“Audi Q7”-də özünü silahla öldürən iş adamının şübhəli intiharı

Redaksiyaya müraciət edən, oğul itimiş ananın dediklərini ürək yanğısı olmadan eşitmək qeyri-mümkündür.   

Əvvəlcə intihar edən Bəxtiyar Məmmədov haqda

Bəxtiyar Məmmədov Cəmşid Naxçıvanski adına hərbi liseyi bitirəndən sonra Yaroslavl Ali Hərbi Məktəbinə daxil olub. Oranı bitirəndən sonra az müddət Rusiyada hərbi xidmət keçmiş, sonradan Azərbaycana qayıtmışdır. 2005-ci ildən bizneslə məşğul olub. Polkovnik Adil Ağayevlə 2010-cu ildə tanış olub, alış-veriş ediblər. Polkovnik Adil Ağayev Bəxtiyar Məmmədovun bacarıqlı iş adamı olduğunu görüb onu rəhbərlik etdiyi idarəyə - Daxili İşlər Nazirliyi Tikinti Quraşdırma İdarəsinə müavin vəzifəsinə təyin etmək istəyib. Bəxtiyar dəfələrlə təklifdən imtina edib. Lakin Ağayev əl çəkmir, Bəxtiyara vədlər verir, işlər qaydasında gedərsə Daxili İşlər Nazirliyində tabe olduğu quruma rəis də göndərə biləcəyini deyir. Uzun müzakirələrdən sonra Bəxtiyar Məmmədov polkovnik Adil Ağayevə müavin olmağa razılaşır. 

Anası onun davamlı olaraq evdə bu işə könülsüz getdiyini deyir:

“Oğlum bir dəfə mənimlə məsləhət edərkən dedi ki, A.Ağayev onu daha yüksək vəzifəyə qoymaq istəyir. Bunun üçün 1 milyon 500 min manat lazım gəldiyini dedi və bu işə getmək istəmədiyini bildirdi. Lakin az sonra Bəxtiyar pulu polkovnik Ağayevə verdiyini  desə də bu işdən gözünün su içmədiyini dilə gətirdi”, - deyə mərhumun anası bildirir. 

Sonra Bəxtiyar Məmmədov Ağayevlə birgə Xırdalanda şərikli bina tikməyi qərarlaşdırır. Bəxtiyar Məmmədov bu işə 1 milyon 350 min manat vəsait qoyur. Binəqədi qəsəbəsində ümumi dəyəri 450 min manat olan 2 hektar torpaq sahəsi alır və bəlli olmayan səbəblər üzündən torpaq sahəsini Adil Ağayevin adına sənədləşdirir. 

“Oğlum Ağayevin vədlərinə inanmışdı. Gecəsi-gündüzü yox idi. Hətta külli miqdarda borc alıb, Ağayevin rəhbərlik etdiyi biznesə qoymuşdu. Amma bir müddət sonra ortadakı pulların yoxa çıxdığını analayanda, borclar artanda, Ağayevin bu məsələdə əli olduğunu biləndə artıq iş işdən keçmişdi”, - deyən Şəfiqə Məmmədova bildirir ki, hansısa söhbətdən sonra Bəxtiyar ciddi depresiyaya düşdü:

“Ana kimi oğlumun işlərinin yaxşı getdiyini görüb çox sevinirdim. Lakin qeyd etdiyim hadisədən sonra onda geriləmə başladı. 85 kilo çəkisi olan Bəxtiyar az müddət içində 20 kilo çəki atdı. Sirli söhbət oğlumu geri salırdı. Deyib-gülən, həyat eşqi olan oğlum özünə qapandı, sirrini heç kimə demədi. 2013-cü ilin aprel ayının 10-da mənə zəng edib “ana, uşaqlardan muğayat ol. Sən səbrlisən, azından onlara 15 il baxa bilərsən” deyib, telefonu bağladı. Əvvəl heç nə başa düşməsəm də özünə qəsd etmək istəyidini anladıq. Amma artıq gec idi. Qardaşı, əmisi oğlu nə qədər mane olmağa çalışsalar da o, özünü Bakı Şamaxı yolunun 50-ci km-də avtomobilində odlu silahla vurmaqla, intihar etdi”, – deyə Şəfiqə Məmmədova başına gələnləri danışır. 

Anası qeyd edir ki, yas mərasimi bitdikdən sonra polis polkovniki Adil Ağayevlə görüşüb, oğlunun şərikli biznesdən qalan vəsaitlə maraqlanıb. A.Ağayev oğlu intihar etmiş ananı soyuq qarşılayıb və yekunda deyib ki, heç kimin borcu yoxdur. 

“Axı bu necə ola bilər? Oğlum biznesmen idi, bütün malını, pulunu Ağayevlə işlətdiyi biznesə qoymuşdu. Ağayev daş-atıb başını tutdu ki, hər şey sıfırlanıb. Arada borc söhbəti yoxdur. Açığı aidiyyatı orqanlara müraciət etdik və oradan belə cavab aldıq ki, ortada hər hansı borcun olması ilə bağlı dəlil-sübut yoxdur. Beləliklə işgüzar , bacarıqlı və böyük perspektivi olan oğlumu intihara məcbur edib, özünü və ailəsini açıq yurdda qoydular. Təsəvvür edin, az sonra borc sahibləri gəlib pullarını istədikdə məcbur olub, qardaşının, bacısının, özünün evlərini satıb borc sahiblərinə qaytaraq. Beləcə gənc bir adamı göz görəsi məhv edib, hər şeyini əlindən aldılar, özünü isə intihara məcbur etdilər. 

Beləcə məsələ bağlanmışdı. Oğlumun il mərasimindən sonra məhkəmədən bildiriş gəldi ki, polkovnik Adil Ağayev indi növbəti qurbanını seçib. Bu dəfə o, Bəxtiyarın əmisi oğlu, heç bir yerdə işləməyən, olduqca kasıb Elnur Məmmədovu hədəfləyib. Guya Elnur Məmmədov ona 200 min pul borcludur. Bu artıq bütün insanlıq, vicdan və qorxusuzluq hisslərinin itirilməsidir. Mən Elnur Məmmədovla danışdım, o belə bir şeyin qeyri-mümkün olduğunu dedi. Lakin sonradan xatırladı. Hadisə belə olub: işlə əlaqədar Bəxtiyar Adil Ağayevdən 200 min manat pul istəyib. Adil Ağayev bir telefon nömrəsi verib. İş adamı Bəxtiyar Məmmədov işçilərdən kimin “28 may” metrostansiyasının yaxınlığında olduğunu soruşub. Elnur təsadüfən həmin ərazidə olub və o, Bəxtiyarın dediyi kimi həmin telefona zəng edib, pulu götürüb və Bəxtiyar Məmmədova çatdırıb. Ondan sonra Bəxtiyar və Adil dəfələrlə görüşüb, iş görüblər. Lakin bir dəfə də olsun 200 min manat söhbəti, borc məsələsi dilə gətirilməyib. Hadisədən az sonra Bəxtiyar Məmmədov intihar edib və Ağayevin həmin 200 min yadına düşüb. Səbəb?” 

Mərhum biznesmenin anası qeyd edir ki,  2010-cu ilə qədər polis sistemində adi bir idarənin rəisi olan polkovnik Adil Ağayevin maddi imkanı çox aşağı olub. Lakin 2011-2012-ci illərdə maaşla dolanan yüksək çinli polis məmuru milyonçu iş adamına çevrilib: 

“İşbirliyindən gələn bütün əmlak, vəsaiti öz adına keçirdən Adil Ağayevlə bağlı aidiyyatı orqanlar araşdırma apararsa deyilənlər təsdiqini tapar. Bu qədər məhkəmə çək-çevirində, bir nəfər də olsun soruşmadı ki, ay polis işçisi səndə 200 min manat haradan idi, yoldan keçən Elnur Məmmədova borc verirdin? Hansı əsasla, nəyə məhz Elnur Məmmədova bu qədər pulu etibar etməli idin?”

Bəxtiyar Məmmədovun intiharındna sonra ailə Adil Ağayevdən şikayət edir və o polis sistemindən uzaqlaşdırılır. Ailə iddia edir ki, məhz buna görə Adil Ağayev qisas almaq fikrinə düşür. 

Hazırda polkovnik Adil Ağayevin hədəfi olan, məhkəmə vasitəsilə həbsinə nail olmağa çalışdığı Elnur Məmmədov deyir ki, o vaxt Bəxtiyar Məmədvodan bu 200 min manatın nə pul olduğunu soruşub. O, isə cavab verib ki, şərikli tikdirdikləri bina üçün tikinti materialları bazarından nisyə mal götürüb, mal sahibləri isə pullarını istəyirlər. Ağayevin isə mənə külli miqdarda borcu var. 200 min manat borcun cüzi bir hissədir. 

Elnur Məmmədov deyir ki, Adil Ağayevin Bəxtiyar Məmmədova borclu olduğunu təsdiqləyən bir çox şahid var:

“Mən bunu istintaqda dedim, lakin Adil Ağayevin nüfuzu mənim sözlərim, yəni “Ağayevin həmin pulları borcunun bir hissəsini qaytarmışdı” sözləri istintaq materiallına salınmadı. Mən  kasıb, imkansız adamam. O isə keçmiş idarə rəisi, əmim oğlu hesabına milyonçu olmuş birisi. Adil Ağayev istintaqda mənə nüfuzu və bütün imkanları ilə təzyiq etdi. Mən qorxumdan sözümün üstündə dayanmadım. Və bu mənə baha başa gəldi, özü də çox baha...” 

Elnur Məmmədov deyir ki, həmin üzləşmədən az sonra Adil Ağayevə zəng edib:

“Dedim ki, axı siz mənim bu pula heç bir aidiyyatımın olmadığını bilirsiniz. Məni niyə nahaqdan tutdurmaq istəyirsiniz? Bilirsiniz ki, bir qəpiyim belə yoxdur. Ağayev mənə telefonda dedi ki, sən istintaqa qara mühasibatın kitablarını vermisən və Bəxtiyarın ailəsi məni işdən çıxartdırıb. Buna görə sizdən qisasımı alacam”
Sonda Elnur Məmmədov əlinin hər yerdən üzüldüyünü dedi. O, bir neçə tanınmış QHT sədri, media orqanları vəkillərlə söhbət etdiyini, üz tutmadığı instansiya qalmadığını dilə gətirdi. Bəlli olur ki, Elnur Məmmədov Ali Məhkəmədə məhkəməni udduğuna baxmayaraq Adil Ağayev nüfuzundan istifadə edərək Apelyasiya məhkəməsində qərarı öz xeyirinə dəyişməyə nail olub. Yekunda isə Sabunçu rayon məhkəməsinin məhkəmə icraçıları onu mütəmadi məhkəməyə gəlməyə çağırır, pulun ödənilməsini tələb edirlər. Elnur Məmmədov üçün bu vəsait fantastik çoxdur və bu pulu ödəmək imkanının olmadığını bildirsə də icraçılar sanki məsələni keçmiş polis polkovnikinin xeyrinə həll etmək üçün dəridən qabıqdan çıxırlar. Vəziyyətin onun əlehinə işlədiyini görən E.Məmmədov hətta o pulu hissə-hissə ödməyə də hazır olduğunu bildirib. Bu məqsədlə Elnur Məmmədov Binəqədi rayon Məhkəməsinə (intihar edən əmisi oğlu yaşadığı ərazi) bu məsələnin həlli üçün vaxt verilməsi məqsədilə müraciət edib, ərizənin surətini isə Sabunçu rayon məhkəməsinə təqdim edib. Sabunçu rayon məhkəmə icraçıları isə bu məqama diqqət yetirmək nədir, heç baxmaq belə istəmirlər:

“Belə bəlli olur ki, keçmiş polis, polkovnik Adil Ağayev mənə heç bir aidiyyatı olmanayan məsələyə görə məni doğrudan da həbs etdirmək istəyir. Açığı mən dövlətimizin, məhkmələrimizin ali insan  haqlarının müdafiəçisi olduğunu hər zaman demişəm və bu fikirdə qalıram. Kimsə bu məsələni siyasiləşdirməsin, burada mənim taleyim həll olunur. Sadəcə ağlıma gətirə bilmirəm ki, Sabunçu rayon məhkəmə icraçıları mülki işi, necə icbariyə özbaşına dəyişə bilirlər. Haqqımda məhkəmə qərarı varsa niyə qanunlar əsasında onu yerinə yetirmirlər? Onsuz da şərlənmişəm. Onsuz da istintaqda gün kimi aydın olan faktları dəqiq yoxlamadan məni etmədiyim işə görə cəzalandırdılar. Yaxşı, mən ömrümün sonuna kimi bu dəhşətli pulu ödəyəcəm. Heç olmasa bunu ödməyə-yani qanunlarımızın imkan verdiyi  fomada ödməyə imkan versinlər. İndi bu adam mafioz, keçmiş polis, imkanlı şəxs olanda nə olar? İstədiyi adamı həbs etdirib, başqa birini intihara sövq edib, ona buna hədə- qorxu gəlib, ağa “Nəzərəm, belə gəzərəm” kimi yaşayan bu adama bir “dur” deyən tapılmayacaq? Bu adam üçün müqəddəs heç nə qalmayıb. Əmim oğlunun gənc yaşında intihara sövq etdirib, balalarını yetim qoydurdu, indi mənə keçib? Mənim isə Vətənimdən kənara getmək fikrim yoxdur. Məni də intihar etdirmək istəyir? Başqa nə məqsədi var? Kimə müraciət edək? Artıq Ağayev məqsədinə çatır!”, - deyə Elnur Məmmədov media mənsublarına, ictimaiyyətə, hüquq müdafiəçilərinə müraciət edir. 

"Ölkə.Az" səsləndirilən fikirlərlə bağlı Adil Ağayevin də mövqeyini öyrənməyə çalışıb. Ancaq Nağıyevin mobil telefonuna özü cavab verməyib. Özünü katibə kimi təqdim edən xanım isə Nağıyevin işdə olmadığın bildirib.