“Azərbaycan beynəlxalq aləmə ərazi bütövlüyünün nə qədər önəmli olduğu mesajını verdi”

Bunu “Ölkə.Az”a açıqlamasında Milli Məclisin Səhiyyə komitəsinin sədr müavini Musa Quliyev deyib.

Onun sözlərinə görə, Azərbaycan bu müddət ərzində istər Aİ ilə, istərsə də “Şərq tərəfdaşlığı” proqramı çərçivəsində düzgün siyasət yürüdüb: “Hesab edirəm ki, bu əməkdaşlığın bizim  nə qədər əhəmiyyətlidirsə, Avropa İttifaqı üçün də o qədər əhəmiyyətlidir. Avropa İttifaqı Azərbaycanla əməkdaşlığı nəticəsində özünə enerji sahəsində  etibarlı, sabit bir tərəfdaş tapıb. Azərbaycan isə  Avropanın demokratik dəyərlərinə, mədəniyyətinə, elminə, elmi texnologiyasına yiyələnməkdə maraqlıdır. Lakin təəssüflər olsun ki, müəyyən qüvvələr  Azərbaycanı incik salmağa çalışırlar. Azərbaycanı hələlik Avropa ailəsində görmək istəmirlər”.

Millət vəkili əlavə edib ki, bu təkcə  Azərbaycanla bağlı olan məsələ deyil: 

“Biz bunu Türkiyə misalında da gördük. Qardaş Türkiyə  neçə illərdir Avropa İttifaqına üzv olmaq üçün çalışır. Aİ-yə üzv olmaq üçün irəli sürülən bütün şərtlər yerinə yetirildi. Amma bütün bunların qarşılığında  Türkiyəyə qarşı hansı münasibətin sərgiləndiyinin şahidi olduq. Buna oxşar yanaşma və ikili standart bizimlə də var”.

“Şərq tərəfdaşlığı”nın 10 illik yubleyi ilə bağlı keçirilən tədbirin yekununda  hazırlanan bəyannnamədə üzv ölkələrin ərazi bütöblüyünün əksini tapmaması məsələsinə aydınlıq gətirən M.Quliyev deyib ki, bu məsələdə Azərbaycan qətiyyətli formada mövqeyini ortaya qoydu:
 “Bununla Azərbaycan beynəlxalq aləmə ərazi bütövlüyünün  nə qədər önəmli olduğu mesajını vermiş oldu. Baxmayaraq ki, sonradan qeyd olundu ki, digər protokollarda və sənədlərdə bu məsələ öz əksini tapıb. Düşüncəmə görə, verilən bu izahlar tam səmimi bir münasibətrin göstəricisi deyildi. Bax ona görə də bu məsələdə  Azərbaycan  Prezidenti və dilomatiyasının iradəsi ortadadır. Lazım gələndə onunla hesablaşamağa məcbur olurlar, necə ki, son hadisə bunu sübut etdi. Düşünürəm ki, biz bu toplantıdan qalib kimi ayrıldıq”.

Azərbaycan Prezidentinin Brüsselə səfərinin yekunlarına toxunan M.Quliyev bildirib ki, cənab İlham Əliyevin istənilən xarici ölkəyə səfəri Azərbaycanın  beynəlxalq əlaqələrinin möhkəmlənməsi, həqiqətlərinin dünyaya çatdırılması baxımından uğurlu olub:

 “Azərbaycan Prezidentin Brüsseldə keçirdiyi görüşlər və səfirliyin açılışında söylədiyi nitq  Azərbaycana uğur gətirən addımlardır. Avropa İttifaqı Azərbaycanı etibarlı tərəfdaş kimi  görməyə çalışsa da, ölkəmizi Avropa ailəsinə qəbul etməyə tələsmirlər. Bu reallıqdır. Burada müxtəlif amillər mövcuddur.  Burada eyni zamanda  ermənilərə dəstək verən qüvvələrin təsiri də var. Bir qısqanclıq var. Bütün bunlar bizim üçün yeni  hadisələr deyil.  Azərbaycan zamanında Avropa Şurasına üzv olanda da belə hallarla rastlaşmışıq.  Ancaq biz belə hadisələrə görə ruhdan düşəsi deyilik. Dünyaya çıxıb sözümüm deyib, sübut etmək üçün  bütün platformalardan istifadə etməliyik”.

Mürtəza
Ölkə.Az