\"Aprel hadisələrindən də ağır hadisələr baş verə bilər\"

Son zamanlar Azərbaycan ordusunun keçirdiyi təlimlər erməni tərəfini narahat edir. Ermənistan Azərbaycanın müharibəyə hazırlaşdığını iddia edir. Hətta təlimlərin bəhanə olduğunu, təlim adı altında cəbhə bölgəsinə əsgər və silah, sursat yığıldığını iddia edirlər.

Azərbaycan tərəfinin təlimləri və ermənilərin narahatçılığı barədə hərbi ekspert Üzeyir Cəfərov "Ölkə.Az"-a danışıb:

"Azərbaycan əsla gizlətməyib ki, ordunu ölkə suverenliyinin təmini üçün hazırlayırıq. Ölkə rəhbərliyi nə zaman qərar verəcəksə, o vaxt da silahlı qüvvələr üzərinə düşən missiyanı yerinə yetirəcək. Erməniyə, rusa fikir verməməliyik.

Ermənistan beynəlxalq hüquq normalarını pozub, Rusiya isə ona havadarlıq edir. Azərbaycan tərəfi heç kimdən çəkinməməli və heç kimdən icazə almamalıdır. Azərbaycan tərəfi öz təlimlərini keçirməlidir və keçirir də. Təlimlərin miqyası gələn il daha da genişlənəcək. Hətta ola bilər ki, ordu təlimi döyüşdə keçsin.

Təlimlərin real döyüşlərə çevrilməsinə gəldikdə isə, hərbi ekspert bildirdi ki, bu ermənilərin özünü aparmasından asılıdır:

"Azərbaycan Ermənistanın nazı ilə çox da oynayan deyil. Aprel hadisələrindən də ağır hadisələr baş verə bilər. Bunu ermənilər də, ruslar da gözəl bilirlər".

Cəbhə xəttində gərginliyə gəldikdə isə Üzeyir Cəfərov bu gərginlyin səbəbkarlarının Ermənistan və ATƏT olduğunu qeyd etdi.

Səxavət Məmməd
Ölkə.Az