“Avropaya vizasız gediş Azərbaycan vətəndaşlarına da imkanlar yaradacaq”

"Ölkə.Az"-ın suallarını bu dəfə Gürcüstan baş nazirinin milli azlıqlar üzrə məsləhətçisi olmuş, hazırda Gürcüstan Parlamentinin hakim “Gürcü Arzusu Partiyası”ndan deputatı seçilmiş Savalan Mirzəyev cavablandırır. 

- Savalan bəy, tezliklə parlamentin yaz sessiyası başlayacaq. Qarşıda duran əsas məsələ hansıdır? Sizin də üzvü olduğunuz parlamentin konstitusiya komissiyası yaradıldı. Gürcüstan konstitusiyasında hansı dəyişikliklər nəzərdə tutulur? 

- Konstitusiyada dəyişiliklər olacaq, ancaq o dəyişiliklər hər bir vətəndaşın marağı nəzərə alınaraq qəbul olunacaq. Konkret olaraq hansı dəyişiliklər olacağı haqda söhbət etmək üçün hələ tezdir. Konstitusiya komissiyasının işi gizli qalmır, biz mediaya da, vətəndaşlara da açıq şəkildə işləyirik, hər bir dəyişilikdən xəbəriniz olacaq.

- Gürcüstanda prezidentin parlament tərəfindən seçiləcəyi ilə bağlı söz-söhbətlər var. Belə bir dəyişikliklər nəzərdə tutulurmu? 

- Hələki belə bir dəyişiklik nəzərdə tutulmur, rəsmi olaraq belə bir fikir yoxdur. 

- Savalan bəy, uzun müddət baş nazirin milli azlıqlar üzrə müşaviri işləmisiniz. Azərbaycanlıların inteqrasiyası üçün hansı layihələr var?

- Bildiyiniz kimi, ölkəmizdə milli azlıqların sayı yetərincə çoxdur. Bu azlıqların ölkənin siyasi və ictimai işlərində iştirakı üçün ilk növbədə onların  inteqrasiyası önəmlidir. Layihələr çoxdur, hər bir milli azlıq üçün düşünülmüş layihələr mövcüddur. Bu layihələrdə əsas mövzular inteqrasiya və gürcü dilinin öyrənilməsidir. Mən şəxsən, öz tərəfimdən onu qeyd edə bilərəm ki, azərbaycanlılarla bağlı üzərində işlədiyim layihə var və yaxın gələcəkdə layihəmi təqdim edəcəm.

- Hazırda əsas diqqətlər Gürcüstan hökumətinin Qazpromla imzaladığı müqaviləyə yönəlib. Parlamentdə bu müqavilənin detalları ilə bağlı müzakirələr gözlənilirmi?  

- Qazpromla danışıqlar Energetika Nazirliyi tərəfindən aparılır və artıq razılaşmalar əldə edilib. Bu razılaşmanın Gürcüstanın Azərbaycanla olan razılaşmasına təsiri yoxdur. Parlamentə gəldikdə isə belə bir müzakirə olmayıb. Energetika Nazirliyi bu işdə həm Gürcüstanın, həm də partnyorlarının maraqlarını nəzərə alaraq addımlar atır.

- Əsas müxalifət partiyasında parçalanma baş verdi. İndi iki rəqibiniz var. Bu qarşıdakı seçkilərdə çətinlik yaratmayacaq ki? 

- Müxalifət partiyasının parçalanması gözlənilən bir hal idi və bu belə də oldu. Bizim üçün çətinlik yaranacağını düşünmürəm. Müxalifət partiyasının Gürcüstan vətəndaşları arasında reytinqləri çox aşağı səviyyədədir. Xalq onlara güvənmir.

- Artıq Gürcüstanla Avropa Birliyi arasında viza aradan qaldırılır. Bunun azərbaycanlılara hansı üstünlüyü var?

- Sadəcə azərbaycanlılar üçün yox, bu hər bir Gürcüstan vətəndaşının böyük uğurudur, dövlətimizin böyük siyasi qalibiyyətidir.Qaldi ki azərbaycanlılara, qarşıda Avropayla ticari məsələlər də həll olunduqdan sonra burada yaşayan azərbaycanlılar üçün böyük nəaliyyət olacaq, çünki biz kənd təsərrüfatı bölgəsində yaşayırıq və öz məhsullarımızı Avropa bazarına çıxara biləcəyik. Bu günki bu uğur bizləri bu işə doğru aparır.

Amil Hacıyev
Ölkə.Az