Atatürk və sultan Vahdettinin gizli sövdələşməsi — Osmanlı dərin dövlətinin planı

Atatürk və sultan Vahdettinin gizli sövdələşməsi
16:00
19.05.2018
21173
Maraqlı
A
19 may 1919-cu il Türkiyə Cümhuriyyətinin tarixindəki dönüş nöqtələrindən biridir.

“Ölkə.Az” xəbər verir ki, Atatürkün Samsuna ayaq basdığı gün Türkiyədə “Gənclik və idman bayramı” kimi qeyd edilir.

Atatürk milli mübarizə dövründə türk millətini irəli aparacaq və köhnə fikirlərin əleyhinə çıxış edəcək insanların gənc fikirlər olduğunu görmüşdü. Bu səbəbdən də gənclik anlıyışı Atatürk üçün başqa bir önəmə sahib olub.

1919-cu ilin 19 may tarixində Mustafa Paşa Samsuna ayaq basdı. Türk milləti birinci dünya müharibəsindən məğlub ayrılmışdı. Bu səbəbdən pis şərtlərdən qurtulmaq üçün çarə axtarırdı. Bu zaman lider Mustafa Paşa Samsuna gedərək “Qurtuluş” yolunu açdı. Atatürkün 16-19 may tarixlərində İstanbuldan Samsuna səfəri əslində qurtuluş dövrünün simvoludur.

Samsun işğalçılar üçün önəmli mərkəzlərdən biri idi. Stratejik cəhətdən də böyük önəmə sahib şəhər Qara dənizdən Anadoluya gedən ən rahat və güvənli bir qapı idi. 9 mart 1919-cu ildə ingilislər Samsuna hərbi birləşmələr yerləşdirdilər. Buna etiraz olaraq Hamdi adlı leytenant əskərləri ilə birlikdə dağa çıxdı. İngilislər isə türklərin silahlandığını eşidərək bölgəyə etibarlı bir komandir göndərmək qərarına gəldi. Bu, Mustafa Kamal idi. Atatürk uzun müddət ölkənin vəziyyətinə görə məyus idi və nəsə etmək üçün Anadoluya keçmək istəyirdi. Bu isə onun üçün əla fürsət idi. Bu zaman onun Sultanla gizli sövdələşməsi olub.

 

Vahdettin Sultan və Mustafa Kamalın münasibətləri barədə bu günə qədər çox müzakirələr aparılıb. Bəzi insanlar bunu cəfəngiyyat, bəziləri isə reallıq adlandırır. Amma məsələ uzun illər ciddi tədqiq olunmadığı üçün xəlifə, sultan 4-cü Vahdettin illər boyu vətən xaini elan edilmişdi.

Amma tarixin gizlinlərini araşdırdıqca ortaya yeni sənədlər çıxıb. Yeni sənədlərə əsasən, Mustafa Kamalı Samsuna göndərən Sultan olub və bu vəzifə Anadolunu toplamaq, müharibənin vurduğu zərbələrdən başıpozuq qalmış xalqı bir yerə yığmaq üçün verildiyi aydın olur.

Ölkə.Az bu gün oxucularına Atatürkün Sultanla gizli sözləşməsini, Kamal Paşanın Osmanlı dərin dövlətinin adamı olduğunu iddia edən yazıçı Fatih Bayhanın və digər türk tarixçilərinin məsələ ilə bağlı fikirlərini çatdıracaq.

Atatürkün böyük sirri və niyə məhz o?

Bayhanın “Atatürkün böyük sirri” kitabında bu məsələyə toxunulub. 1922-1923-cü illərdə fəaliyyət göstərən 1-ci Məclisin gizli iclas stenoqramlarına əsasən, “xəlifəyə əmanəti təqdim etmək və biyət etmək üçün nümayəndə heyəti İstanbula göndərilib”. Yeni sənədlər sultan Vahdettinin xain olmadığını sübut edir.

Belə bir sual ortaya çıxır: Niyə Mustafa Kamal? Niyə Kazım Karabekir, İsmet Paşa, Refet Bele yox, məhz Kamal Paşa seçilmişdi? Paşanın rəqibləri çox idi. Seçildiyi dövrdə “İttihati Terakki” cəmiyyəti ilə əlaqəsi olsa da, sonradan bu əlaqəni qırır. Çünki buna məcbur idi. “İttihati Terakki” cəmiyyətinin bütün siyasi proqramı başa çatmışdı və yeni dövr başlayırdı.

Sultanla Atatürkün andı

Sənədlərə əsasən, Sultan Vahdettin Mustafa Kamal ilə Samsuna hərəkatdan bir gün əvvəl, son gecə diz-dizə oturaraq and içiblər. Paşa ilə Sultanın sözləşməsi belə idi: “Vahdettin vətəni qorumaq üçün İstanbulda düşmən dövlətlərin diqqətini çəkəcək, sülh və anlaşma bəhanəsi ilə vaxt qazanacaq, digər tərəfdən işğala son verməyə, Anadoluda təhlükəsizliyi təmin etməyə çalışacaq. Mustafa Kamal isə Samsundan başlayaraq bütün Anadolunu təşkilatlandıracaq, hərəsi bir tərəfə dağılmış hərbi və inzibati quruluşu qaydaya salacaq və işğala qarşı mülki və hərbi hərəkata başlayacaq. Anadolunun xilası üçün ikisindən biri özünü qurban verəcək və ölkənin müstəqilliyi üçün əlindən gələni əsirgəməyəcək”.

Müqavilənin nüsxəsi Sultanın qızı Səbihədə və şəxsi yavərindədir. Bununla belə, Mustafa Paşa əhd gecəsində baş verənlər barədə qismən məlumat verib. Çünki bu anlaşmada ingilis siyasətçiləri əleyhinə bir siyasət düşünülmüşdü.Sultanla Atatürk arasındakı ixtilaf əvvəlcədən razılaşıdırılmışdı. Məsələn, Mustafa Kamal haqqında edam fərmanı çıxır və Şeyxülislam onu “kafir” elan edir. Ankara məclisində padşahın bu sərəncamı gizli iclasda müzakirə edilir. İclasda Kamal Paşa kürsüyə çıxır və deyir: “Sultan Vahdettin şəxsi yavərini yanıma göndərmişdi. Biz Düzcədə görüşdük”. Sonra Paşa məclis iştirakçılarına Sultanın gizli məktubunu göstərir: “İngilis süngüsü altında belə bir qərar vermək məcburiyyətində idim. Bu qərar sənin fəaliyyətinə və əhvalına pis təsir etməsin”.

Gizli iclas sənədləri bu yaxınlarda üzə çıxıb. Paşa gizli iclasda bu məktubu oxuyur. Osmanlı dövlətinin İngiltərəyə qarşı siyasət tətbiq etdiyi məlum olur.

Gizli iclas sənədləri tam açılmasa da, yuxarıdakı məsələlərə aid müəyyən sənədlər var. Sənədlərə əsasən, Ankarada hökumət qurulanda Məclis Sultana biyət etmək istəyir. Mustafa Paşanın da üzv olduğu Məclisdə biyət etmək üçün bir qrup təşkil edilir. Qrup xüsusi bir qatarla İstanbula göndərilir.

Heyətə Ərzurum millət vəkili M. Durak bəy, Bursa millət vəkili Emin bəy kimi şəxslər daxil edilmişdi. Mustafa Kamal Paşa üzərinə götürdüyü öhdəliyi yerinə yetirmişdi. Anadolu təşkilatlanmış, hərbi və inzibati quruluş bərpa edilmişdi. Sultan Vahdettin bundan sonra iki fərqli dövlət görüntüsü yaratmaqdansa, tək rəsmi səlahiyyətin Ankara hökumətində olduğunu sübut etmək üçün özünü qurban verir. Vahdettin vətəni tərk edərək getməsəydi, Lozannada Türkiyə iki fərqli hökumət tərəfindən təmsil olunmalı idi.

Respublika elan edildikdən sonra ingilis təzyiqi və yeni dövlətin beynəlxalq aləmdə tanınmama riski səltənətlə yolların ayrılmasına səbəb oldu. Sultan ingilisləri tam inandırmaq üçün onların gəmisinə mindi və özünü fəda etdi. Sultan Vahdettin Türkiyə tarixində özünü qurban verən bir padşahdır.

Niyə Mustafa Kamal Paşa?

Bu sualın bir neçə cavabı var. Vahdettin hələ şahzadə olanda Mustafa Kamal onu Almaniya səfərində müşayiət edir. Səyahət vaxtı Anadoludakı vəziyyət müzakirə edilir. Bundan sonra Mustafa Paşa Anadolunun müxtəlif cəbhələrinə məqsədli şəkildə təyin edilir. Çünki Paşa Anadoluya yaxşı bələd olmalı idi.Bundan başqa, Sultan kürəkəni Ənvərin Mustafaya təsirinə mane olmaq üçün Atatürkü İstanbuldan Anadoluya göndərir. Bu səbəbdən Mustafa Paşa daim Anadoluda vəzifə alır. Çünki vaxtı gələndə əvvəlcədən hazırlanan planı asanlıqla həyata keçirmək üçün ərazini tanımaq lazım idi.

Paşa Almaniya səfərindən qayıdanda Sultandan hərbiyyə nəzarəti idarəsinin rəisi vəzifəsini istəyir. Amma Vahdettin bu tələbə “hələ vaxtı deyil” deyə cavab verir.

Vahdettin sultan elan ediləndə Mustafa Kamal İsveçrədə müalicəsini yarımçıq qoyaraq tələm-tələsik İstanbula qayıdır. Sultanla görüş tələb edən Paşa cümə namazından sonra Vahdettinlə görüşür. Qeyd etmək lazımdır ki, 1918-1919-cu illər arasında Atatürklə Vahdettin hər cümə günü görüşür və bu məsələ gizli saxlanılır.

Sultan və dərin dövlətin nümayəndələri Mustafa Paşaya etibar edirdilər. Samsun səfərindən əvvəl daxili nəzarət idarəsinin rəisi Mehmet Əli bəy Mustafa Paşanın Şişlidəki evinə qonaq gəlir. Sonra isə dənizçilik naziri Avni Paşa da müntəzəm olaraq Mustafaya baş çəkir və bu dostluğa çevrilir. Hərbiyyə naziri Şakir Paşa Mustafanı nazirliyə dəvət edir. Nazirin kabinetində Samsun vəzifəsi Atatürkə təqdim edilir.
Bu vəzifə sultan Vahdettin tərəfindən verilib. Qeyd etmək lazımdır ki, gəmini təşkil edən, Mustafa Paşanın ailəsinə kifayət qədər pul verən və onları himayə edən də Sultan idi.

Mustafanı Samsuna gəmi aparmalı idi və bu məsələ ilə dənizçilik naziri Ahmet Avni Paşa məşğul olurdu. Paşa Samsuna gizli, qaçaraq getməyib. Gəmi kapitan İsmail Hakkının rəhbərliyi altında səfərə hazırlanıb. 1919-cu ilin 14 may tarixində sədrəzəm (baş nazir) Nişantaşındakı mülkdə Mustafa Paşaya qonaqlıq verir. Ertəsi gün gəmi yola düşməli idi.

Həmin gecə Rauf Orbay dənizçilik naziri Avni Paşanın telefonu ilə nazirliyə çağrılır və son hadisələr müzakirə edilir. Rauf bəy günorta saatlarında Mustafanın Şişlidəki evinə gedir. Evdə Refet Paşa, polkovnik Hüsrev bəy və ordu müfəttişi mayor İbrahim Tali də olur. Hazırlıqlar son dəfə müzakirə edilir.

Mustafa isə səhər saatlarında Babıalıda sədrəzəm və nazirlərlə, cümə namazından sonra isə Hamidiyə məscidində Vahdettinlə görüşür. 16 may gecə saatlarında gəmi yola düşür. Daxili işlər naziri Mehmet Əli bəy nazirliyin gizli xəzinəsindən külli miqdarda pulu Mustafa Paşaya verir.

Vahdettini xain elan edən tarixçi

Türkiyədə müəyyən tarixçilər bu məsələnin əleyhinə çıxır, faktları saxtakarlıq adlandırır. Məsələn, Turgut Özkamanın əsərində Vahdettin vətən xaini kimi təqdim edilir. O, müəyyən faktları sultanın əleyhinə istifadə edir. Əslində isə, tarixi şəxsi marağa görə yazmaq lazım deyil. Sənədlərin içindəki real faktları ortaya çıxarmaq lazımdır.

Məsələn, Samsuna səfərdən əvvəl Mustafa Paşaya 9-cu ordu müfəttişliyi və qərargah heyətini qurmaq səlahiyyətləri verilir. Eyni zamanda, Anadoludakı təyinatlar da Mustafa Kamalın istəyinə əsasən reallaşdırılmışdı.

Paşa Anadoluya müfəttiş qismində və milli azlıqların üsyanını yatırtmaq bəhanəsi ilə göndərilir. Əslində isə, Amasiya, Sivas və Ərzurum orduları da ona təhkim edilmişdi.

Paşanın Anadolu vəzifəsi və səlahiyyətləndirilməsi şərq vilayətlərinin valilərinə, hərbi və inzibati qurumlara bildirilmişdi. Bu səbəbdən Sivas, Amasya və Ərzurum səfərlərində Mustafanı valilər qarşıladılar. Paşanın valilər tərəfindən qarşılanması Sultanın göndərdiyi gizli təlimata əsasən həyata keçirilir. Mustafa Paşaya eyni zamanda sədrəzəmlə birbaşa təmas səlahiyyəti də verilmişdi. Bir müfəttiş üçün həddən artıq geniş səlahiyyət deyilmi?

Proses dövründəki yazışmalar günümüzə qədər gəlib çatıb. Sivasda keçirilən bütün iclasların stenoqramı Sultan Vahdettinə göndərilir. Təəssüf ki, bütün məktub və yazışmalar üzə çıxarılmayıb. Çünki yazışmalar üzə çıxsa, Sultan Vahdettinin vətən xaini olmadığı da üzə çıxa bilər. Bu isə müəyyən qrupun maraqları ilə üst-üstə düşmür.

Sultanla Atatürkün sonrakı əlaqələri

Sultan İstanbulu tərk etdikdən sonra da Mustafa Paşa ilə əlaqə saxlayır. Hər iki tərəf bir-birinə heyət göndərir. Sultan ölkəni tərk etdikdən sonra maliyyə böhranı ilə üz-üzə qalır. Amma Məclis gizli xəzinədən Sultana pul göndərir. Bu təlimatı isə Mustafa Paşa vermişdi.

Bunu sübut edən müəyyən qeydlər var. Amma Sultana sadiq olduğunu iddia edən bəzi şəxslər Vahdettinə kələk gəlib pulun böyük hissəsini mənimsəyiblər.

Osmanlı dərin dövləti

Osmanlını idarə edən dərin dövlət təbii ki var idi. Məsələn, dərin dövlət paytaxt seçmişdi. Atatürk isə Ankaranı paytaxt kimi görmürdü və paytaxtı başqa şəhərə köçürmək istəyirdi. Sonra isə “dostlarımın burda malı-mülkü var, gecikdik” deyərək fikrindən vaz keçir. Ankaraya ilk gedən Ənvər Paşa olub. Ənvər Paşa Kastamonudandır. Çanaqqala müharibəsində Ənvər Paşa Kastamonuya gedir. Burada Çanaqqala boğazı keçiləcəyi təqdirdə nələrin baş verəcəyinə qarşı “B” planı hazırlanır. Əvvəlcə paytaxt kimi Kastamonu nəzərdə tutulur. Bu “B” planıdır. Ankara isə dəmiryolu marşrutu olduğu üçün ikinci bir şəhər kimi müzakirə edilir. Ənvər Paşa Kastamonudan Ankaraya gedir. Şəraitin uyğun olduğunu görür və Məclis binasını inşa etdirməyə başlayır. 1915-ci ildə 1-ci Məclis binasının tikintisi başlayır. Planları cızan, inşaatı təsdiqləyən və bünövrə tökdürən Ənvər Paşadır. Bina “İttihat və Tərəqqi” cəmiyyətinin mərkəzi kimi göstərilir. Yaxşı, o dövrdə Ankarada nə qədər əhali yaşayırdı ki, cəmiyyətin mərkəzi bu şəhər seçilsin?

Çanaqqala savaşı davam etdiyi bir vaxtda Ankarada Məclisin inşa edilməsi barədə qərar verilir. Ankarada ən vacib prospektlər də “İttihat və Tərəqqi” cəmiyyətinin liderlərinin şərəfinə adlandırılıb. Bu isə Ankaranın guya cəmiyyətə məxsus olduğu şəhər görüntüsü yaratmaq üçün nəzərdə tutulub.

“C” planı

Dərin dövlətin bundan başqa “C” planı da var idi. Bu gün Kayseri litseyi kimi fəaliyyət göstərən bina əslində Məclis binası olaraq planlaşdırılmışdı. Kayseri “A” və “B” planları iflasa uğrayacağı təqdirdə tətbiq ediləcək “C” planı üçün nəzərdə tutulmuşdu.

Türkiyədə həqiqətən dərin dövlət var və bu filmlərdə, kitablarda bəhs edildiyi kimi bir təşkilat deyil. Dərin strukturu olmayan dövlətlər zəif və sahibsiz dövlətlərdir. Belə dövlətlər qısa müddətə tarix səhnəsindən silinir. Müasir Türkiyə Səlcuq, Osmanlı dövləti ənənələrini, türk adət-ənənələrini davam etdirən respublikadır. Türkiyənin respublikaya çevrilməsi məsələsi Mustafa Paşadan əvvəl, 2-ci Məşrutiyyət dövründə, Sultan Abdulhəmidin də müzakirə etdiyi bir mövzudur. 1908-ci ildən Məşrutiyyətdən sonra respublika üsul idarəsinə keçid nəzərdə tutulmuşdu. Hətta əlifba inqilabı da o dövrdə planlaşdırılıb…

Hikmət Həsənov
Ölkə.Az

ŞƏRH YAZ
1

Almaniyanın zəngin uşaqları pul xərcləməyə yer tapmırlar — FOTOLAR

Almaniyanın zəngin uşaqları pul xərcləməyə yer tapmırlar
10:12
Bu gün
162
Maraqlı
A
İnstaqramdakı “Zəngin uşaqlar” axımına Almaniyanın varlı balaları da qoşulub.

“Ölkə.Az” xəbər verir ki, artıq dünyanın hər yerində yayılan və yaşadıqları zəngin həyatı göstərmək istəyən varlı balaları İnstaqramda yaşadıqları anların fotolarını paylaşırlar. Almaniyada yaşayan zəngin uşaqlar da bu sıradan geri qalmayıblar.

Hikmət Həsənov
Ölkə.Az

ŞƏRH YAZ
0

İşdəki problemləri evə daşımayın — Günün qoroskopu

İşdəki problemləri evə daşımayın
01:30
Bu gün
2748
Maraqlı
A
"Ölkə.Az" Milli.Az-a istinadən günün ulduz falını təqdim edir:

Qoç - əmr vermək, rəhbərlik etmək, kiməsə nəyisə tapşırmaq istəyirsiniz. Lakin uğur üçün bütün bunlar yetərli deyil. İşinizi özünüz görməlisiniz.

İşləyin və əməyinizdən həzz almağa başlayacaqsınız.
Son vaxtlar doğru istiqamət seçdiyinizlə bağlı müəyyən şübhələr vardı. Bu gün həmin şübhələrə qəti cavab alacaqsınız.

Qətiyyətli, zəhmətkeş, məntiqli davransanız, seçdiyiniz yöndə uğur qazana bilərsiniz.
İşdəki problemləri evə daşımayın. Ailə üzvlərinizlə amiranə şəkildə danışmayın. Onlarla səmimi, həlim olun.

Buğa - narahat olmayın, təşvişə düşməyin. Əsassız və səbəbsiz həyəcan pis olmayan günü korlaya bilər.

Mühüm məsələləri özünüz həll etsəniz, ikinci dərəcəli və xırda problemlərin həllini etibar etdiyiniz insana tapşırsanız, işdə uğur əldə edə bilərsiniz. Sənədləşdirmədə problemlər yarana bilər. Bürokratik əngəlləri və məmurların uydurma bəhanələrini qət etmək asan deyil.

Axşam saatları xoş sürpriz, maraqlı görüş vəd edir. Qəfil vizit ola bilər. Qonaqlar sizi sevindirəcək.
Kulinar eksperimentlər əhvalınızı yaxşılaşdıra bilər.

Əkizlər - gün asan və sadə olmasa da, uğurdan xali deyil.
Başladığınız işləri yarımçıq qoymayın. Hansısa istiqamətdə məqsədinizə nail ola bilməsəniz, inad etməyin.

Yaşamın özü bundan sonra hansı istiqamətdə hərəkət etməyin gərəkdiyini və nə etmək lazım olduğunu bildirəcək. Sizə qalan intuisiyanın dediklərini dinləməkdir.

Huşyar olun. Valideynlərlə uşaqlar arasında anlaşılmazlıq olarsa, səbrli davranın, münaqişəyə imkan verməyin.

Axşam saatlarında sakit olmağa çalışsanız da, dəvət aldığınız yerə getmək lazımdır.

Xərçəng - həddən ziyadə ətalətli və astagəl olmayın. Nə etdiyinizi, nəyə can atdığınızı, hansı planı reallaşdırdığınızı dəqiqləşdirin.

Az sonra hadisələrin axarı göstərəcək ki, tələsmək gərək deyilmiş. İşlərə məsuliyyətli və diqqətli yanaşın, tələsən insanların yol verdikləri səhvləri təkrarlamayın.

Gəlir, mənfəət istisna deyil.
Alış-verişdə simiclik etməyin. Axşam saatları romantik münasibətlər və təmaslar üçün əlverişlidir.

Bir qədər tənha qalmaqda da xeyir var.

Şir - başqalarının bacarmadıqları işin öhdəsindən gələ bilərsiniz. Amma eyforiyaya qatılmayın, qəhrəmanlıq etmək, "dünyanı qurtaran adam" kimi görünməyə çalşımayın.

Başa vuracağınıza ümid etmədiyiniz işlərdə ciddi irəliləyiş ola bilər. Yaxın ətrafınızdakı insanlardan birinin gerçək siması sizə əyan olacaq.

Şəxsi münasibətlər müstəvisində düşərli gündür. Təmaslarınızdakı rəvanlığı və harmoniyanı pozan müşkülü bu gün çözə bilərsiniz.

İstənilən situasiyada təbii olun, yalan danışmayın.

Qız - nə istədiyinizi dəqiq müəyyənləşdirin. Günün hadisələri nə vaxtdan bəri qəlbinizdə gəzdirdiyiniz istəyin gerçəkləşməsinə rəvac verir.

Amma istəklər çox olmamalıdır. Səhər saatlarında vəziyyət bir qədər əsəbi və nevrozdur. Yaranan problemlər o qədər ciddi deyil ki, təbdən çıxaraq sinirlənəsiniz, həyəcanlı addımlar atasınız.

Nikbin olun. Belədə bir çox sədləri dəf edə bilərsiniz.
Bədbin, özünə əmin olmayan insanlar sizdən yardım gözləyirlər. Onları dəstəkləyin, amma müftəxorluq edərək sizdən sui-istifadə etmələrinə imkan verməyin.

Nüfuzlu şəxslərlə təmaslarda həssas və diqqətli olun. Maraqlar toqquşması riski var.

Tərəzi - gün xoş görüşlər vəd edir. Köhnə dostla səmimi söhbət yaşananlara fərqli aspektdən baxmağa imkan verəcək. Problemlərin həlli üçün düzgün qərar verin, çətin situasiyadan çıxış yolu arayarkən hövsələsiz olmayın.

İşlə bağlı məsələlərin çözümündə naqolay təzyiqlərin qarşısını alın.
Sərfəli anlaşma və ya gəlirli sifariş istisna deyil.

Səyahət və ya səfər məsləhət deyil. Yolda tez yorula bilərsiniz.
Axşam saatlarında evdə keçirəcəyiniz vaxtda istirahət edin, əhvalınız və səhhətiniz normal vəziyyətə düşsün.

Alış-verişdə iri məbləğdə pul xərcləməyin.

Əqrəb - səhər saatlarında günün uğursuz olacağını düşünə bilərsiniz. Amma az sonra situasiya dəyişəcək. Vaxt keçdikcə pozitiv təmayüllərin təsir gücü artır. Günün ilk yarısından müstəqil fəaliyyət və təkbaşına iş üçün istifadə edin.

Günün ikinci yarısında isə işgüzar məsələlər, birgə layihələrdə iştirakla bağlı məsləhətləşmələr və müzakirələr olacaq.

Qarşınıza qoyduğunuz məqsədlərə çata bilərsiniz. Yerinə yetirə biləcəyiniz işə başlayın, qüvvənizi qənaətlə sərf edin.

Emosional olmayın, hisslərin əsarətinə düşməyin. Əks cins mənsubu ilə ciddi münasibətlərin təməlinin qoyulacağına bel bağlamayın.

Oxatan - hər sahədə və hər işdə hamıdan yaxşı olmağa çalışsanız da, bu, mümkün deyil. Əslində belə vəziyyətə ehtiyac da yoxdur. Təbii davranın və bu, günün ən məhsuldar, ən effektiv variantıdır.

İndiyədək mübhəm bildiyiniz məsələnin təfərrüatları bilinəcək.
Çoxdan bəri görüşmək istədiyiniz, darıxdığınız insanla günün ikinci yarısında görüş istisna deyil.
Səfər, yaşam məkanının dəyişdirilməsində fayda var.

Belə dəyişikliklər insanı ruhlandırır, işdə və yaradıcılıqda uğurlar qazanmağa imkan verir. Yaxınlarınızla münasibətlər qaydasına düşür, fikir ayrılıqları və incikliklər keçmişdə qalır.

Oğlaq - xırda məsələlərə və önəmsiz detallara həddən artıq fikir verməyin. Aktiv olun, qətiyyətli addımlar atın. Son vaxtlar sizi narahat edən məsələləri nüfuzlu insanla müzakirə etmək və problemin həll yollarını tapmaq imkanı yaranıb.

Ambisioz, eqoist, xudpəsənd olmayın. Bununla yanaşı, ağıllı, fəndgir və məntiqli davranın, karyera pilləkənində yüksəlməyə çalışın.

Şəxsi münasibətlər müstəvisində ciddi dəyişikliklər gözləməyə dəyməz. Təşəbbüslər nəticə verməyəcək. Yaranmış situsiyanı təhlil edin, davranmağın yollarını ayırd edin.
Axşam saatlarında istirahət edin.

Dolça - improvizə etməkdən çəkinməyin. Bu gün qəflətən atacağınız addımlar və qəbul edəcəyiniz qərarlar uğurlu ola bilər. İşdə həmkarlarla fikir ayrılığı, münaqişə istisna deyil.

Mövqeyinizi müdafiə edin. Yanınızdakı insanlardan biri davranışızı bəyənməyə bilər, amma qəti və sərt olun.
Nüfuzlu şəxs sizi müdafiə edəcək.

Günün ikinci yarısı yaşam tonusunuzun səviyyəsinin aşağı düşməsi ilə bağlıdır. Səhhətdə problem istisna deyil.
Ağır və yağlı yeməklər yeməyin.

Axşam saatlarında açıq havada gəzintiyə vaxt tapın.

Balıqlar - qəfil uğurlar günüdür. Bu nailiyyətlər əhəmiyyətli olmasa da, həddən ziyadə xoşdur. Peşəkar və fərdi məziyyətlərinizə şübhələnən insanlar indi bacarıqlarınızı etiraf etmək məcburiyyətində qalıblar.

Gözlənilmədən işgüzar təklif ala bilərsiniz. Böyük, ya da gəlirliyi layihədə birgə işə və ya əməkdaşlığa cəlb oluna bilərsiniz.
Tanışlıqlar asan baş tutur. Bunun üçün təşəbbüs gərək deyil - ətrafınızdakı insanlara maraqlısınız.

Ailə üzvlərindən birinə problemi həll etməkdə yardım göstərin.

Ölkə.Az

ŞƏRH YAZ
0
BAĞLA