Ayaz Mütəllibov: “Müharibə qızışsa, Azərbaycan və Ermənistan Suriyanın gününə düşə bilər” — MÜSAHİBƏ

Ayaz Mütəllibov: “Müharibə qızışsa, Azərbaycan və Ermənistan Suriyanın gününə düşə bilər”
14:10
01.03.2017
368
Siyasət
A
Azərbaycan Respublikasının eks-prezidenti Ayaz Mütəllibov “Ölkə.Az” xəbər portalına geniş müsahibə verib

“Ölkə.Az” həmin müsahibəni təqdim edir:

“Qarabağ probleminin sülh yolla həlli “Rusiya-Azərbaycan-İran-Türkiyə oxu”nun işləməsindən asılıdır”

- Fevralın 24-25-i tarixlərində cəbhədə baş verən son hərbi toqquşmaların arxasında Rusiyanın dayandığı ilə bağlı müxtəlif fikirlər səsləndirilir. Sizcə, bu nə qədər doğrudur?

- Bu cür birtərəfli düşünmək və bunu mətbuata çıxartmaq düzgün deyil. Rusiyanı yenidən Azərbaycana düşmən etmək deməkdir. Qarabağda nə baş verdiyini anlamaq üçün hər şeydən əvvəl Rusiya tərəfinin bu müharibənin olmasında nə marağı olduğunu nəzərə almalıyıq. Sizə elə gəlmirmi ki, Ermənistanda və Azərbaycanda elə qüvvələr vardır ki, onlar müharibənin tərəfdarlarıdır və başqa ölkələrin tapşırığını yerinə yetirirlər. Yaxud da Qarabağda vəziyyətin gərginləşməsi onların biznes maraqlarındadır. Şeytan xislətli fərdlər hər yerdə var. Rusiyanın vəziyyəti gərginləşdirməsi ağıla gələsi deyil, çünki Rusiya və İran Azərbaycanda və Qarabağda stabilliyin olmasının tərəfdarıdırlar. 

Ötən il avqustun 8-də “Rusiya-Azərbaycan-İran-Türkiyə oxu” yaranıb və bu “oxun” işləməsi üçün Azərbaycanda siyasi və hərbi sabitliyin olması bu ölkələrinin xeyrinədir. Hansı tərəfin müharibəni qızışdırdığını bilmədən, düzgün nəticə çıxartmaq olmaz. Götürək, ötən ilin aprel hadisələrini. Onda Rusiya tərəfinin zəngi ilə genişmiqyaslı hərbi əməliyyatlar dayandırıldı və ilk dəfə olaraq Rusiya tərəfi zəbt olunmuş torpaqların qaytarılması məsələsini ortaya qoydu və ilk mərhələdə 5 rayonun qaytarılması nəzərdə tutulmuşdu. Yuxarıda adı çəkilən “Avqust Sazişinin” mahiyyəti də Cənubi Qafqazda sabitliyin təmin olunması ilə bağlı idi. Qərbdə bəzi qüvvələr adını çəkdiyimiz Sazişin işləməsinin tərəfdarı deyillər. Ermənistan tərəfi bunu bilir, onlara arxalanıb, torpaqlarımızı qaytarmaq istəmirlər. Cənubi Qafqazda stabilliyi pozması da bununla bağlıdır.

“Qarabağın “açarı” Rusiyanın əlindədir”

- Son günlər Qarabağdakı erməni separatçı rejimin rəhbərləri və Ermənistan rəhbərliyi Dağlıq Qarabağ münaqişəsinin sülh yolu ilə həllinin mümkün olduğunu və bunun üçün Azərbaycanın güzəştə getməsini bəyan edir. Ermənistan tərəfi bu məsələdə özlərinin də güzəştə gedə biləcəyini söyləyirlər. İndiki mərhələdə Dağlıq Qarabağ münaqişəsinin sülh yolu ilə həlli nə qədər real görünür?

- Qarabağ məsələsinin sülh yolu və torpaqların ərazi bütövlüyü çərçivəsində həlli adını çəkdiyim 8 avqust 2016-ci il Sazişindən irəli gəlir. Aydındır ki, “Qarabağın açarı” Rusiyanın əlindədir. Bura İranı da əlavə etsək, yəni İrandan Ermənistanın necə asılı olduğunu nəzərə alsaq, və bu ölkə də Ermənistana təzyiq etsə, məsələnin həlli çox asanlaşır. Ermənistan tərəfi bunu görür və təşəbbüsü ələ almaq istəyir. Qeyd etməliyəm ki, ABŞ Prezidenti Tramp İrana qarşı sərt çıxışlar edir və İran tərəfini Rusiyaya daha da yaxınlaşdırır, Cənubi Qafqazda müharibə ocaqlarının olmaması həm İranın, həm də Rusiyanı geosiyasi marağındadır. Belə halda sülh yolu Ermənistan üçün də optimal yoldur. Biz “Rusiya-Azərbaycan-İran-Türkiyə oxu”ndan irəli gələn məsələləri nə qədər tez həll etsək, bir o qədər Cənubi Qafqazda sülhü tez təmin edərik.

“Rusiya, İran və Türkiyə istəməz ki, Azərbaycana nəsə olsun”

- Ümumiyyətlə, siz yaxın illərdə Qarabağ münaqişəsinin həllinə nə qədər ümid edirsiz?

- Bu haqda az öncə də bildirdim. Bunun həlli mexanizmini “Rusiya-Azərbaycan-İran-Türkiyə oxu”nun işləməsində görürəm. Bu “ox” Azərbaycanı üç ölkə tərəfindən qorumağa məcbur edəcək. Çünki fikir versəniz, Azərbaycan bu ölkələr arasında körpü funksiyasını öz üzərinə götürüb və bu üç ölkə istəməz ki, Azərbaycana nəsə olsun. 

“Qarabağda müharibə qızışsa, Qərb ölkələri Cənubu Qafqaza girə bilərlər”

- Bəzi tanınmış şəxslər və siyasətçilər, həmçinin xalq artisti Zeynəb Xanlarova müharibə çağırışları edir, münaqişənin yalnız müharibə yolu ilə həllinin mümkün olduğunu bəyan edir. Bu cür çağırışlara münasibətiniz necədir?

- Söylədiyim fikirləri nəzərə alsaq görərik ki, müharibə bizə yaxın olan üç ölkənin zərərinədir. Bu üç ölkəni bir yerə yığıb, Qarabağda sülhü təmin etməliyik. Müharibənin qızışması geniş miqyas ala bilər və Cənubu Qafqaza Qərb ölkələri girə bilərlər, nəticə çox acınacaqlı olar. İstər biz, istərsə Ermənistan Suriyanın gününə düşərik.

Ramal Hüseynli
Ölkə.Az

ŞƏRH YAZ
0

Türkiyə parlamentinin spikeri yeni komitə sədriylə görüşdü — “Qarabağ bizim milli məsələmizdir”

Türkiyə parlamentinin spikeri yeni komitə sədriylə görüşdü
23:42
23.05.2018
4784
Siyasət
A
Türkiyə Böyük Millət Məclisinin spikeri İsmayıl Qəhrəman Türkiyə Respublikasında rəsmi səfərdə olan Azərbaycanın Respublikasının Diasporla İş üzrə Dövlət Komitəsinin sədri Fuad Muradovu qəbul edib.

Komitənin mətbuat xidmətindən "Ölkə.Az"a verilən məlumata görə, TBMM sədri İsmayıl Qəhrəman Fuad Muradovla bir çox məsələlərlə bağlı fikir mübadiləsi aparıb.

İsmayıl Qəhrəman görüşdə Qarabağ məsələsinə  toxunub və bildirib ki, “Qarabağ bizim milli məsələmizdir. Nə yazıq ki, dünyanın gözü önündə böyük haqsızlıq yaşanmaqdadır. Dünya bu və buna bənzər haqsızlıqlara qarşı seyrçi qalmamalıdır”.

Komitə sədri Fuad Muradov isə hər bir azərbaycanlının qəlbinin Türkiyə ilə çırpındığını bildirib. O, deyib ki, “inanıram ki, bu ürəklər  birləşib böyük işlər görəcək”.

F. Muradov Türkiyə Prezidenti Rəcəb Tayyib Ərdoğanla Azərbaycan prezidenti İlham Əliyev tərəfindən həyata keçirilən işlərin iki ölkənin gələcəyi üçün edildiyini qeyd edib. Komitə sədri əlavə edib ki, “insanlarımız arasında böyük körpülər var. Bu körpülər ulu öndər Heydər Əliyev tərəfindən qurulub. Bunlar sülh və dostluq körpüləridir”.

Fuad Muradovun səfəri Türkiyə mediasında  geniş işıqlandırılıb

Ölkə.Az

ŞƏRH YAZ
0

“Rüstəm İbrahimbəyov öz xalqını aşağılayır” — Çingiz Qənizadə

“Rüstəm İbrahimbəyov öz xalqını aşağılayır”
21:10
23.05.2018
7559
Siyasət
A
“Azərbaycanlı soyadını daşıyan bir şəxsin – Rüstəm İbrahimbəyovun öz xalqına qarşı bu qədər qərəz mövqe nümayiş etdirməsinə bəlkə də təəccüblənmək lazım deyil. Bu insan həyatının böyük hissəsini başqa xalqların nümayəndələrinin içərisində keçirib. İndi də böyük qardaşların yanında yaxşı olmaq üçün öz xalqını aşağılayır”.

"Ölkə.Az" xəbər verir ki, bunu APA-ya açıqlamasında ssenari müəllifi Rüstəm İbrahimbəyov, rejissoru Eldar Şengelaya və Fuad İbrahimbəyov olan “Qafqaz üçlüyü” filmində azərbaycanlıların vəhşi, qəddar, riyakar, mədəniyyətsiz, milli kökü olmayan obrazda, ermənilərin isə alicənab, sülhsevər, “vəhşi türkün qurbanı” kimi təqdim olunmasına münasibət bildirən millət vəkili Çingiz Qənizadə bildirib.

Ç. Qənizadə deyib ki, kinorejissor gürcü, ssenari müəllifi Rüstəm İbrahimbəyov, aşağılanan xalq Azərbaycan xalqı, müdafiə olunan isə ermənilərdir: “Yəni bu filmlə Qafqazda iki xalqın - gürcü və ermənilərin Azərbaycan xalqına münasibətini formalaşdırmaq, xalqımızın vəhşi obrazını yaratmaq istəyir. Bu gün Azərbaycanda 30 min erməni əsilli insan yaşayır. Biz onları heç arayıb axtarmırıq, salamlaşırıq da. Biz erməni xalqı ilə düşmən deyilik. Təbii ki, Ermənistanda hakimiyyətdə olan, öz xalqını da çox ağır bir duruma gətirib çıxarmış işğalçı rejimlə düşmənik, çünki torpaqlarımızı işğal ediblər. Amma Rüstəm İbrahimbəyov kimi birisi 30 min insanımızı şəhid etməklə Dağlıq Qarabağ və ətraf rayonlarımızı işğal etmiş erməniləri dəstəkləyirsə, mən başqa söz tapa bilmirəm. Azərbaycana gələn hər bir əcnəbi dünən də, bu gün də və sabah da xalqımızın humanist, qonaqpərvər və sülhpərvər bir xalq olduğunun şahidi olub və şahidi olmağa davam edəcəklər”.

Millət vəkili qeyd edib ki, Moskvada yaşayan M. İbrahimbəyovun çəkdiyi “Qafqaz üçlüyü”  filmi əslində film deyil, qərəzli tamaşadır: “Bu təkcə Azərbaycan xalqının aşağılanması deyil, bu filmi çəkənlərin Moskvada, Kremldə olanlar qarşısında sanki öz xalqını aşağılamaqla hansısa dividentlər əldə etməsinə yönəlmiş bir addımdır. Sanki Rüstəm İbrahimbəyov Əkrəm Əyləslinin “Daş yuxular” əsərində təqdim etdiyi kadrı səhnələşdirib. Araşdırsaq, yəqin ki, Rüstəm İbrahimbəyovun da soyunda, kökündə hansısa o xalqa yaxın xalqın nümayəndələri gəlib çıxacaq. Bu filmin ssenarisini yazana, rejissoruna və filmdə iştirak edənlərə ayıb olsun”.

Ölkə.Az

ŞƏRH YAZ
0
BAĞLA