maskalardan istifadə etməməsinin də kəskin respirator virus infeksiyalarının yayılmasında mühüm rol oynadığını söyləyib:

“Bizdə əhali xəstələndikdə qoruyucu maska taxmır, maska taxmağa utanırlar. Əgər xəstə insan maska taxmırsa, onda sağlam insan maska taxaraq özünü infeksiyadan qorumalıdır. Maskalar 4 saatdan bir yenisi ilə dəyişməlidir. Əks halda, xəstə insan özünün tənəffüs yollarından gələn infeksiya ilə yenidən infeksiyaya yoluxa bilər”.

Ölkə.Az

ŞƏRH YAZ
0

Azərbaycanın 41 rayonunda ailə təsərrüfatları yaradılır — FOTO

Azərbaycanın 41 rayonunda ailə təsərrüfatları yaradılır
19:45
Bu gün
2629
Ölkə
A
Əmək və Əhalinin Sosial Müdafiəsi Nazirliyi və Heydər Əliyev Fondunun “Regional İnkişaf” İctimai Birliyi arasında özünüməşğulluq proqramının icrası sahəsində əməkdaşlığa dair imzalanan memoranduma əsasən icra olunan “Sosial bağlar” layihəsi çərçivəsində sosial cəhətdən həsas qruplar üçün meyvə bağlarının salınması, tərəvəz və bostan məhsulları istehsalı üzrə ailə təsərrüfatlarının yaradılması işləri davam etdirilir.

Nazirlikdən "Ölkə.Az"a verilən məlumat görə, layihə Prezident İlham Əliyevin müvafiq sərəncamına əsasən icra olunan özünüməşğulluq proqramına dəstək məqsədi daşıyır.

Layihə çərçivəsində respublikanın 41 rayonu (Tərtər, Ağdam, Bərdə, Füzuli, Quba, Xaçmaz, Qusar, Siyəzən, Şabran, Ağdaş, Kürdəmir, Yevlax, Beyləqan, Ucar, Siyəzən, Salyan, Sabirabad, Qobustan, Ağsu, İsmayıllı, Şəmkir, Daşkəsən, Samux, Ağstafa, Qazax və s.) üzrə 125 ailə üçün təsərrüfatlar yaradılır.

Quba, Xaçmaz, Qusar, Siyəzən, Şabran rayonlarında da 17 nəfər üçün layihə çərçivəsində bağ sahələrinin salınması nəzərdə tutulub. Həmin rayonlarda bağların salınması üçün ayrılmış sahələrdə yeni ağacların əkilməsinə hazırlıq işləri çərçivəsində ilk növbədə bəzi sahələr bar verməyən qurumuş ağaclardan, kötüklərdən, kollardan təmizlənir. Həmçinin bağların salınması üçün digər sahələrin şumlanması və çəpərlənməsi işləri görülür.

“Sosial bağlar” layihəsi iştirakçılarından 30 nəfəri şəhid ailəsi üzvləri, 28 nəfəri əlilliyi olanlar, qalanları aztəminatlı ailələrin üzvləridirlər. Layihəyə cəlb edilənlər üçün alma, gilas, qoz, gavalı və s. meyvələr üzrə bağların, tərəvəz və bostanların salınması işləri həyata keçirilməklə, sahələrə aqrotexniki qulluq, suvarma, təlimləndirmə, logistika və hazır məhsulun marketinqinin təşkili, məsləhət xidmətlərinin göstərilməsi, eləcə də digər sahələrdə də onlara dəstək göstəriləcək.

Layihəyə cəlb olunan vətəndaşlar üçün ilk mərhələdə müvafiq fəaliyyət sahələri üzrə bilik və bacarıqların aşılanması məqsədilə təlim kursları təşkil edilib. Kursları bitirərək biznes planlarını uğurla müdafiə edən şəxslərin layihə üzrə təsərrüfatlarının yaradılmasına başlanılıb.

Aztəminatlı ailələrin özünüməşğulluğunun təmin olunmasına və gəlirlərini artırmalarına imkan verən layihə belə ailələrin ünvanlı dövlət sosial yardımı proqramından asılılığının aradan qaldırılmasına və kiçik sahibkarlığa çıxış imkanlarına yiyələnmələrinə şərait yaradır. Eyni zamanda, layihə üzrə yeni bağçılıq sahələrinin yaradılması qeyri-neft sektorunun mühüm sahəsi olan kənd təsərrüfatının inkişafına əlavə dəstəkdir.

Xatırladaq ki, cari ildə özünüməşğulluq proqramı çərçivəsində ölkə üzrə 7 minədək ailənin kiçik ailə təsərrüfatlarının yaradılması planlaşdırılıb. Bunun üçün işsizlikdən sığorta fondunun 2018-ci il üzrə büdcəsindən 35,8 milyon manatın ayrılması nəzərdə tutulub. 

Ölkə.Az

ŞƏRH YAZ
0
BAĞLA