\"Apple\" məhsullarının qiymətlərində artım olmayacaq

"Ölkə.Az" techynote-yə istinadən xəbər verir ki, ABŞ və Çin hökumətləri öz aralarında ilkin ticarət razılaşmasını əldə ediblər.

Həmin razılşmaya əsasən import məhsullar üçün nəzərdə tutulmuş əlavə dövlət rüsumları ləğv ediləcək. Bu barədə Bloomberg saytı xəbər verib.

Qeyd etmək lazımdır ki, 15 dekabr tarixindən başlayaraq ümumi dəyəri 160 milyard dollar olan Çin çəhsulları üçün ABŞ hökuməti əlavə dövlət rüsumları təyin edəcəkdi. Bunun nəticəsində ABŞ bazarı üçün nəzərdə tutulmuş məhsulların satılmasına görə Çin şirkətləri əlavə vəsait ödəməli olacaqdılar.

Bu, həmçinin öz məhsullarını Çində istehsal edən ABŞ şirkətlərini də əhatə edirdi. Belə ki, Çində məhsul istehsalı daha ucuz başa gəlir. Bu yeni qanun öz məhsullarını Çində istehsal edən "Apple" şirkətinə də şamil olunacaqdı.

Şirkət artıq kiçik məhsul və komponentlərə görə əlavə dövlət rüsumu ödəyir. Lakin yeni qanun həmçinin şirkətin "iPhone", "iPad", "MacBook" modellərini və digər məhsullarını əhatə edəcəkdi. Analitiklər qeyd edirdilər ki, bu halda şirkət ya "iPhone" modellərinin qiymətlərini qaldırmaq məcburiyyətində qalacaqdı, ya da vəsait itkisi yaşamalı olacaqdı.

İlkin variantda "iPhone"ların qiymətləri 150 dollar bahalaşa bilərdi. Bu isə öz növbəsində 2020-ci ildə "iPhone"lara tələbatın 6-8% aşağı düşməsinə səbəb olacaqdı. İkinci halda şirkətin bir səhmdən əldə etdiyi gəlir 4% aşağı düşəcəkdi.

Qeyd edək ki, "Apple" şirkətinin CEO-su Tim Kuk dəfələrlə ABŞ Prezidenti Donald Trampdan xahiş edirdi ki, o, həmin əlavə dövlət rüsumlarını təyin etməsin və ya şirkətlər üçün bəzi güzəştlər etsin. Bir çox şirkətlər hətta bu məsələ ilə bağlı öz istehsalat güclərini Çindən digər regionlara keçirilməsini də planlaşdırırdılar.

Ölkə.Az