Ayıq sürücülər sizi necə tələyə salır?

Ayıq sürücülər sizi necə tələyə salır?
11:19
19.03.2017
52
Ölkə
A
Bakıda ayıq sürücü xidmətindən istifadə edən şəxsin sənədləri polis əməkdaşları tərəfindən alınıb.

Ölkə.Az xəbər verir ki, Bakı şəhər sakini Elçin Şirinov moderator.az-a bildirib ki, martın 13-də toy məclisindən çıxan zaman avtomobili idarə etmək üçün ayıq sürücü xidmətindən istifadə edib: “Həmin gün spirtli içki qəbul etdiyim üçün ayıq sürücü xidmətindən istifadə etdim. Yaşadığım binanın qarşısına çatanda sürücüyə bildirdim ki, avtomobili öz yerində saxlamaq lazımdır. Fikirləşdim sürücü avtomobili lazım olan qaydada saxlaya bilməz. Sürücün yola saldıqdan sonra maşını binanın qarşısında hərəkət etdirib lazım olan yerdə saxladım. Bu zaman gördüm ki, iki nəfər polis əməkdaşı başımın üstündə dayanıb. Onlar mənə sərxoş halda avtomobil idarə etdiyimi bildirdilər. Mən də bildirdim ki, spirtli içki qəbul etdiyimə görə, ayıq sürücü xidmətindən istifadə etmişəm. Bunu həmin nömrəyə zəng edib yoxlamaq da olar. Lakin onlar məni aparıb sərxoşluq müayinəsindən keçirdilər. Bildirdim ki, buna ehtiyac yoxdur, sərxoş olduğumu inkar etmirəm. Aparıb müayinədən keçirdikdən sonra yenidən maşını gətirib həyətdə saxladılar, sənədlərimi də alıb apardılar. İndiyə kimi də sənədlərimdən xəbər yoxdur”.

Bakı şəhər Dövlət Yol Polisi İdarəsindən bildiriblər ki, sərxoş halda heç bir şəkildə avtomobil idarə etmək olmaz: “Sərxoş vəziyyətdə maşını park etmək olmaz. Bu qanun pozuntusudur. Həmin sürücünün əgər sənədlərini alıblarsa barəsində tədbir görüləcək və həmin şəxsə bu barədə məlumat veriləcək”.

Hüquqşünaslar isə bildirirlər ki, binanın qarşısında avtomobili park etmək yol hərəkəti iştirakçısı olmağa əsas vermir. Sərxoş vəziyyətdə nəqliyyat vasitəsini idarə etmək məsuliyyət yaradır. Lakin bu, avtomobil yolunda baş verməlidir. Yəni ictimai yerdə bunu etmək olmaz. Lakin binanın qarşısında avtomobili park etmək məsuliyyət yaratmır.

Etibarlı mənbələrdən isə bildirilib ki, bəzi ayıq sürücü xidmətləri polislə birgə fəaliyyət göstərir. İçkili şəxslər barədə polisə məlumat ötürülür və nəticədə bu cür problemlər yaranır.

Sərxoş halda sükan arxasına keçməyin son dərəcə təhlükəli olduğunu xüsusi vurğulayan Avtosfer.az saytı isə sürücülərə tövsiyyə edir ki, bir neçə taksi sürücüsünün və ya adi sürücünün ayıq sürücü kimi göstərdiyi xidmətdən istifadə edərkən diqqətli olun. Yaxşı olar ki, peşəkar şəkildə ayıq sürücü xidməti göstərən şirkətlərə sifariş edəsiniz. Çünki ayıq sürücü sizi mənzilin yaxınlığında düşürüb gedən kimi yol polisinə yaxalandıqda artıq həmin ayıq sürücünü tapa bilmirsiniz. Ona ya zəng çatmayacaq, ya da başqa problem yaranacaq. Amma rəsmi şirkətin sürücüsü belə bir hərəkət edərsə və ya ayıq sürücü maşınınızı sürərkən radara düşərsə, kamera çəkərsə bu qayda pozuntusuna görə siz cərimə ödəməli olmazsınız. Əlinizdə sübutlar olacaq ki, qayda pozan ayıq sürücüyə cəriməni ödətdirəsiniz.

ŞƏRH YAZ
0

“Nar”dan autizmli uşaqlara dəstək aksiyası

“Nar”dan autizmli uşaqlara dəstək aksiyası
18:03
Bu gün
325
Ölkə
A

“Nar” özünün korporativ sosial məsuliyyət (KSM) strategiyası çərçivəsində daha bir sosial aksiyaya imza atdı. Autizmdən əziyyət çəkən uşaqlara dəstək olmağa qərar verən mobil operator bu çərçivədə “Nur” korreksiyaedici mərkəzlə əməkdaşlığa başladı. Belə ki, 23-27 aprel 2018-ci il tarixləri arasında qardaş Türkiyə Cümhuriyyətinin Alanya şəhərində keçiriləcək ANCA Dünya Autizm Festivalında “Nur” korreksiyaedici mərkəzdə müalicə alan 3 autizmli uşaq və 4 pedaqoqun iştirakı mobil operator tərəfindən təmin edildi.

ANCA Dünya Autizm Festivalı ilk dəfə 1995-ci ildə Kanadada keçirilib. Festival hər il müxtəlif ölkələrdə təşkil edilir. Bu il festivalda 35 ölkənin iştirakı gözlənilir. Azərbaycanı bu festivalda məhz “Nur” korreksiyaedici mərkəz təmsil edəcəkdir. “Nur” korreksiyaedici mərkəzdə defektoloq, loqoped, psixoloq, müalicəvi idman, yaşam və gimnastika müəllimi, xüsusi pedaqoqlar xidmət göstərirlər. Mərkəzdəki mütəxəsislər Daun sindromu, autizm, əqli inkişafın ləngiməsi, hiperaktivlik, eləcə də digər psixoloji və  müxtəlif  nitq  problemlərinin reabilitasiyası ilə məşğul olurlar.      

Festivalda Azərbaycanı təmsil edəcək kollektivin səfər xərclərini öz üzərinə götürən “Nar” uşaqların çıxışlarında istifadə edəcəkləri xüsusi paltarlar və milli geyimlər, idman dəstləri, milli rəqs üçün  xüsusi müəllimin dəvəti, müxtəlif dillərdə hazırlanmış broşürlər və milli hədiyyələrin təşkili, eləcə də digər logistik xərclərin qarşılanmasını təmin etdi.

ŞƏRH YAZ
0

Namusunu təmizləyən 18 yaşlı gəncin cinayətinin təfərrüatı

Namusunu təmizləyən 18 yaşlı gəncin cinayətinin təfərrüatı
17:45
Bu gün
377
Ölkə
A
Şəki Ağır Cinayətlər Məhkəməsində kollec tələbəsini namus üstündə öldürən 18 yaşlı gəncin məhkəməsi başlayıb.

 “Ölkə.Az”ın xəbərinə görə, hakim Rəşid Hüseynovun sədrliyi ilə keçirilən məhkəmə prosesində cinayət məcəlləsinin 120.2.2-ci maddəsi ilə məhkum olunan Hacıyev Tərlan Fikrət oğlunun ifadəsi dinlənilib, vəkillər vəsatətlə çıxış ediblər. 

İttiham aktına görə, 2017-ci il dekabr ayında  Ağdaş şəhərinin Bəkir Nəbiyev küçəsində, mərkəzi poçtun qarşısında şəxsi münasibətlər zəminində aralarında baş verən dava zamanı əslən Ağdaş rayonundan olan və Bakıda yaşayan 2000-ci il təvəllüdlü Hacıyev Tərlan Fikrət oğlu həmyaşıdı, Ağdaş şəhər sakini Nəsibov Ətraf Nəsib oğlunu bıçaqlayıb. Ürək və kürək nahiyəsindən bıçaq xəsarətləri alan Ətraf Nəsibov hadisə yerində dünyasını dəyişib.
Qətli törədən Tərlan Hacıyev hadisə yerindən qaçaraq Qəbələ rayonunda yaşayan qohumunun evində, sonra isə meşə ərazisində gizlənsə də, günorta saatlarında Ağdaş rayon Polis Şöbəsinin əməkdaşları tərəfindən keçirilən operativ əməliyyat-axtarış tədbirləri nəticəsində saxlanılaraq istintaqa təhvil verilib.

Ağdaş Dövlət Humanitar Kollecinin 2-ci kurs tələbəsi olan Ətraf Nəsibovun namus üstündə qətlə yetirildiyi bildirilir. Belə ki, Ətraf Nəsibov Tərlan Hacıyevin Ağdaşda orta məktəbin 10-cu sinfində oxuyan və dayısının evində yaşayan bacısı ilə görüşüb. Sonradan qız barəsində xoşagəlməz fikirlər söyləyən Ətraf Nəsibovun bu hərəkəti Tərlan Hacıyevin xoşuna gəlməyib. Tərlan Hacıyev bacısına görə Bakıdan Ağdaşa gələrək Ətraf Nəsibovu amansızlıqla qətlə yetirib. Qətli törədən Tərlan Hacıyevin valideynləri hazırda Türkiyədədir.

Qeyd edək ki, hadisə Ağdaş Dövlət Humanitar Kollecinin ərazisindən kənarda, dərslərarası fasilə vaxtı baş verib. Ətraf Nəsibov təhsil ocağını özbaşına tərk edərək poçtun yanına gedib və məlum hadisə bu zaman qeydə alınıb.

Kollecdən bildirilib ki, Ətraf Nəsibov dərslərini yaxşı oxuyan, sakit təbiətli insan olub, tələbə gənclər təşkilatının üzvü kimi təhsil ocağının tədbirlərində fəal iştirak edib.

Növbəti məhkəmə prosesi aprel ayının 24-ə təyin olunub.

ŞƏRH YAZ
0
BAĞLA