“ATƏT PA-da qəbul edilən bəyannamə Azərbaycanın maraqlarına cavab verir”

 “Ölkə.Az” xəbər verir ki, bunu  Milli Məclis sədrinin müavini, Azərbaycanın ATƏT PA-kı nümayəndə heyətinin rəhbəri  Bahar Muradova  qurumun Lüksemburqda  keçirilən illik yay sessiyası haqqında məlumat verərkən deyib.

Onun sözlərinə görə,  yekun bəyannamədə nəzərdə tutulan müddəalarda  Azərbaycanın ərazi bütövlüyü, suverenliyi  birmənalı  formada əksini tapıb.

“Sənəddə münaqişə tərəfi kimi Azərbaycan göstərilir və orada Dağlıq Qarabağ  göstərilməyib. Bundan əlavə olaraq,  ilk  dəfə olaraq  Azərbaycan, Ukrayna, Moldova və Gürcüstandakı münaqişələrə eyni prizmadan yanaşma  öz əksini tapıb. Bundan öncə isə üç ölkənin adı göstərilirdi. Qarabağ münaqişəsinə fərqli yanaşma var idi. Ancaq aparılan məqsədyönlü fəaliyyət nəticəsində bütün münaqişələrə eyni yanaşma  göstəriləcək. Bundan sonra münaqişənin həllində vasitəçilik həyata keçirən Minsk qrupu bu sənədə istinad edəcək”,- B. Muradova deyib.

O, əlavə edib ki, bəyannamədə əksini tapan digər məsələlər də Azərbaycanın mənafeyinə tam cavab verir.
B. Muradova deyib ki, erməni nümayəndə heyəti  sənədə ciddi etiraz etsə də, nəticəsi olmadı və böyük səs çoxluğu ilə qəbul edilib.
B. Muradova Azay Qulkiyevin yenidən ATƏT PA-nın vitse-prezident seçilməsini  müsbət hadisə adlandıraraq, Azərbaycanın qurumdakı mövqeyinin möhkəmlənməsinə xidmət edəcəyini qeyd edib.

Milli Məclis sədri  Oqtay Əsədov ATƏT PA-nın yay sesisyasında qəbul edilən sənədi Azərbaycan üçün mühüm  sənəd hesab edib.

Mürtəza
Ölkə.Az