“6 ay ərzində ölkədə minimum əmək haqqının iki dəfə artırılması çox böyük inqilabi hadisədir”
Bunu “Ölkə.Az”a açıqlamasında millət vəkili İlham Məmmədov Azərbaycan Prezident İlham Əliyevin sosial sahə ilə bağlı sərəncamını şərh edərkən deyib.
Onun sözlərinə görə, 2018-ci ilin ikinci yarısından etibarən və 2019-ci ilin birinci yarısından isə sosial sahədə həyata keçirilən islahatlar daha sürətli xarakter almaqla yanaşı, dərinləşdi və bu islahatlar sosial sferanın bütün istiqamətlərini əhatə etməyə başladı.
“İslahatların ilkin mərhələsində cəmiyyətin daha həssas təbəqələrinin sosial müdafiəsinin gücləndirilməsi və onların problemlərinin həllinə yönəldi. Növbəti mərhələlərdə isə cəmiyyəti narahat edən və həllini gözləyən ciddi sosial problemlərin həlli istiqamətində islahatlar həyata keçirilməyə başladı. Demək olar ki, bu islahatlar kompleks xarakter daşıdı və bu da öz növbəsində bir zəncirvari bir proses olaraq ölkənin digər sahələrinin inkişafına öz töhfəsini verməyə başladı. Bu islahatlar ölkənin iqtisadi həyatında bir canlanmaya, dinamikaya səbəb oldu. Ölkə başçısının çoxmənzilli binaların sənədləşdirilməsinin sadələşdirilməsi, problemli kreditlərin həlli ilə bağlı imzaladığı sənədlər və onların qısa zamanda həyata keçirilməsi ölkədə çox müsbət nəticələrə səbəb oldu. Ümumiyyətlə islahatların nəticəsi uzun müddətə nəzərdə tutulsa da, ancaq Azərbaycan Prezidentinin həyata keçirdiyi bu islahatların böyük bir qismi qısa zamanda öz effektini verməyə başladı. Ölkə əhalisi bunun nəticələrini qısa zamanda hiss etməyə başladı”, - deputat qeyd edib.
İ.Məmmədov əlavə edib ki, ölkə başçısının sərəncamları ilə ölkədə minimum əməkhaqqılarının pensiyaların, müxtəlif növ müvinətlərin davamlı olaraq artrılmaqdadır.
“Dövlət başçısı öz çıxışlarında dəfələrlə bəyan edib ki, ölkənin maliyyə imkanları artdıqca, həmin maliyyə imkanları ilk növbədə əhalinin sosial müdafisəinin gücləndirilməsinə və sosial rifah halının yaxşılaşdırılmasına yönəldiləcək. Elə Azərbaycan Prezidentinin iyunun 18-də imzaladığı sərəncamı bunun bariz nümunəsi kimi dəyərləndirmək olar. Təsəvvür edin, 6 ay arzində ölkədə minimum əmək haqqının təqribən iki dəfə artırılması çox böyük inqilabı hadisədir”,- deyə deputat vurğulayıb.
Millət vəkili əlavə edib ki, cənab İlham Əliyevin son sərəncamı ölkədə sosial sahədəki həyata keçirilən islahatların növbəti mərhələsi kimi dəyərləndirilməlidir: “Həmin sərəncamdan iki milyonadək insan faydalanacaq. Minimum əməkhaqqının artması 950 minədək işçiyə şamil ediləcək. Bundan əlavə olaraq on minlərlə pensiyaçının pensiya təminatı yaxşılaşacaq. Bu da öz növbəsində ölkədə digər sahələrin inkişafına, iqtisadi aktivliyə öz töhfəsini vermiş olacaq. Bu bir daha göstərir ki, Azərbaycan Prezidentinin həyata keçirdiyi inqilabi sosial islahatların kökündə insan amili, onun sosial müdafiəsinin gücləndirilməsi və rifah halının yaxşılaşdırılması dayanır”.
Deputat onu da əlavə edib ki, ölkə başçısının söylədiyi kimi biz gələcəkdə də Azərbaycan vətəndaşının sosial müdafiəsinin gücləndirilməsi və sosial rifah halının yaxşılaşdırılması istiqamətində atılacaq addımların şahidi olcağıq: “Bu islahatların həyata keçirilməsinin yekunu olaraq Azərbaycan yaxın gələcəkdə dünyanın sosial rifah ölkələrindən birinə çevriləcək və biz buna şahidlik edəcəyik”.
Mürtəza
Ölkə.Az