AXCP sədri Masallı sakinləri ilə görüşdü — FOTO

AXCP sədri Masallı sakinləri ilə görüşdü
17:05
13.09.2017
28
Siyasət
A
Azərbaycan Xalq Cəbhəsi Partiyası (AXCP) paytaxtda və bölgələrdə təşkilatlanmağa, sıralarını genişləndirməyə davam edir.

"Ölkə.Az" xəbər veriri ki, xalqı bilgiləndirmək, eləcə də əhalinin problemlərini dinləmək məqsədiylə partiya sədri Razi Nurullayev tez-tez regionlarda vətəndaşlarla görüşlər keçirir.

Belə görüşlərdən biri də Masallıda gerçəkləşib. İctimaiyyətin təmsilçiləri ilə görüşən Razi Nurullayev vətəndaşları salamladıqdan sonra, bölgələrdə vətəndaşlarla görüşmək üçün yaşadıqları sıxıntılardan, dövlət qurumlarının bu görüşlərə törətdikləri əngəlləri dilə gətirərək bildirib ki, bütün sıxıntılara baxmayaraq belə görüşlər davam edəcək.

Daha sonra AXCP sədri vurğulayıb ki, partiyanın apardığı mübarizənin qayəsində duran məsələ Azərbaycan vətəndaşlarını xoşbəxt yaşamasıdır:

“Bunu hərkəs deyir, bəlkə də məndən daha çox, daha bəlağətli deyir. Lakin insanın sözləriylə əməlləri üst-üstə düşməlidir. Biz digərləri kimi boş vədlər vermək yolunu seçmədik. Biz xalqdan ayrı yol seçmədik. Seçsəydik bu gün yüksək səviyyədə yaşayar, parlamentdə oturardıq, pulumuz, gözəl həyatımız olardı, iclaslarımızı bahalı otellərdə keçirərdik. Lakin biz xalqla bir yerdə olmaq yolunu seçdik. Biz bu xalqı xoşbəxt görmək istəyirik. Bu gün vətəndaşların çoxu özünü öz vətənində qərib hiss edir. Azərbaycan vətəndaşı öz arzularına çata bilməyib. Biz bu gün yaşamaq istədiyimiz, arzuladığımız Azərbaycanda yaşamırıq. Biz o Azərbaycanı qurmağa çalışırıq ki, orda heç bir vətəndaş övladlarının, ailə üzvlərinin qarşısında başı aşağı dayanmasın, o bütün günü işləyərək, axşam ailəmin üzünə necə baxım deyə düşünməsin. O Azərbaycan ki, orda məhkəmələr rüşvət almasın. O Azərbaycan ki, orda övladlarımız yaxşı təhsil ala bilsinlər. O Azərbaycan ki, orda müəllimlər şah kimi yaşasınlar, alçaldıcı əməllərə məcbur edilməsinlər”.

Daha sonra ölkədə gedən sosial, iqtisadi, eləcə də siyasi prosseslərdən danışan, AXCP sədri mövcud problemləri dilə gətirib və qeyd edib ki, vətəndaşın hakimiyyətin haqsızlığına, ədalətsizliyinə, əhaliyə etdiyi zülmə qarşı biganəliyinə, müxalifətin yanında olmamasına bir səbəb də ənənəvi müxalifətin yarıtmazlığıdır:

“Azərbaycanda gənc, fərqli düşünən siyasətçilərə ehtiyac var və onlar meydana çıxmaqdadırlar. Biz inanırıq ki, ölkəyə yeni, fərqli siyasət, quruluş, nəfəs gətirəcəyik. Siz də buna inanmalısınız. Siz inanmalısınız ki, Azərbaycan xoşbəxt ölkəyə çevrilə bilər. Bu mümkündür. Biz bunu bacaracayıq, birlikdə bacaracayıq”.

2018-ci ili siyasi dəyişiklik ili elan etdiklərini vurğulayan Razi Nurullayev, namizədliyini irəli sürəcəyini bildirib. Sədr qeyd edib ki, seçkini baykot etmək, seçkilərə getməmək hakimiyyətin dəyirmanına su tökməkdir.

“Mən inanıram ki, biz siyasi iradəmizi ortaya qoyub seçkilərə getdikdən sonra, xalq da öz siyasi iradəsini ortaya qoyacaq, seçkilərdə iştirak edərək istədiyi, ürəyindən gələn namizədə səs verəcək. Bu gün biz yeni Azərbaycan, yeni siyasət, iqtidarın dəyişməsini istəyiriksə, Azərbaycanın müxalifəti də dəyişməlidir, yenilənməlidir. Biz bu gün İlham Əliyevi konstutisyanı dəyişməkdə, hakimiyyəti müxtəlif yollarla əldə saxlamaqda ittiham edirik. Lakin qarşı tərəfdən biri çıxıb sual verir, axı müxalifət liderləri də eyni yolu seçiblər. Əli Kərimli də illərdir AXCP sədrliyindən əl çəkmək istəmir. Belə olan halda xalq müxalifətə inanmaz. Biz dəyişiklliyi öncə öz əməlimizdə göstərməliyik. Məhz buna görə də biz 2015-ci ildə qurultay keçirdik, demokratik, gizli səsvermə nəticəsində cəbhəçilər öz sədrlərini seçdilər. Lakin Əli Kərimli bunu həzm edə bilmir. Bu gün Azərbaycan müxalifətinə yeni nəfəs, yeni düşüncə lazımdır və biz bu yeniliyi gətirdik, bu yolda da var gücümüzlə çalışmağa davam edəcəyik, bütün maneələrə baxmayaraq”.

Daha sonra AXCP sədrinin müavinləri Ehtiram Mehtiyev və Məhəmməd Əsədullazadə də çıxış edərək, partiyanın fəaliyyəti, məqsədləri, siyasi strategiyası barədə vətəndaşları bilgiləndiriblər.

AXCP sədrinin müavini Ehtiram Mehtiyev çıxışında qeyd edib ki, partiyanın hədəfi xalqın inamını bərpa etməkdir:

“AXCP hər zaman haqqın yanında, mübarizənin önündə olub. Partiyamız 2015-ci ildə Azərbaycanda siyasi partiyalar arasında ilk dəfə demokratik, gizlin səsvermə yolu ilə Razi Nurullayevi sədr seçdi. Biz daha güclü olmaq üçün çalışırıq. Hədəfimiz xalqın müxalifətə olan itirilmiş inamını qaytarmaq və onların siyasətə maraqlarını bərpa etməkdir. Çünki xalq yalan vədlərdən yorulub və siyasətçilərə də öz maraqları üçün çalışan adamlar kimi baxır. Bunu yerinə yetirmək üçün insanlarla ayrı-ayrılıqda söhbətlər aparırıq. Əminik ki, xalq bizi yeni, fərqli  və səmimi siyasi qüvvə kimi qəbul edəcək. Biz bunun üçün var gücümüzlə çalışırıq, ictimaiyyətlə mütmadi görüşlər keçiririk”

AXCP sədrinin müavini Məhəmməd Əsədullazadə də tədbir iştirakçılarını partiya ətrafında birləşməyə çağırıb:

“Ölkədə siyasi müxalifətin formalaşması artıq, davam edir. AXCP artiq sizinlədir. Sizlərin dəstəyi ilə yalnız ölkədə dəyişikliklərə getmək olar. Bu gun ənənəvi müxalifətin və iqtidarın siyasəti nəticəsində sizlər ölkənin siyasi taleyindən kənarda qalmısınız. Bizim məqsədimiz sizləri siyasi proseslərə cəlb etməklə, ölkənin gələcəyinin formalaşmasında rolunuzu artırmaqdır. Dövlət sizindi və biz sizlərdən ilham alırıq. Bir olaq, AXCP ətrafında birləşək. Sizlər də yeni lider və dəyişikliklər arzusundasız. Yeni lider Razi bəy, yeni dəyişikliklərə imza atacaq gücdədir. Razi Nurullayev gücü sizdən alır və sizlərə güvənir”.

Sonra AXCP sədri vətəndaşların problemlərini dinləyib, onların suallarını cavablandırıb.

ŞƏRH YAZ
0

Bakıdan Fransaya kəskin etiraz — Səfir XİN-ə çağrıldı

Bakıdan Fransaya kəskin etiraz
21:11
21.11.2017
2098
Siyasət
A
“ATƏT-in Minsk Qrupunun həmsədr ölkələrindən biri olan Fransaya Azərbaycanın Ermənistan silahlı qüvvələri tərəfindən işğal edilmiş ərazilərində yaradılmış qanunsuz rejimin təmsilçisi kimi özünü təqdim edən Bako Saakyan adlı şəxsin səfəri ilə əlaqədar kəskin etirazımızı ifadə edirik”.

Ölkə.Az xəbər verir ki, bu barədə “Qafqazinfo”ya açıqlamasında Xarici İşlər Nazirliyinin Mətbuat xidmətinin rəhbəri Hikmət Hacıyev bildirib.

Onun sözlərinə görə, Avropa İttifaqı ölkələrində fəaliyyət göstərən erməni lobbi dairələri və Ermənistan bu yolla Azərbaycanın işğal olunmuş ərazilərində yaradılmış qanunsuz rejimi təşviq etməyə və Ermənistan-Azərbaycan Dağlıq Qarabağ münaqişəsinin danışıqlar yolu ilə həllinə maneə olmağa çalışır.

“Sözügedən məsələ ilə əlaqədar Fransanın Azərbaycandakı Səfiri ilə XİN-də görüş keçirilib. Azərbaycan Respublikasının Fransadakı səfirliyinin isə bu gün Fransa XİN-də görüşü nəzərdə tutulub.

Təəssüflə qeyd edirik ki, Ermənistan Respublikasının diplomatik pasportu ilə səyahət edən Bako Saakyanın Avropa İttifaqının ərazisinə daxil olması Şenqen viza qaydalarının ciddi pozulması ilə müşayiət olunmasına və ATƏT-in Minsk Qrupunun həmsədrlərindən biri kimi Fransanın öhdəliklərinə zidd olmasına baxmayaraq, Fransa tərəfindən bu səfərin qarşısının alınması üçün heç bir tədbir görülməyib.    

2 iyul 2015-ci ildə Fransa hökuməti tərəfindən xarici işlər və daxili işlər nazirlikləri səviyyəsində yerli prefekturalar və ali komissarlara sirkulyar təlimat göndərilib. Həmin təlimatda yerli özünü idarəetmə qurumlarının beynəlxalq əməkdaşlıq sahəsində səlahiyyət məhdudiyyətlərinə dair xəbərdarlıq edilir və mərkəzi hakimiyyətin siyasətinə və Fransanın beynəlxalq öhdəliklərinə zidd olaraq, yerli orqanların Fransa hökumətinin tanımadığı qeyri-qanuni rejimlər, o cümlədən qondarma Dağlıq Qarabağla beynəlxalq əməkdaşlığa dair sənədlər imzalamasına qadağa qoyulur.  

Fransa tərəfinin bu təlimatdan çıxış edərək Azərbaycanın işğal olunmuş ərazilərində yaradılmış qondarma rejimlə qanunsuz sənədlər imzalayan yerli orqanlara münasibətdə zəruri addımlar atacağını gözləyirik.

Son dövrlərdə Avropa İttifaqı üzv ölkələrinin də üzləşdiyi problemləri nəzərə alaraq, təhlükəli separatizm meyllərinin qarşısının alınması və dövlətlərin ərazi bütövlüyü, suverenliyi və sərhədlərinin toxunulmazlığı ilə əlaqədar vahid və birmənalı siyasətin yürüdülməsi mütləq şəkildə zəruridir”, - deyə H. Hacıyev qeyd edib.

ŞƏRH YAZ
0

Azərbaycanda inzibati ərazi vahidləri arasında ərazi mübahisələri 15 gün ərzində həll ediləcək

Azərbaycanda inzibati ərazi vahidləri arasında ərazi mübahisələri 15 gün ərzində həll ediləcək
19:01
21.11.2017
1792
Siyasət
A
Azərbaycanda inzibati ərazi vahidləri arasında ərazi məsələləri üzrə mübahisələrin həlli qaydası müəyyənləşib.

"Ölkə.Az"ın məlumatına görə, Azərbaycan prezidenti İlham Əliyev bununla bağlı “Azərbaycan Respublikasının ərazi vahidlərinin, inzibati ərazi dairələrinin və sahə inzibati ərazi dairələrinin xəritələrinin hazırlanması Qaydası”nda dəyişikliklər edilməsi haqqında” fərman imzalayıb.
 
Bununla bağlı qaydaya “İnzibati ərazi vahidləri arasında ərazi məsələləri üzrə mübahisələrin həllinə dair xəritənin hazırlanmasının xüsusiyyətləri” adlı yeni hissə əlavə edilib. Beləliklə, inzibati ərazi vahidləri arasında ərazi məsələləri üzrə mübahisələrin həlli ilə bağlı ərazi vahidlərinin, inzibati ərazi dairələrinin və sahə inzibati ərazi dairələrinin xəritələri hazırlanacaq. Mübahisə ilə bağlı xəritə onun hazırlanması tapşırığı verildiyi gündən 15 gün müddətində hazırlanaraq Azərbaycan Respublikası Prezidentinə təqdim edilməlidir. Tapşırıq daxil olduğu gündən 2 iş günü müddətində Əmlak Məsələləri üzrə Dövlət Komitəsi tərəfindən koordinatlarının müəyyən edilməsi, çöl tədqiqat və mərzçəkmə işlərinin yerinə yetirilməsi məqsədi ilə ərazi vahidlərinin, inzibati ərazi dairələrinin və sahə inzibati ərazi dairələrinin sərhədlərinin yerində müəyyən edilməsi və razılaşdırılması işlərinin başlanma vaxtı barədə həmin ərazi vahidlərinin, inzibati ərazi dairələrinin və sahə inzibati ərazi dairələrinin yerləşdiyi rayon və ya şəhər icra hakimiyyəti orqanına bildiriş göndərilir.
 
Mübahisə ilə bağlı xəritənin hazırlanması məqsədilə ərazi vahidlərinin, inzibati ərazi dairələrinin və sahə inzibati ərazi dairələrinin sərhədlərinin koordinatlarının müəyyən edilməsi, çöl tədqiqat və mərzçəkmə işlərinin yerinə yetirilməsi ƏMDK-nın ərazi vahidinin, inzibati ərazi dairəsinin və sahə inzibati ərazi dairəsinin yerləşdiyi ərazi bölməsi nümayəndəsinin, xəritəsi hazırlanmalı inzibati ərazi dairəsi (şəhər, qəsəbə, kənd ərazi vahidinə münasibətdə - onun daxil olduğu inzibati ərazi dairəsi) və ya sahə inzibati ərazi dairəsi üzrə, eləcə də onun həmsərhəd olduğu digər inzibati ərazi dairəsi və (və ya) sahə inzibati ərazi dairəsi üzrə müvafiq rayon, şəhər və ya şəhər rayonu icra hakimiyyəti başçısının nümayəndəsinin iştirakı ilə ƏMDK-nın müvafiq struktur bölməsinin mütəxəssisi tərəfindən həyata keçiriləcək.
 
Mübahisə ilə bağlı xəritədə mübahisələndirilən ərazi hissəsinin sərhədləri ayrıca göstərilir. Kağız üzərində hazırlanmış mübahisə ilə bağlı xəritə bu Qayda göstərilən nümayəndələr, həmçinin müvafiq rayon, şəhər və ya şəhər rayonu icra hakimiyyəti başçıları və tapşırıqda göstərilən digər şəxslərlə razılaşdırılacaq, onlar tərəfindən imzalanacaq və möhürlə təsdiq ediləcək. Ərazi vahidlərinin, inzibati ərazi dairələrinin və sahə inzibati ərazi dairələrinin xəritələrinin, habelə mübahisə ilə bağlı xəritələrin hazırlanması dövlət büdcəsinin vəsaiti hesabına maliyyələşdiriləcək.

ŞƏRH YAZ
0
BAĞLA