ATƏT PA-nın Büro iclasında münaqişələrlə bağlı beynəlxalq hüququn prinsiplərinə sadiq mövqe nümayiş etdirilib — FOTOLAR

ATƏT PA-nın Büro iclasında münaqişələrlə bağlı beynəlxalq hüququn prinsiplərinə sadiq mövqe nümayiş etdirilib
21:12
07.12.2017
2677
Siyasət
A

Dekabrın 6-da Avstriyanın paytaxtı Vyana şəhərində ATƏT-in Nazirlər Şurasının 24-cü iclası ərəfəsində bu beynəlxalq qurumun Parlament Assambleyasının (ATƏT PA) Büro iclası keçirilib.

Büroda ATƏT PA-nın 2018-ci il üçün fəaliyyət planı, qurumun qış və yay sessiyalarının gündəliyinə aid məsələlər, digər aktual mövzular müzakirəyə çıxarılıb.

Milli Məclisin deputatı, ATƏT PA-nın vitse-prezidenti Azay Quliyev iclasın gedişi ilə bağlı sualı cavablandırarkən bildirib ki, qapalı keçirilən iclasda qəbul edilən qərarların şərh edilməsi məqsədəuyğun olmazdı. Lakin ümumi şəkildə qeyd etmək olar ki, ATƏT PA-nın Bürosu münaqişələrlə bağlı beynəlxalq hüququn prinsipləri və ATƏT PA-nın 2015-ci ildə Helsinkidə qəbul etdiyi qətnaməyə və bəyannaməyə sadiqliyini nümayiş etdirdi: “Məmnunam ki, bu cür həssas məsələlərdə Büro ikili standartları rədd edərək, dövlətlərin ərazi bütövlüyü və suverenliyini dəstəkləyən, etnik separatizmə yox deyən vahid mövqe sərgiləyib. Bu, ATƏT PA-nın etibarlılığı və bütövlüyü baxımdan çox önəmlı qərar oldu”.

Qeyd edilib ki, Büronun bəzi üzvlərinin separatizmə dəstək verən və bəzi ərazilərdəki separatçı rejimlərin təbliğatına can atan, həmçinin onları legitim bir qurum kimi təqdim etməyə çalışan meyilləri var idi. Sevindirici haldır ki, Büronun iclasında bu cəhdlərin qarşısı öncədən alındı.

ATƏT PA-nın vitse-prezidenti, həmçinin qeyd edib ki, 2015-ci ildə Helsinkidə qəbul olunmuş qətnamədə ATƏT məkanındakı münaqişələr aydın şəkildə göstərilir və bu münaqişələrin həmin ölkələrin ərazi bütövlüyü çərçivəsində həll edilməli olduğu qeyd edilir. Həmin sənəddə Azərbaycan, Ukrayna, Gürcüstan və Moldovadakı münaqişələrin ATƏT prinsipləri və BMT Təhlükəsizlik Şurasının qəbul etdiyi müvafiq qətnamələr əsasında həlli xüsusi olaraq vurğulanır.

“Təəssüf ki, bəzən Ermənistan-Azərbaycan, Dağlıq Qarabağ münaqişəsini ATƏT məkanındakı digər münaqişələrdən ayırmağa cəhd göstərilir. Sanki Azərbaycanın işğal olunmuş əraziləri və həmçinin öz torpaqlarından qaçqın düşmüş insanların taleyi ilə bağlı vəziyyət digər münaqişələrdəki vəziyyətdən fərqlidir. Bu, çox yanlış bir yanaşmadır və Büro iclasında həmin yanaşmanın da qarşısı alındı. ATƏT məkanındakı bütün münaqişələrə vahid mövqedən yanaşılmalıdır və bütün ölkələrlə, o cümlədən Azərbaycanla əlaqədar ərazi bütövlüyü, suverenlik və sərhədlərin dəyişilməzliyi prinsipi qorunmalıdır”, - deyə Azay Quliyev bildirib.

Ölkə.Az

ŞƏRH YAZ
0

İlham Əliyev Beynəlxalq Şahmat Federasiyasının prezidenti ilə görüşdü

İlham Əliyev Beynəlxalq Şahmat Federasiyasının prezidenti ilə görüşdü
12:47
Bu gün
443
Siyasət
A
Azərbaycan Prezidenti İlham Əliyev dekabrın 10-da Beynəlxalq Şahmat Federasiyasının (FIDE) prezidenti Arkadi Dvorkoviçi qəbul edib.

"Ölkə.Az" xəbər verir ki, dövlətimizin başçısı, ilk növbədə, Arkadi Dvorkoviçi Beynəlxalq Şahmat Federasiyasının prezidenti kimi yüksək vəzifəyə seçilməsi münasibətilə təbrik etdi, ona fəaliyyətində uğurlar arzuladı. Prezident İlham Əliyev Arkadi Dvorkoviçin bu vəzifəyə seçilməsindən sonra qısa bir zaman ərzində Azərbaycana səfərinin önəmini qeyd edərək, bunu ölkəmizin şahmat ənənələrinə diqqət və hörmət əlaməti kimi dəyərləndirdi. Dövlətimizin başçısı Arkadi Dvorkoviçin səfəri zamanı Azərbaycanla FIDE arasında əməkdaşlığın perspektivləri, ölkəmizin dünya şahmat ailəsində fəal iştirakı və qarşılıqlı fəaliyyəti ilə bağlı məsələlər ətrafında səmərəli müzakirələrin aparılacağına ümidvar olduğunu bildirdi.

Xoş sözlərə və təbrikə görə minnətdarlığını bildirən Beynəlxalq Şahmat Federasiyasının prezidenti Arkadi Dvorkoviç Azərbaycana səfərindən və Prezident İlham Əliyevlə görüşündən şərəf duyduğunu dedi. O, ölkəmizin FIDE-yə verdiyi dəstəyi yüksək qiymətləndirərək, bunun təşkilatın fəaliyyətində daim hiss olunduğunu vurğuladı. Arkadi Dvorkoviç, eyni zamanda, Azərbaycan nümayəndəsinin FIDE-nin vitse-prezidenti vəzifəsinə seçilməsinin əhəmiyyətini qeyd etdi.

Görüşdə Azərbaycanda idmana, o cümlədən şahmata dövlət səviyyəsində böyük diqqət və qayğı göstərildiyi vurğulandı.

Söhbət zamanı Arkadi Dvorkoviç “Skolkovo” Fondunun sədri kimi rəhbərlik etdiyi təşkilatın Azərbaycanla əməkdaşlığa önəm verdiyini, artıq telekommunikasiya sahəsində birgə işlərin aparıldığını dedi və digər sahələrdə də əməkdaşlığın genişləndirilməsi üçün yaxşı imkanların olduğunu qeyd etdi.

***

Azərbaycan Respublikasının Prezidenti İlham Əliyev dekabrın 10-da Beynəlxalq Şahmat Federasiyasının (FIDE) prezidenti Arkadi Dvorkoviçin rəhbərlik etdiyi nümayəndə heyətini qəbul edib.

"Ölkə.Az"ın xəbərinə görə, bu barədə Azərbaycan Prezidentinin mətbuat xidməti məlumat yayıb.

Ölkə.Az

ŞƏRH YAZ
1

Prezident türkiyəli naziri qəbul etdi — YENİLƏNİB

Prezident türkiyəli naziri qəbul etdi
12:44
Bu gün
330
Siyasət
A
Azərbaycan Prezidenti İlham Əliyev dekabrın 10-da Türkiyənin kənd təsərrüfatı və meşəçilik naziri Bekir Pakdemirlinin başçılıq etdiyi nümayəndə heyətini qəbul edib.

Dövlət başçısı Bekir Pakdemirlini kənd təsərrüfatı və meşəçilik naziri vəzifəsinə təyin olunması münasibətilə təbrik edərək, onun ilk dəfə nazir kimi Azərbaycana səfərindən məmnunluğunu bildirib.

Prezident İlham Əliyev Azərbaycan ilə Türkiyə arasında dostluq və qardaşlıq münasibətlərinin bütün sahələrdə uğurla inkişaf etdiyini vurğulayıb, kənd təsərrüfatı sahəsində əməkdaşlığın genişləndirilməsi üçün böyük potensialın olduğunu deyib. Kənd təsərrüfatının inkişafına ölkəmizdə böyük önəm verildiyini deyən dövlət başçısı bunun iqtisadiyyatın şaxələndirilməsi baxımından əhəmiyyətini qeyd edib. Prezident İlham Əliyev Türkiyənin kənd təsərrüfatı sahəsində əldə etdiyi uğurların və təcrübənin Azərbaycan üçün böyük maraq doğurduğunu deyib. Dövlət başçısı Bekir Pakdemirlinin Bakıda aqrar və yaşıl exnologiyalar üzrə “AgTech and Green Energy” mövzusunda keçirilən beynəlxalq forumda iştirakının əhəmiyyətini vurğulayıb və onun Azərbaycana bu səfərinin əməkdaşlığın perspektivlərinin səmərəli müzakirəsi işinə töhfə verəcəyinə əminliyini ifadə edib.

Kənd təsərrüfatı və meşəçilik naziri Bekir Pakdemirli Türkiyə Prezidenti Rəcəb Tayyib Ərdoğanın salamlarını dövlət başçısına çatdırıb. O, Bakıda aqrar və yaşıl texnologiyalar üzrə “AgTech and Green Energy” mövzusunda keçirilən beynəlxalq forumun əhəmiyyətinə toxunub, ölkəmizə böyük nümayəndə heyəti ilə gəldiyini deyib və nümayəndə heyətinin tərkibinə kənd təsərrüfatı və qida sənayesi sahəsində fəaliyyət göstərən iş adamlarının da daxil olduğunu bildirib.

Söhbət zamanı kənd təsərrüfatı sahəsində çalışan Azərbaycan və Türkiyə iş adamlarının dekabrın 11-də Bakıda birgə biznes forumunun keçiriləcəyi və bunun əməkdaşlığımızın genişləndirilməsi baxımından əhəmiyyətli olacağı vurğulanıb.

Dövlət başçısı Türkiyə Prezidenti Rəcəb Tayyib Ərdoğanın salamlarına görə minnətdarlığını bildirib, onun da salamlarını Türkiyə Prezidentinə çatdırmağı xahiş edib.

***

Azərbaycan Prezidenti İlham Əliyev dekabrın 10-da Türkiyənin kənd təsərrüfatı və meşəçilik naziri Bekir Pakdemirlinin başçılıq etdiyi nümayəndə heyətini qəbul edib.

"Ölkə.Az" xəbər verir ki, məlumatı Azərbaycan Prezidentinin mətbuat xidməti yayıb.  

Ölkə.Az

ŞƏRH YAZ
0
BAĞLA